Read bahnar Ese 35 Bible Online

Ese 35 - bahnar bible

Ese 35

¹Kră Yang khan kơ inh:

²“Ơ kon bơngai, tơwih muh măt ih tơklă tơ Kông Seir păng khan lê̆ adrol blah sư.

³Păng khan kơ lu sư: Kră Yang khan thoi âu: Ơ Kông Seir, inh blah Ih! Inh gô yơ̆r ti blah ih, gô pơm kơ anih ih juơ rơhiăng pă đei.

⁴Inh gô pơm kơ pơlei ih jing juơ, ih jing pă đei. Ih gô băt Inh boih Kră Yang.

⁵Yua kơ ih răk rong tơdrong blĕk đơ̆ng sơ̆, na jao lu bơngai Isơrael lôch kơ đao lăm tơdrong tơblah tơblŭng, đei 'bet pơlôch lu sư lăm tơdrong phak mă hơtuch.

⁶Thoi noh Kră Yang khan: Thoi Inh mă arih, Inh gô pơm kơ ih tuh pham pơlôch băl, pham gô druh kiơ̆ ih, yua kơ ih ưh kơ areh kơ tơdrong tuh pham, na pham gô druh kiơ̆ ih!

⁷Inh gô pơm kơ Kông Seir pơchah răm đĭ, pơm kơ anih noh pă đei bơngai yak wih wơ̆t rok noh.

⁸Lu kông iĕm gô 'bĕnh kơ akâu bơngai lôch; tơ kơpal groi lăm thŭng lăm thong đak tă đei akâu bơngai lôch kơ đao.

⁹Inh gô pơm kơ ih jing hiong hach hlŏng hloi; lu pơlei ih ưh pă đei bơngai oei, na lu iĕm gô băt Inh boih Kră Yang

¹⁰Yua kơ ih khan: 'Bar adrĕch adrung 'nâu păng 'bar tŏ dêh char 'nâu gah nhôn, lu nhôn gô iŏk, mă khan Kră Yang oei tơ noh.’

¹¹Na Kră Yang khan: Thoi Inh mă arih, inh gô pơm kơ ih kiơ̆ tơdrong hil mĭl păng jơhngơ̆m areh mă ih pơm kơ lu sư boih, Na lu sư gô băt Inh sek tơlang ih kiơ̆ tơdrong ih pơm kơ lu sư.

¹²Ih gô băt Inh boih Kră Yang kơtơ̆ng nơ̆r ih pơma pơjăm pơjuă hăm lu kông Isơrael khan: “Lu sư răm đĭ boih, lu sư gô jing tơmam sa lu bơ̆n.”

¹³Nơ̆r ih pơma pơang blah Inh; păng rai thim nơ̆r blah inh, Inh kơtơ̆ng boih!

¹⁴Kră Yang khan thoi âu: Đĭ-đăng kơ dêh char chơt hiôk kơplah inh pơm kơ ih jing juơ pă đei.

¹⁵Yua kơ ih chơt hiôk mưh mŭk tơmam adrĕch Isơrael jing juơ pă đei, na Inh kư̆m gô pơm kơ ih thoi noh. Kông Seir păng đĭ kơ Eđôm, gô jing juơ pă đei păng lu sư gô băt Inh boih Kră Yang.’”