Read bahnar Ese 38 Bible Online

Ese 38 - bahnar bible

Ese 38

¹Kră Yang khan kơ inh:

²Ơ kon bơngai, tơwih muh măt ih blah Gôk dêh char Magôk pơtao lu kon pơlei Rôs, Mêsêk, Tubal, khan lê̆ adrol blah sư.

³Khan bĕ: Kră Yang đei khan thoi âu: Ơ Gôk pơtao Rôs, Mêsêk păng Tuban, âu Inh blah ih.

⁴Inh gô pơm kơ ih wih dơ̆ng tah gơwŏk mam, 'bơ̆t kang ih, dui ba ih, hơdai hăm đĭ-đăng lu linh ih, aseh păng đĭ-đăng lu bơngai hao seh, đĭ-đăng lu sư tă kơ hrŭk ao mam minh khŭl linh lơ chĕp khêl tih iĕ păng đĭ-đăng chĕp đao ngăl.

⁵Lu khŭl linh Persơ, Kus păng Phut kư̆m năm hơdai hăm lu sư, đĭ-đăng chĕp khêl păng môk mam.

⁶Gômer păng đĭ-đăng lu linh sư, pơlei Tôgama oei tôch gah yă-nơ̆m hăm đĭ-đăng lu linh sư, kư̆m đei lơ kon pơlei kư̆m năm hơdai ih.

⁷Hơmet bĕ ih hăm đĭ-đăng kon pơlei akŭm jum dăr ih kư̆m hơmet. Ih gô pơm yŏng pơgơ̆r lu sư.

⁸Đei loi kơ lơ năr đunh, đe gô krao ih; lăm lu sơnăm tuch-luch ih gô năm tơ minh pôm char mă đei hlôi klaih đơ̆ng đao, akŭm băl đơ̆ng lơ adrĕch adrung; gô truh tơ kông Isơrael, anih mă pơchah jing juơ sơ̆. Kon pơlei noh đei chông ba đơ̆ng lu kon pơlei nai păng đĭ-đăng oei arih hiôk-hian.

⁹Ih gô năm tơ anăp blah nhen thoi kial hơbŭt, thoi hơmơ̆l gom lê̆ teh noh, ih păng lu linh hăm lơ adrĕch adrung kiơ̆ ih.

¹⁰Kră Yang khan: “Lăm năr noh ih đei tơchĕng ih wă chă đon pơm kơnê̆.

¹¹Ih khan: “Inh gô năm truh tơ tơring pơlei mă ưh kơ đei dur; inh gô blah kon pơlei mă oei arih sa hiôk-hian; đĭ-đăng lu sư oei lăm pơlei mă ưh kơ đei kơđông, ưh kơ đei kơ dur păng ưh kơ đei măng jang.

¹²Ih gô blah tơgar tơtông iŏk mŭk tơmam, ti ih teh pơchah lu anih mă đĭ juơ sơ̆ dang ei đei kon pơlei oei păng ih blah lu kon pơlei mă truh đơ̆ng lu char, pơlei mă đei lu sem dơrong mŭk tơmam oei lăm tŏk-bŏk tơring char noh.

¹³Lu bơngai Sêba păng Đêdan, lu bơngai mơdro đơ̆ng Tarêsi păng đĭ-đăng lu drŏ-nglo nuih kơtang thoi dăm-brang mơlôh sư gô khan kơ ih. ‘Hăm trŏ ih truh wă blah tơgar iŏk tơmam Ih akŭm linh wă blah iŏk tơmam, iŏk hu păng maih, wă blah iŏk sem dơrong mŭk tơmam păng wă tơgar iŏk lơ mŭk drăm hă?”’

¹⁴Thoi noh, ơ kon bơngai, khan lê̆ adrol bĕ păng tơbăt ăn kơ Gôk: Kră Yang khan thoi âu: Kơplah năr noh, kon pơlei Isơrael Inh oei arih sa hiôk-hian, ih ưh kơ băt ôh hă?

¹⁵Đơ̆ng anih ih oei tơ gah yă-nơ̆m ih gô năm truh, đei lơ kon pơlei kiơ̆ ih, đĭ-đăng lu sư gô hao aseh đei lơ bơngai pơgơ̆p jing minh khŭl linh nuih kơtang.

¹⁶Ơ Gôk Ih gô blah kon pơlei Isơrael Inh thoi hơmơ̆l gom teh. Lăm năr hơtuch noh Inh gô ăn kơ ih blah char Inh, wă kơ adrĕch kon bơngai băt kơ Inh, kơplah Inh pơdah tơdrong 'lơ̆ng rơgoh Inh đơ̆ng tơdrong truh tơ ih 'bơ̆t anăp lu sư.

¹⁷Kră Yang khan thoi âu: Hăm trŏ kơ ih bơngai mă Inh đei roi đunh đơ̆ng sơ̆ boih Inh đei yua lu đĭch đam Inh lu 'bok khan lê̆ adrol bơngai Isơrael, kơplah lăm năr noh sơ̆, đunh sơnăm bơih, lu sư đei khan lê̆ adrol thoi âu. Inh gô chông ih năm blah lu sư.

¹⁸Lăm năr noh, năr Gôk năm blah char Isơrael, Kră Yang khan thoi âu: Tơdrong Inh hil rai dêh.

¹⁹Lăm tơdrong Inh gar, lăm tơdrong Inh hil mĭl tơpă, lăm năr noh gô đei tơdrong pơpơ̆ tih dêh truh kơ char Isơrael.

²⁰'Bơ̆t anăp Inh, lu ka đak dơsĭ, sem păr kơpal plĕnh, kon sem bri, đĭ lu hơdrông kơep lep-ler mơmŏ kơpal teh păng lu kon bơngai kơpal teh gô hli tơtơ̆, lu kông hơlih, lu dur tơmo gô pơchah, đĭ-đăng lu anih kơjăp gô hơlih đĭ tơ teh.

²¹Kră Yang khan: Inh gô krao đao hơlă đơ̆ng rim kơ kông groi Inh blah lu sư; đao hơlă lu sư gô blah 'nhŏng oh sư kơdih.

²²Inh gô phak lu sư hăm tơdrong jĭ hơpoh hăm đao hơlă 'bet pơlôch pham lĕch, Inh gô ăn 'mi hơbŭt, 'mi prĕl, ŭnh păng tơmo ngŭr tuh tơ lu sư, tơ lu kon pơlei kiơ̆ sư hăm lu linh sư.

²³Na Inh gô pơm pơdah tơdrong krưp 'lơ̆ng rŏ Inh hăm 'lơ̆ng rơgoh Inh kơ lơ adrĕch adrung kon bơngai păng lu sư gô băt Inh boih Kră Yang.