Read bahnar Ese 33 Bible Online

Ese 33 - bahnar bible

Ese 33

¹Kră Yang khan kơ inh:

²Ơ kon bơngai, pơma bĕ kơ lu kon pơlei ih khan kơ lu sư: Mưh Inh ăn đao hơlă truh tơblah minh tŏ char na lu kon pơlei lăm char noh rôp minh 'nu bơngai lăm lu sư, pôk ăn kơ sư jing minh 'nu bơngai gak;

³păng tơdah sư 'bôh đao hơlă truh tơ char noh na sư hlôm keng wă tơbăt kơ kon pơlei;

⁴na dah bu kơtơ̆ng re keng mă-lei ưh kơ kơchăng lê̆ kơ lu đao hơlă pơlôch sư lei, pham sư gô tuh tơ kơpal kơ̆l sư,

⁵Yua kơ sư kơtơ̆ng boih keng re, mă ưh kơ kơchăng, pham sư gô tuh tơ kơdih sư, mă-lei tơdah sư kơchăng, sư gô pơklaih tơdrong arih sư.

⁶Tơdah bơngai gak 'bôh đao hơlă truh blah mă ưh kơ hlôm keng, kon pơlei ưh kơ băt kơchăng, na đao hơlă noh blah đei minh 'nu bơngai lôch yua kơ tơdrong yoch sư kơdih, mă-lei Inh gô tơpŭ pham noh tơ tơpang ti bơngai gak.

⁷Gah ih, ơ kon bơngai, Inh wơh ih jing bơngai gak lu bơngai Isơrael; tơdah ih kơtơ̆ng mơ̆ng bĕ nơ̆r Inh. Na athei lu sư kơchăng.

⁸Mưh Inh khan kơ lu bơngai yoch, Ơ bơngai yoch, tơpă iĕm gô lôch mă-lei ih ưh kơ khă ôh lu bơngai yoch athei achăng lê̆ trong sư, sư gô lôch lăm tơdrong yoch sư; mă-lei Inh gô tơpŭ kơ ih pham sư.

⁹Tơdah ih đei khă lu bơngai pơm yoch wă kơ sư achăng lê̆ trong sư, mă-lei sư ưh kơ lê̆ trong kơnê̆ sư, na sư lôch yua kơ tơdrong yoch sư, lei ih arih huay kơ pŭ yoch ôh.

¹⁰Ơ kon bơngai khan bĕ kơ adrĕch Isơrael: “Lu iĕm khan: ‘Dôm tơdrong kơnê̆ hăm tơdrong yoch lu nhôn, kơtĭt trăp dêh tơ lu nhôn, lu nhôn wă lôch yua kơ tơdrong yoch noh lei lu nhôn pơm liơ gơh đei arih.’

¹¹Khan bĕ kơ lu sư, Thoi Inh mă arih Kră Yang khan: Inh ưh kơ hiôk ôh kơ tơdrong lu bơngai yoch lôch, Inh hiôk dah sư achăng lê̆ trong tơdrong yoch sư na đei tơdrong arih; wih bĕ, wih bĕ, weh đơ̆ng trong tơdrong yoch iĕm, ơ hnam Isơrael. Yua kơ kiơ iĕm wă lôch?.

¹²Gah ih, ơ kon bơngai, khan bĕ kơ pơlei pơla ih, Tơdrong tơpăt lu bơngai tơpăt ưh kơ gơh pơklaih sư ôh lăm năr sư pơm yoch; tơdrong kơnê̆ lu bơngai pơm yoch ưh kơ gơh tơpơ̆k sư lăm năr sư weh achăng đơ̆ng tơdrong yoch sư. Bơngai tơpăt ưh kơ đei arih yua đơ̆ng tơdrong tơpăt sư lăm năr sư pơm yoch,

¹³Tơdah Inh khan kơ bơngai tơpăt. Tơpă ih gô arih mă-lei tơdah sư gơnang kơ tơdrong tơpăt sư kơdih na pơm yoch, Inh ưh pă đei 'blŏk dơ̆ng kơ tơdrong tơpăt mă sư pơm boih, na sư gô lôch lăm tơdrong yoch sư đêl pơm.

¹⁴Kŭm thoi noh mơ̆n tơdah Inh khan kơ bơngai pơm yoch, Tơpă ih gô lôch mă-lei tơdah sư achăng lê̆ tơdrong yoch na pơm tơdrong tơpăt pơm 'lơ̆ng;

¹⁵tơdah bơngai pơm yoch noh pơdrâu tơmam đêl pơkăm đơ̆ng tŏk iŏk păng pơdrâu tơmam đêl sư tơtông, arih sa kiơ̆ trong juăt arih 'lơ̆ng, ưh pă pơm tơdrong kơnê̆, tơpă sư gô arih, sư ưh pă lôch dơ̆ng.

¹⁶Dôm tơdrong yoch đêl sư pơm ưh pă 'blŏk dơ̆ng boih; sư pơm kiơ̆ tơdrong juăt păng tơdrong tơpăt na sư gô arih.

¹⁷Lu kon pơlei pơla ih khan: Trong Kră Yang ưh kơ tơpăt. Mă-lei tă tơ trong lu sư ưh kơ tơpăt.

¹⁸Tơdah bơngai tơpăt lê̆ tơdrong tơpăt sư pơm tơdrong kơnê̆, sư gô lôch yua kơ tơdrong yoch noh.

¹⁹Tơdah bơngai pơm yoch achăng lê̆ tơdrong yoch na sư pơm 'lơ̆ng kiơ̆ khôi juăt pơm tơpăt, yua kơ đơ̆ng lu tơdrong noh sư gô arih.

²⁰Lu iĕm khan: ‘Trong Kră Yang ưh kơ tơpăt!’ Ơ adrĕch Isơrael, Inh gô sek tơlang lu iĕm rim 'nu kiơ̆ kơ trong lu sư kơdih.”

²¹Lăm năr pơđăm khei mơjĭt, sơnăm mơjĭt-'bar đơ̆ng rŏng kơ lu nhôn jing bơnă đe, đei minh 'nu bơngai klaih đơ̆ng pơlei Jêrusalem năm tơbăt kơ inh: “Pơlei Jêrusalem đe iŏk boih.”

²²Ti Kră Yang dan kơpal inh gah kơsơ̆ adrol kơ bơngai năm roi noh truh; Sư ăn kơ inh gơh pơma dơ̆ng adrol kơ bơngai noh truh tơ inh kiơ̆ pơgê, 'bơ̆r inh gơh pơma pă kơmlo dơ̆ng.

²³Kră Yang khan kơ inh:

²⁴“Ơ kon bơngai, lu bơngai oei lăm char Isơrael juơ tơtŭng âu đei pơma: 'Bok nhôn Abraham lăp minh 'nu sư đei iŏk char 'nâu, mă-lei lu bơ̆n bơngai lơ, sĭt bơ̆n gô iŏk teh char âu wă jang sa.

²⁵Lei na khan bĕ kơ lu sư, Kră Yang khan thoi âu: Yua kơ lu iĕm sa 'nhĕm oei pham, măt lu iĕm maih lăng tơ rup yang, lu iĕm tuh pham pơlôch băl, lei lu iĕm gô iŏk char âu hă?

²⁶Lu iĕm gơnang kơ đao hơlă iĕm, pơm tơdrong kơnê̆ krưp, rim 'nu lu iĕm pơm kơnê̆ 'mê̆-'mach hăm akăn lu rông 'bôt kơdih; na lu iĕm gô iŏk asong băl char âu hă?

²⁷Khan bĕ kơ lu sư tơdrong âu: Kră Yang khan Thoi Inh mă arih, lu bơngai lăm anih răm rai gô lôch kơ đao; Lu bơngai oei lăm kơđông dah lăm hơlŭng gô lôch kơ jĭ hơbuh, lu bơngai oei lăm bri brah gô pơm tơmam sa kơ lu sem bri.

²⁸Inh gô pơm kơ char âu jing juơ tơtŭng pơchah pơchek, tơdrong pơang lu sư gô tôch; kông Isơrael jing juơ pă đei bu oei yak trong noh.

²⁹Kơplah noh lu sư gô băt inh boih Kră Yang, Inh boih ăn kơ char 'nâu jing pă đei, pơchah pơchek yua kơ tơdrong kơnê̆ krưp mă lu sư đei pơm.’

³⁰Bĭ ih ơ kon bơngai, lu kon pơlei pơla, kon sâu ih, pơma roi 'bơm kơ ih tơ dur pơlei, hăm 'bơ̆t 'măng hnam, pơma dơnuh băl tơduă lu sư, rim 'nu, bĕ bơ̆n năm mơ̆ng nơ̆r đơ̆ng Kră Yang pơma kiơ.

³¹Lu sư năm tơ ih thoi kon pơlei Inh juăt kơ năm, lu sư năm mơ̆ng nơ̆r ih thoi kon pơlei Inh; mă-lei lu sư ưh kơ pơm kiơ̆ tơdrong noh ôh 'bơ̆r lu sư pơm khan 'mêm mơnat, jơhngơ̆m lu sư chă tơdrong đei lơi yua kơdih akâu.

³²Kiơ̆ kơ lu sư lăng, ih thoi bơngai hơri tơdrong hưch wă hiôk, hơri tơ'nguơ̆ hơbôn, đei brŏ reh pơjuang hiôk; lu sư mơ̆ng nơ̆r ih đĕch mă-lei ưh kơ pơm kiơ̆.

³³Mưh tơdrong 'nâu truh, gô truh tơpă, lu sư gô băt đei minh 'nu 'bok khan lê̆ adrol oei lăm lu sư.”