Read bahnar Ese 44 Bible Online

Ese 44 - bahnar bible

Ese 44

¹Na sư chông ba inh năm tơ 'măng 'nguaih kơ anih 'lơ̆ng rơgoh, 'măng noh gah hơlĕch; mă-lei 'măng noh đe tang lê̆ boih.

²Kră Yang khan kơ inh: “'Măng âu athei tang lê̆, ưh kơ gơh pơih. Păng ưh kơ đei bu gơh mơ̆t trong 'măng jang âu, yua kơ Kră Yang 'Bok Kei-Dei Isơrael mơ̆t boih trong 'măng jang 'nâu; thoi noh 'măng noh athei tang chĭt lê̆.

³Lăp pơtao đĕch, yua kơ sư yŏng na gơh ngôi tơ noh păng sa 'bĕng 'bơ̆t anăp Kră Yang gô mơ̆t rok trong kơdeng 'măng jang păng lĕch kư̆m trong noh.”

⁴Đơ̆ng noh sư chông ba inh mơ̆t 'măng gah yă-nơ̆m tơ cham gah lăm 'bơ̆t anăp hnam akŭm. Inh lăng âu bơih, tơdrong ư-ang rang mơnhal Kră Yang 'bĕnh jơ̆p kơ hnam akŭm Kră Yang; na inh drap kŭp kơ̆l kơkuh.

⁵Kră Yang khan kơ inh: “Ơ kon bơngai athei kơchăm lăng, lăng mă pơnhen; athei pơgling đon mơ̆ng dôm tơdrong Inh bơtho khan kơ ih, gah dôm tơdrong khôi juăt Kră Yang, gah hnam akŭm; athei lăng tơ lu bơngai mơ̆t tơ hnam akŭm păng đĭ-đăng lu bơngai lĕch đơ̆ng anih 'lơ̆ng rơgoh.

⁶Ih khan bĕ kơ lu bơngai Isơrael mă ayăt hăm Inh: Kră Yang khan thoi âu: ‘Ơ adrĕch Isơrael, dôm tơdrong kơnê̆ krưp mă lu iĕm hlôi pơm noh tôm boih.

⁷Lu iĕm hlôi chông ba adrĕch adrung kon pơlei tơmoi, lu bơngai mă ưh kơ kăt tơdra jơhngơ̆m, kư̆m ưh kơ kăt tơdra akar mơ̆t lăm anih 'lơ̆ng rơgoh Inh wă pơ'mê̆ kơ hnam akŭm Inh, kơplah lu iĕm pơyơ̆r tơmam sa kơ Inh, rơmă păng pham; lu iĕm pơm yoch glăi boih kơ nơ̆r pơkă Inh hăm tơdrong kơnê̆ 'mê̆ krưp lu iĕm.

⁸Lu iĕm ưh kơ hiơ̆k bơ̆jang wei tơmam 'lơ̆ng rơgoh Inh; lu iĕm pôk bơngai nai bơ̆jang tơdrong noh lăm anih 'lơ̆ng rơgoh Inh tơplih kơ lu iĕm.

⁹Kră Yang khan thoi âu: 'Nĕ kơ ăn bơngai tơmoi ưh kơ kăt tơdra lăm jơhngơ̆m păng sĕch akar kư̆m ưh kơ kăt tơdra, mơ̆t lăm anih 'lơ̆ng rơgoh Inh, mă lu bơngai oei hơdai hăm lu adrĕch adrung Isơrael kư̆m ưh kơ gơh mơ̆t tơ noh.

¹⁰Bĕ gah lu bơngai Lêwi hlôi năm ataih đơ̆ng Inh, achăng Inh kiơ̆ kơkuh kơ rup yang lu sư, kơplah lu kon pơlei Isơrael hlôi jrok trong weh ataih đơ̆ng Inh, lu sư gô pŭ tơdrong yoch kơdih.

¹¹Lu sư gơh bơ̆jang lăm anih hnam akŭm Inh, bơ̆jang wei gak 'măng jang anih hnam akŭm Inh, bơ̆jang lăm hnam akŭm. Lu sư gơh pơlôch tơmam soi 'buh păng lu tơmam soi nai ăn kơ lu kon pơlei; lu sư gô dơ̆ng 'bơ̆t anăp kon pơlei awih awăn kơ lu sư.

¹²Yua kơ lu sư đei tơgŭm kon pơlei bơ̆jang 'bơ̆t anăp rup yang lu sư, pơm ăn kơ lu bơngai Isơrael pơ̆k huŏng pơm yoch, yua kơ tơdrong noh, Inh đei hiŏng ti phak lu sư, athei pŭ iŏk tơdrong yoch lu sư kơdih, Kră Yang khan.

¹³Lu sư ưh kơ gơh năm jê̆ Inh wă pơm 'bok soi 'bơ̆t anăp Inh, lu sư kư̆m ưh kơ gơh năm jê̆ tơmam 'lơ̆ng rơgoh, kư̆m ưh kơ gơh năm jê̆ tơmam mă 'lơ̆ng rơgoh hloh. Mă-lei lu sư gô pŭ tơdrong mơlâu păng lu tơdrong kơnê̆ 'mê̆ krưp mă lu sư hlôi pơm yoch.

¹⁴Mă-lei Inh gô pơjao kơ lu sư bơ̆jang awih awăn lăm anih hnam akŭm, đĭ-đăng lu tơdrong jang wă kơ bơ̆jang keh păng dôm tơdrong jang athei pơm tơ lăm noh.

¹⁵Mă-lei lu 'bok soi adrĕch Lêwi, kon sâu Sađŏk, noh lu bơngai mă wei-lăng lăm anih 'lơ̆ng rơgoh Inh, kơplah kon sâu Isơrael wơ̆l jrok weh ataih đơ̆ng Inh, lu sư boih gô dơ̆ng 'bơ̆t anăp Inh wă pơyơ̆r kơ Inh rơmă păng pham, Kră Yang khan.

¹⁶Lu sư boih gô mơ̆t lăm anih 'lơ̆ng rơgoh Inh lu sư boih gô năm 'bơ̆t jê̆ chơnang soi wă bơ̆jang kơ Inh; awih awăn kơ Inh.

¹⁷Mưh lu sư mơ̆t tơ măng jang cham gah lăm, lu sư athei hrŭk ao che 'bui ưh kơ gơh, hrŭk ao che sŏk triu mưh wă bơ̆jang tơ cham gah lăm dah tơ lăm hnam akŭm.

¹⁸Lu sư gô pơ̆n kơ̆l lu sư hăm che 'bui păng hơbĕn djăl che 'bui dang kiơ̆ kơiĕng, lu sư ưh kơ gơh hrŭk hơbĕn ao pơm bơuh.

¹⁹Mưh lu sư lĕch năm tơ cham gah 'nguaih, anih mă đei kon pơlei, lu sư athei plôh lê̆ hơbĕn ao mă lu sư hrŭk bơ̆jang, lê̆ tơ lăm pôm anih rơgoh păng hrŭk ao nai, wă kơ lu sư huay kơ pơm kơ kon pơlei rơgoh 'lơ̆ng yua kơ đơ̆ng hơbĕn ao 'bok soi lu sư.

²⁰Lu sư ưh kơ gơh hơkôih kơ̆l 'ngôch păng lê̆ sŏk kơjung, mă-lei athei yuă sŏk lăp ai.

²¹Ưh kơ đei 'bok soi ayơ gơh et tơdrô kơplah mơ̆t tơ cham gah lăm.

²²Lu sư ưh kơ gơh iŏk akăn adro wă pơm akăn păng ưh kơ gơh iŏk drŏ-kăn mă klo sư achăng, mă-lei gơh iŏk drŏ-kăn hơlai hle 'lơ̆ng lăm adrĕch Isơrael; mă-lei dah akăn adro lu 'bok soi sư kư̆m gơh iŏk.

²³Lu sư gô bơtho khan kơ kon pơlei băt kơ tơdrong kiơ mă 'lơ̆ng rơgoh Păng tơdrong kiơ mă hmă đĕch, tơdrong kiơ 'mê̆-'mach păng băt tơdrong kiơ mă rơgoh.

²⁴Tơdah đei tơdrong kiơ truh tơhil pơma băl lu sư gô sek tơlang kiơ̆ thoi Inh tơtă. Lu sư gô wei răk khôi juăt păng lu tơdrong juăt lăm tôm tơdrong kơ̆m giĕng Inh păng wei năr Sa'bat jing năr 'lơ̆ng rơgoh.

²⁵Lu 'bok soi ưh kơ gơh năm jê̆ bơngai lôch kơnh 'bơm tơdrong 'mê̆-'mach; mă-lei 'bok soi gô 'bơm tơdrong 'mê̆-'mach yua kơ đơ̆ng jê̆ mĕ 'bă sư, hăm lu kon drŏ-nglo, kon drŏ-kăn sư, 'nhŏng oh, dah mai, oh sư tam đei klo kăn kơplah lu sư lôch.

²⁶Đơ̆ng rŏng kơ ôp hơrao rơgoh, 'bok soi athei gô lăm tơpơh năr dơ̆ng.

²⁷Lăm năr mă lu 'bok soi mơ̆t lăm cham gah lăm wă bơ̆jang tơ lăm anih rơgoh, sư athei pơyơ̆r tơmam soi huai đơ̆ng yoch kơdih, Kră Yang khan.

²⁸'Nâu pă đei lu mŭk tơmam 'măn lê̆ kơ lu 'bok soi. Lu iĕm ưh pă klah asong mŭk tơmam kơ lu sư đơ̆ng lăm Isơrael; Inh boih jing mŭk tơmam lu sư.

²⁹Lu sư gô sa lu tơmam soi pơyơ̆r phe ba, tơmam soi huai đơ̆ng yoch păng tơmam soi huai đơ̆ng tơdrong glăi; tơmam kiơ pơyơ̆r đơ̆ng lu bơngai Isơrael noh jing tơmam lu sư.

³⁰Lu plei 'long blŭng-a 'lơ̆ng hloh lăm tôm tơmam, lăm đĭ-đăng tơmam soi mă lu sư pơyơ̆r, noh gah lu 'bok soi ngăl. Lu iĕm kư̆m pơyơ̆r ăn kơ lu 'bok soi tơpŭng bơlah blŭng-a mă 'lơ̆ng hloh; wă kơ đei tơdrong pŭn hiôk pơdơh tơ hnam lu iĕm.

³¹Lu 'bok soi ưh kơ gơh sa sem dơrong sem bri sem păr ayơ lôch kơmăp, dah mă đơ̆ng lu tơduă châu hek