Read bahnar Ese 45 Bible Online

Ese 45 - bahnar bible

Ese 45

¹Tơdah lu iĕm hlang lang klah asong băl teh wă jang sa, athei klah lê̆ minh pah teh pơyơ̆r kơ Kră Yang teh noh jing teh 'lơ̆ng rơgoh lăm char. Tor sư 'bar-jĭt pơđăm-rơbâu hơgăt păng wơ̆l 'bar-jĭt rơbâu hơgăt; đĭ-đăng lu teh âu jing teh 'lơ̆ng rơgoh.

²Lăm teh noh, lu iĕm iŏk lê̆ dơ'bŭng tor pơđăm-hrĕng hơgăt, wơ̆l pơđăm-hrĕng hơgăt lê̆ kơ pơm anih hnam akŭm 'lơ̆ng rơgoh; jum dăr teh noh kư̆m lê̆ trong pơđăm-jĭt hơgăt.

³Lăm teh mă 'lơ̆ng rơgoh noh, lu iĕm 'măn lê̆ pha tor sư dang 'bar-jĭt pơđăm-rơbâu hơgăt păng wơ̆l mơjĭt-rơbâu hơgăt wă 'măn anih hnam akŭm 'lơ̆ng rơgoh jing anih 'lơ̆ng rơgoh hloh.

⁴Noh boih anih teh 'măn lê̆ 'lơ̆ng rơgoh ăn kơ lu 'bok soi bơngai bơ̆jang lăm anih hnam akŭm 'lơ̆ng rơgoh, lu bơngai năm jê̆ bơ̆jang kơ Kră Yang. Noh anih mă lu sư pơm hnam oei păng anih 'lơ̆ng rơgoh ăn kơ hnam akŭm 'lơ̆ng rơgoh.

⁵Minh pah nai lăm teh noh tor 'bar-jĭt pơđăm-rơbâu hơgăt wơ̆l sư mơjĭt-rơbâu hơgăt, noh 'măn lê̆ kơ lu bơngai Lêwi, lu bơngai âu awih awăn lăm anih hnam akŭm teh noh lu sư pơm pơlei oei păng jang sa.

⁶'Bơ̆t cheng jê̆ teh noh, lu iĕm gô 'măn lê̆ teh wơ̆l sư pơđăm-rơbâu hơgăt păng tor sư 'bar-jĭt pơđăm-rơbâu hơgăt; 'bơ̆t cheng jê̆ teh jang sa lu bơngai oei lăm pơlei tih, noh boih teh jang sa lu bơngai Isơrael.

⁷Teh 'măn kơ yŏng pơgơ̆r, đei 'bar pah teh 'lơ̆ng rơgoh păng teh pơlei tih, 'moi pơtŏ kiơ̆ kơ teh anih rơgoh păng teh pơlei tih. Tor sư gah bơmơ̆t pơrok gah bơmơ̆t, gah hơlĕch pơrok tơ gah hơlĕch, tor sư kơjung đơ̆ng gah bơmơ̆t, gah hơlĕch pơrok gah hơlĕch tơ 'bar hơdral char Isơrael, sư tơtil rok teh asong kiơ̆ kơ adrĕch.

⁸Noh boih teh lu yŏng pơgơ̆r jang sa lăm char Isơrael; lu yŏng pơgơ̆r ưh pă pơjuă pơđep kon pơlei Inh dơ̆ng, mă-lei lu yŏng gô ăn kơ bơngai Isơrael oei tơ teh asong Kiơ̆ adrĕch adrung lu sư.

⁹Kră Yang khan thoi âu: Ơ lu yŏng pơgơ̆r Isơrael, noh tôm boih! 'Nĕ pă pơm kơnê̆ păng pơjuă pơđep; pơm bĕ tơdrong 'lơ̆ng tơdrong tơpăt; 'nĕ pă pơpuh kon pơlei Inh dơ̆ng, Kră Yang khan.

¹⁰Lu iĕm athei iŏk 'long kŏng tơpăt “Epha” trŏ, yua “pơnhan” hơtŏ hơnơ̆ng;

¹¹Êpha păng pơnhan athei tŏ ăi, pơnhan mong minh lăm mơjĭt hômer păng êpha kư̆m minh lăm mơjĭt homer; homer noh wă kŏng pơtŏ hơnơ̆ng kơ 'bar tŏ.

¹²Minh sêikơl dang 'bar-jĭt gêra; 'bar-jĭt sêikơl akŭm hăm 'bar-jĭt pơđăm sêikơl păng mơjĭt-pơđăm sêikơl, đei minh Mina.

¹³Âu boih tơmam pơyơ̆r mă lu iĕm athei pơyơ̆r: Rim minh hômer 'ba mi iŏk minh lăm tơdrâu êpha păng đơ̆ng rim hômer 'ba tơ'bâu, na klah iŏk minh lăm tơdrâu êpha.

¹⁴Gah tơmam pơyơ̆r lu rơmă minh lăm mơjĭt pơnhan đơ̆ng rim kơ “Kôrơ” đak rơmă, minh kôrơ dang mơjĭt pơnhan dah minh hômer, minh kư̆m dang mơjĭt pơnhan.

¹⁵Đơ̆ng khŭl triu lăm anih 'nhĕt bluh arih 'lơ̆ng Isơrael, lăm 'bar-hrĕng tŏ triu gô iŏk minh wă pơm tơmam soi hăm phe 'ba păng tơmam soi 'buh, tơmam soi 'blŏk bơnê wă huai đơ̆ng yoch kơ kon pơlei, Kră Yang khan.

¹⁶Đĭ-đăng kon pơlei lăm char gô ăn tơmam soi pơyơ̆r 'nâu ăn kơ yŏng pơgơ̆r Isơrael.

¹⁷Mă-lei yŏng pơgơ̆r athei hơmet lu tơmam soi 'buh, tơmam soi phe 'ba păng tơmam sa et sa năr kơ̆m giĕng lăm khei blŭng-a năr Sa'bat, lăm rim năr kơ̆m giĕng et sa lu bơngai Isơrael. Sư athei pơyơ̆r lu tơmam soi huai đơ̆ng yoch, tơmam soi phe 'ba, tơmam soi 'buh, tơmam soi 'blŏk bơnê wă huai đơ̆ng yoch ăn kơ kon pơlei Isơrael.

¹⁸Kră Yang khan thoi âu: Năr blŭng-a lăm khei mônh, ih iŏk minh pôm rơmo dăm ưh kơ đei rơka đơ̆ng lăm khŭl wă pơm rơgoh lăm anih 'lơ̆ng rơgoh.

¹⁹'Bok soi gô iŏk pham tơmam soi huai đơ̆ng yoch na pik tơ lu jrăng hnam akŭm, tơ puăn pah mum jơ̆ng chơnang soi păng lu jrăng 'măng jang cham gah lăm.

²⁰Lăm năr mă tơpơh lăm khei noh, ih kư̆m athei pơm tơdrong noh kơ lu bơngai pơm yoch hơch 'bơm dah yua kơ ưh kơ hlôh; thoi noh ih gô pơm rơgoh kơ hnam akŭm.

²¹Lăm năr mơjĭt-puăn khei mônh, lu iĕm gô 'blŏk hơdơ̆r pơm Phĕt Năm Brih lăm tơpơh năr; lăm lu năr noh sa 'bĕng ưh kơ đei 'buh pông.

²²Lăm năr noh, yŏng pơgơ̆r gô pơyơ̆r minh pôm rơmo dăm huai đơ̆ng yoch sư kơdih păng kơ đĭ-đăng kon pơlei lăm char.

²³Lăm tơpơh năr phĕt, rim năr lăm tơpơh năr noh; sư gô pơyơ̆r tơpơh tŏ rơmo dăm păng tơpơh tŏ kon triu 'lơ̆ng ưh kơ đei rơka wă pơm tơmam soi kơ Kră Yang; lăm tơpơh năr, rim năr minh pôm bơbe tơno wă pơm tơmam soi huai đơ̆ng yoch.

²⁴Gah tơmam soi phe 'ba, kư̆ kơ rim minh pôm rơmo dăm sư pơyơ̆r minh êpha, rim kơ minh pôm triu tơno kư̆m pơyơ̆r minh êpha, gah rơmă minh “hin” lăm rim êpha.

²⁵Lăm năr mơjĭt-pơđăm khei tơpơh pơm phĕt (pơm phĕt bơsŭn) lăm tơpơh năr, sư kư̆m pơyơ̆r hơmet lei-lăi thoi noh, kơ tơmam soi huai đơ̆ng yoch, tơmam soi 'buh, tơmam soi phe 'ba păng đak rơmă.