Read bahnar Ese 36 Bible Online

Ese 36 - bahnar bible

Ese 36

¹Gah ih, ơ kon bơngai, khan lê̆ adrol bĕ gah kông kŏ Isơrael păng khan: “Ơ kông Isơrael, mơ̆ng bĕ nơ̆r Kră Yang!

²Kră Yang khan thoi âu: Yua kơ lu ayăt khan gah ih. “Aha! Lu kông kơjung noh sơ̆ gah lu nhôn boih.”

³Yua kơ thoi noh khan lê̆ adrol thoi âu: ‘Kră Yang khan thoi âu: Yua kơ lu sư pơm kơ ih jing juơ rơhiăng pă đei, blah ih đơ̆ng gah puăn pah, pơm kơ ih jing tơmam lu adrĕch adrung oei đei yua iŏk păng jing nơ̆r đe pơma roi sa, pơjăm,

⁴na, ơ lu kông groi Isơrael, mơ̆ng bĕ nơ̆r Kră Yang mơsêh mơyang: Kră Yang khan thoi âu kơ lu kông groi, lu thŭng thong păng teh dơnă, lu glung, lu anih pơchah pơchek, lu pơlei đĭ răm mă đĭ đe tơgar iŏk đe pơjăm đơ̆ng lu dêh char mă oei oei jum dăr kơ char ih noh.

⁵Kră Yang khan thoi âu: Lăm tơdrong Inh hil gar tơtŏ thoi ŭnh, inh wă blah lu dêh char mă oei oei păng đĭ kơ char Eđôm, lu dêh char mă đĭ jơhngơ̆m chơt hiôk pơjăm tơgar iŏk teh Inh jing tơmam sư kơdih păng tơgar iŏk lu tơmăn 'nhĕt,

⁶Thoi noh, khan lê̆ adrol bĕ gah teh đak Isơrael; khan bĕ kơ lu kông kŏ păng lu groi, lu glung păng lu teh thŭng dơnă: ‘Kră Yang khan thoi âu: Âu Inh khan hăm tơdrong Inh hil gar, yua kơ lu iĕm pŭ iŏk tơdrong mơlâu đơ̆ng lu char nai pơjăm.

⁷Na, Kră Yang khan thoi âu: Inh yơ̆r ti pơkă: Lu dêh char jum dăr kơ ih tơpă lu sư gô mơlâu!

⁸Na gah ih, ơ kông Isơrael, ih gô bluh dơ̆ng lơ păng đei plei ăn kơ lu kon pơlei Isơrael inh; yua kơ lu sư wă wih brŏk.

⁹Inh gô wei-lăng ih, tơchĕng gah ih păng đe gô choh pơtăm păng rei jơmŭl ih dơ̆ng.

¹⁰Lăm char ih Inh gô ăn kon pơlei adrĕch adrung Isơrael rai lơ, tơ lu pơlei ih gô đei bơngai oei, lu anih mă đêl pơchah đe gô tơiung hơmet.

¹¹Inh gô pơm ăn kon bơngai păng sem dơrong lăm char ih rai lơ păng chek lar. Inh gô ăn kơ ih đei kon pơlei oei thoi adrol sơ̆ păng ăn ih mơdrŏng hloh kơ blŭng-a. Na ih gô băt Inh boih Kră Yang.

¹²Inh gô ăn lu kon pơlei, noh kon pơlei Isơrael Inh gô yak kơpal teh ih; lu sư gô iŏk ih wei pơm tơmam lu sư, ih jing tơmam lu sư, Lu sư ưh pă kơ'bah lu kon sâu.

¹³Kră Yang khan: Lu đe khan kơ ih thoi âu: Ih luăn sa bơngai pơm kơ dêh ih ưh kơ đei kon hơ'lơ̆p.

¹⁴Na ih ưh pă luăn sa bơngai dơ̆ng păng dêh char ih gô đei hơ'lơ̆p, Kră Yang khan.

¹⁵Inh ưh pă ăn ih kơtơ̆ng lu nơ̆r kơnê̆ đe pơjăm pơjuă đơ̆ng lu dêh char; ih kư̆m huay pă pŭ tơdrong mơlâu dơ̆ng lu kon pơlei dơ̆ng păng ih kư̆m ưh pă ăn kơ dêh char ih, ih pơ̆k huŏng dơ̆ng, Kră Yang khan.”

¹⁶Kră Yang khan kơ inh dơ̆ng:

¹⁷Ơ kon bơngai, kơplah adrĕch adrung Isơrael oei tơ lăm dêh char lu sư kơdih, lu adrĕch Isơrael pơm boih tơdrong 'mê̆-'mach kơ dêh char. Tơdrong mă lu sư pơm 'bơ̆t anăp Inh kư̆m kơnê̆ 'mê̆-'mach thoi drŏ-kăn 'bôh hơbĕn.

¹⁸Na Inh tuh tơdrong hil mĭl tơ lu sư, yua kơ lu sư pơm tuh pham pơlôch đe păng yua kơ đơ̆ng lu sư kơkuh kơ rup yang pơm pơ'mê̆ kơ teh đak.

¹⁹Inh pơm kơ lu sư tơklah tơklang tơ jơ̆p kơ teh đak, tơ jơ̆p kơ tơring; Inh sek tơlang boih lu sư kiơ̆ kơ trong lu sư kiơ̆ păng tơdrong lu sư đei pơm.

²⁰Tơ lăm dêh char mă lu sư oei, lu sư đei pơm pơ'mê̆ kơ anăn 'lơ̆ng rơgoh Inh, đe pơma 'bơm lu sư khan: ‘Noh lu kon pơlei Kră Yang mă-lei đe puh tơweh lu sư đơ̆ng dêh char Kră Yang.

²¹Inh bơwei anăn rơgoh Inh anăn mă adrĕch Isơrael pơm pơ'mê̆ tơ lăm lu dêh char mă lu sư năm truh.

²²Thoi noh khan bĕ kơ adrĕch Isơrael: “Kră Yang khan thoi âu: Ơ adrĕch Isơrael, noh ưh kơ sĭ yua kơ lu iĕm mă Inh wă pơm noh, mă-lei yua kơ anăn 'lơ̆ng rơgoh Inh mă lu iĕm hlôi pơm pơ'mê̆ bơih tơ lăm lu dêh char mă lu iĕm năm truh.

²³Inh gô hơmet ming anăn 'lơ̆ng rơgoh Inh anăn mă lu iĕm pơm pơ'mê̆ boih tơ lăm lu dêh char, noh anăn Inh mă lu iĕm hlôi pơm pơ'mê̆ 'bơ̆t anăp lu sư, Kră Yang khan: Thoi noh lu adrĕch adrung gô băt Inh boih Kră Yang, 'bơ̆t anăp lu sư Inh gô tơ'bôh pơdah tơdrong rơgoh 'lơ̆ng Inh lăm lu iĕm 'bơ̆t anăp lu sư.

²⁴Inh gô dui iŏk lu iĕm đơ̆ng lăm lu dêh char akŭm pơpôi lu iĕm đơ̆ng jơ̆p kơ teh đak, ba lu iĕm wih brŏk oei tơ char lu iĕm kơdih.

²⁵Inh gô ruh đak rơgoh hlăng tơ lu iĕm, lu iĕm gô; rơgoh lu iĕm gô rơgoh đĭ đơ̆ng dôm tơdrong kơnê̆ 'mê̆-'mach păng rơgoh đơ̆ng tơdrong kơkuh kơ rup yang lu iĕm.

²⁶Inh gô ăn kơ lu iĕm jơhngơ̆m 'nao păng ăn yang bơhngol 'nao tơ lăm lu iĕm; Inh gô iŏk hŭt lê̆ đĭ jơhngơ̆m arăng thoi tơmo đơ̆ng akâu lu iĕm păng ăn kơ lu iĕm jơhngơ̆m rơmuăn hăm sĕch wă chu kiơ̆ Inh.

²⁷Inh gô ăn Yang Bơhngol Inh oei lăm lu iĕm, wă kơ lu iĕm pơm kiơ̆ khôi juăt inh, lu iĕm gô pơ'lơ̆ng pơm kiơ̆ lu nơ̆r Inh tơtă.

²⁸Lu iĕm gô oei tơ lăm teh đak mă Inh ăn kơ yă 'bok lu iĕm, lu iĕm jing kon pơlei pơla Inh, Inh jing Kră Yang 'Bok Kei-Dei lu iĕm.

²⁹Inh gô dŏng pơklaih lu iĕm đơ̆ng tơdrong kơnê̆ 'mê̆-'mach; Inh gô ăn kơ 'ba mi jing 'lơ̆ng kơchar rai lơ păng ưh pă ăn kơ lu iĕm pơngot rơwĕt.

³⁰Inh gô ăn plei 'long hơnik hơnam lăm mir chŭn đei rai tŏk lơ wă kơ lu iĕm huay pă mơlâu kơ char đe lăm tơdrong pơngot rơwĕt.

³¹Mă-lei lu iĕm gô 'blŏk kơ tơdrong kơnê̆ iĕm păng tơdrong iĕm pơm ưh kơ 'lơ̆ng. Tơpă lu iĕm gô lăng areh krưp kơdih akâu yua kơ tơdrong yoch păng tơdrong kơnê̆ krưp lu iĕm pơm.

³²Kră Yang khan: Ưh kơ sĭ yua kơ lu iĕm na Inh pơm thoi noh, lu iĕm athei băt nhen tơdrong noh, ơ adrĕch Isơrael, lu iĕm athei băt mơlâu kơdih!”

³³Kră Yang khan thoi âu: “Năr mă Inh ôp hơrao rơgoh tơdrong yoch lu iĕm, Inh pơm ăn kơ pơlei lu iĕm gô đei kon pơlei oei păng pơjing ming dơ̆ng lu anih mă đĭ pơchah răm.

³⁴Anih lê̆ bri gô choh pơtăm dơ̆ng, ưh pă lê̆ thoi adrol sơ̆ 'bơ̆t anăp lu bơngai rok găn.

³⁵Đe gô pơma khan: “Anih teh lê̆ bri âu dang ei jing pơgar Êđen păng lu pơlei mă đĭ pơchah pă đei noh 'nâu đei tơiung pơdơ̆ng ming đei kon pơlei oei!”

³⁶Dang ei lu adrĕch adrung kon pơlei oei jum dăr kơ lu iĕm gô băt Inh boih Kră Yang, Inh gô hơmet ming anih mă hlôi pơrăm, choh pơtăm dơ̆ng mă anih hlôi lê̆ bri. Inh boih Kră Yang Inh khan boih Inh gô pơm.”

³⁷Kră Yang khan thoi âu: “Inh kư̆m ăn kơ adrĕch adrung Isơrael chă apinh Inh tơdrong 'nâu, ăn kơ lu sư rai lơ kơdrâ̆m thoi khŭl triu,

³⁸nhen thoi triu 'măn wă pơm tơmam soi tơ Jêrusalem lăm năr giĕng tih. Mă lu pơlei đêl pơchah răm gô 'bĕnh kơ kon pơlei oei, lei na lu sư gô băt Inh boih Kră Yang.