Read bahnar Ese 3 Bible Online

Ese 3 - bahnar bible

Ese 3

¹Sư khan kơ inh: “Ơ kon bơngai, sa bĕ tơmam mă ih 'bôh 'bơ̆t anăp; sa bĕ sơnôm hla bơar âu păng năm, khan kơ adrĕch Isơrael.”

²Na inh ha 'bơ̆r, Sư ăn kơ inh sa sơnôm hla bơar noh.

³Na Sư khan kơ inh: “Ơ kon bơngai, iŏk sa bĕ sơnôm hla bơar Inh ăn kơ ih sa mă phĭ 'bĕnh kơ klak.” Thoi noh inh sa, 'băt 'ngam thoi đak sut lăm 'bơ̆r inh.

⁴Na Sư khan kơ inh: “Ơ kon bơngai, năm bĕ tơ adrĕch Isơrael, năm roi nơ̆r Inh kơ lu sư.

⁵Ưh kơ sĭ Inh wơh ih năm tơ kon pơlei tơmoi mă pơma nơ̆r anat kơ hlôh ôh, mă-lei năm tơ adrĕch Isơrael.

⁶Ưh kơ sĭ Inh wơh ih năm tơ lu kon pơlei tơmoi wă pơma nơ̆r anat kơ hlôh, nơ̆r pơma lu sư noh ih ưh kơ hlôh ôh, tơpă tơdah Inh wơh ih truh tơ lu sư, lu sư gô mơ̆ng ih.

⁷Adrĕch adrung Isơrael ưh kơ wă mơ̆ng ih, yua kơ lu sư kư̆m ưh kơ wă mơ̆ng Inh. Đĭ-đăng adrĕch adrung Isơrael ưh kơ chu, lu sư arăng kơ̆l.

⁸Inh gô pơm kơ măt ih arăng kơ̆l thoi măt lu sư păng klĕng ih arăng thoi klĕng lu sư.

⁹Inh gô pơm kơ kơ̆l ih arăng thoi jơmŏng, arăng hloh kơ tơmo. 'Nĕ hli kơ lu sư păng 'nĕ tơrơ, yua kơ 'bơ̆t anăp măt lu sư yua kơ lu sư jing adrĕch adrung ayăt kơ Inh.”

¹⁰Sư khan dơ̆ng kơ inh: “Ơ kon bơngai, mơ̆ng bĕ mă nhen, iŏk bĕ lăm jơhngơ̆m dôm nơ̆r Inh pơma khan kơ ih.

¹¹Năm bĕ tơ lu bơngai mă đe puh boih lăm lu kon pơlei ih pơm bơnă, khan kơ lu sư 'nâu nơ̆r Kră Yang Tih Hloh khan, mă lu sư mơ̆ng dah ưh.”

¹²Na Yang Bơhngol hơtŏk inh tơ kơpal păng inh kơtơ̆ng re jơwa tih tơ rŏng inh. Kơkuh bơnê ư-ang kơ Kră Yang lăm anih Sư oei.

¹³Inh kư̆m kơtơ̆ng re đơ̆ng pơnăr lu kon sem arih tơtuh hơtŭt băl păng re jơwa lu tang-wang gre rơ̆m răm 'bơ̆t cheng lu sư.

¹⁴Yang Bơhngol hơtŏk inh tơ kơpal păng anhăk inh năm, inh năm hăm jơhngơ̆m chhŭr nuih blĕk dêh tơpang ti Kră Yang kơtĭt kơpal inh trăp dêh.

¹⁵Inh năm truh tơ anih lu bơngai đe pơpuh oei tơ pơlei Têlabip, jê̆ tơ đak krong Kêbar inh dơ̆ng lăm anih lu sư oei păng inh oei hơdai lu sư tơpơh năr hăm jơhngơ̆m sơ'ngon hơwơ̆l hơwang.

¹⁶Hlôi kơ tơpơh năr đei nơ̆r Kră Yang khan kơ inh:

¹⁷“Ơ kon bơngai, Inh ăn kơ ih jing bơngai wei-lăng lu adrĕch Isơrael; mưh ih kơtơ̆ng nơ̆r Inh khan, ih athei năm roi tơbăt kơ lu sư nơ̆r mă Inh pơkă kơ lu sư athei kơchăng.

¹⁸Layơ mă Inh khan kơ bơngai pơm kơnê̆! ‘Sĭt ih gô lôch,’ mă-lei ih ưh kơ khan tơbăt kơ sư păng ưh kơ pơma khă sư athei hŭt lê̆ tơdrong kơnê̆ wă kơ sư gơh arih, bơngai pơm kơnê̆ noh gô lôch lăm tơdrong yoch sư. Mă-lei Inh gô tơpŭ pham sư lăm tơpang ti ih.

¹⁹Mă-lei tơdah ih khă tơbăt boih kơ bơngai pơm kơnê̆ noh, dah lu sư ưh kơ hŭt lê̆ trong pơm kơnê̆ kơdih, lu sư gô lôch lăm tơdrong yoch lu sư kơdih, mă-lei ih gô klaih huay pă pŭ.

²⁰Tơpă, dah minh 'nu bơngai tơpăt lê̆ tơdrong tơpăt sư na pơm yoch, Inh gô ăn đei tơdrong pơgăn 'bơ̆t anăp sư păng sư gô lôch yua kơ pơm yoch, mă-lei yua kơ ih ưh kơ khan khă bơngai noh, thoi noh sư gô lôch lăm tơdrong yoch sư, Inh ưh pă 'blŏk dôm tơdrong tơpăt mă sư đei pơm, mă-lei pham sư oei jô̆ lăm ti ih.

²¹Mă-lei tơdah ih đei khan tơbăt kơ bơngai tơpăt bơih, 'nĕ pă pơm yoch, sư ưh pă pơm yoch, na gô arih, yua kơtơ̆ng nơ̆r ih khă, lei ih gơh klaih huay kơ jô̆.”

²²Tơ noh ti Kră Yang dan kơpal inh, Kră Yang khan kơ inh: “Iung bĕ năm tơ teh thŭng dơnă Inh gô khan kơ ih tơ noh.”

²³Na inh iung năm tơ teh thŭng dơnă; tơdrong ư-ang rang mơnhal Kră Yang oei tơ noh thoi ư-ang rang mơnhal mă inh đei 'bôh tơ đak krong Kêbar, păng inh kŭp muh măt tơ teh.

²⁴Na Yang Bơhngol mơ̆t lăm inh tơiung inh dơ̆ng kơtă 'bơ̆t jơ̆ng inh, Kră Yang pơma hăm inh păng khan: “Năm mơ̆t lăm hnam, chĭt ih kơdih.

²⁵Ơ kon bơngai, âu, đe gô chô̆ ih hăm tơlei păng ih ưh pă gơh năm tơ lu sư dơ̆ng.

²⁶Inh gô pơm kơ hơpiĕt ih klep tơ păk-'ngơk, ih gô kơmlo, ưh kơ gơh chrih kơ lu sư; lu sư jing bơngai ayăt.

²⁷Mă-lei mưh Inh khan kơ ih, Inh pơih 'bơ̆r ih păng Ih gô khan kơ lu sư, Kră Yang tih hloh khan thoi âu: Bu mơ̆ng athei mơ̆ng bĕ, bu sơngah kuă kơ mơ̆ng, lê̆ sư sơngah yua kơ lu sư adrĕch adrung ayăt plơ̆.