Read bahnar Ese 4 Bible Online

Ese 4 - bahnar bible

Ese 4

¹“Na ơ kon bơngai, iŏk minh hlak gŏch, dan gŏch noh 'bơ̆t anăp ih păng chhơ̆ rup pơlei Jêrusalem kơpal gŏch noh.

²Ih wang tăp pơlei noh; man pơdơ̆ng dur, pơm kơđông linh, blah pơlei noh păng dan tơroi tŭl dur jum dăr pơlei wă pơrăm sư.

³Ih iŏk minh hlak gŏ bơsei, pơdơ̆ng pơm thoi dur bơsei sơlam ih păng pơlei; na ih tơwih muh măt gah pơlei noh ih pơm thoi đe oei wang tăp kơ pơlei noh. Noh tơdrong tơdra kơ bơngai Isơrael.

⁴Klaih kơ noh, ih athei 'bĭch cheng gah 'ngiĕo păng Inh gô dan tơdrong yoch bơngai Isơrael tơ kơpal ih. Ih 'bĭch thoi noh hơdôm năr, pŭ chĕp tơdrong yoch lu sư kư̆m dang noh.

⁵Inh đei hơgăt kơ ih kơsô̆ năr dang ăi hăm kơsô̆ sơnăm tơdrong yoch lu sư, jing pêng-hrĕng tơsĭn-jĭt năr, ih gô pŭ tơdrong yoch bơngai Isơrael.

⁶Mưh lăm năr noh đĭ hlôi boih ih 'bĭch cheng gah 'ma păng pŭ iŏk tơdrong yoch bơngai Juđa, lăm puăn-jĭt năr, Inh hơgăt kơ ih minh năr thoi lăm minh sơnăm.

⁷Kơplah noh ih athei oei tơwih muh măt ih tơ gah tơdrong wang pơlei Jêrusalem; păng sơk ti hoh hăm nơ̆r khan lê̆ adrol wă blah plơ̆ sư.

⁸Inh gô iŏk tơlei chô̆ ih, wă kơ ih ưh kơ gơh pơdăr gah to, gah âu, truh tơ đĭ năr ih wang pơlei.

⁹Iŏk 'ba mi, 'ba tơ'bâu, tơh, tơh dreng, trơwơ păng 'ba mi kiĕng, tah lê̆ lăm ge, hrâu pơm 'bĕng ih sa 'bĭch cheng hơdôm năr, ih gô sa 'bĕng noh hơdôm năr, ih gô sa 'bĕng noh lăm pêng-hrĕng tơsĭn-jĭt năr.

¹⁰Tơmam ih wă sa rim năr 'bar-jĭt sekơl,a ih sa kiơ̆ kơ jơ hơgăt rim năr.

¹¹Đak nhă ih kư̆m gô kŏng, minh lăm tơdrâu hin,b ih nhă kiơ̆ kơ jơ đei hơgăt rim năr.

¹²Ih gô sa 'bĕng 'ba tơ'bâu 'buh hơbĭ hăm ĭch bơngai 'bơ̆t anăp lu kon pơlei.”

¹³Kră Yang khan: “Lei-lăi thoi noh adrĕch adrung Isơrael gô sa 'bĕng kơnê̆ 'mê̆-'mach tơ lăm teh đak mă Inh pơpuh lu sư tơ noh.”

¹⁴Na inh khan: “Ơ! Kră Yang Tih Hloh; inh ưh kơ layơ pơm 'mê̆-'mach kơdih akâu đơ̆ng oei 'lơ̆p mă truh dang ei, inh kư̆m ưh kơ layơ sa tơmam lôch kơmăp dah đơ̆ng sem bri châu; păng ưh kơ đei 'nhĕm 'mê̆-'mach ayơ mă đei tah sa lăm 'bơ̆r inh.”

¹⁵Sư khan kơ inh: “Inh ăn kơ ih iŏk ĭch rơmo tơplih kơ ĭch bơngai wă 'buh 'bĕng.”

¹⁶Sư khan kơ inh dơ̆ng: “Ơ kon bơngai, Inh gô pơhrŏ tơjur lê̆ 'bĕng sa lăm Jêrusalem, lu sư gô sa 'bĕng kiơ̆ kơ kŏng hơgăt lê̆ păng gô sa hăm tơdrong hli, lu sư gô nhă đak kư̆m hơgăt lê̆ păng nhă hăm tơdrong hli krê.

¹⁷Thoi noh đak nhă păng 'bĕng sa khăi ưh kơmah, lu sư tơlăng băl hli tơrơ păng lôch hiong yua kơ đơ̆ng tơdrong yoch lu sư pơm.”