Read bahnar Ese 46 Bible Online

Ese 46 - bahnar bible

Ese 46

¹Kră Yang khan thoi âu: 'Măng jang cham gah lăm, tơ gah hơlĕch, athei tang chĭt lê̆ lăm tơdrâu năr oei jang, mă-lei gô pơih lăm năr phĕt Sa'bat păng lăm năr phĕt Khei 'Nao.

²Yŏng pơgơ̆r gô mơ̆t trong kơdeng, gah 'măng jang noh, sư gô dơ̆ng 'bơ̆t jrăng 'măng jang; kơplah noh lu 'bok soi pơyơ̆r tơmam soi 'buh, tơmam soi apinh hiôk-hian, na sư gô kơkuh drap 'bơ̆t anăp 'măng jang, đơ̆ng noh gô lĕch. 'Măng jang noh ưh pă tang dĭng truh tơ kơsơ̆ măng.

³Lăm phĕt năr Sa'bat păng Khei 'Nao, kon pơlei lăm char noh gô drap kơkuh 'bơ̆t anăp Kră Yang 'bơ̆t trong mơ̆t tơ 'măng jang noh.

⁴Lu tơmam soi 'buh mă yŏng pơgơ̆r pơyơ̆r kơ Kră Yang lăm năr Sa'bat noh tơdrâu tŏ triu 'lơ̆ng ưh kơ jĭ rơka păng minh tŏ bơbe 'lơ̆ng ưh kơ jĭ rơka.

⁵Gah tơmam soi phe ba pơyơ̆r hăm bơbe tơno minh êpha minh pôm; tơmam pơyơ̆r kơpung phe 'ba hơdai hăm minh pôm triu mơ̆ng kơ đei; păng gah đak rơmă minh êpha pơyơ̆r minh hin.

⁶Lăm phĕt năr Khei 'Nao, sư gô pơyơ̆r minh pôm rơmo dăm ưh kơ đei jĭ rơka, tơdrâu tŏ kon triu kon păng minh triu tơno ưh kơ jĭ rơka.

⁷Gah tơmam soi pơyơ̆r phe 'ba minh êpha hơdai hăm rơmo dăm. Minh êpha pơyơ̆r hăm triu tơno, hăm kon triu kon mơ̆ng kơ đei, gah lu tơmam pơyơ̆r phe tơpŭng wă hrâu hăm lu đak rơmă rim êpha minh hin.

⁸Mưh yŏng pơgơ̆r wă mơ̆t, sư rok trong kơdeng kơ 'măng jang păng lĕch kư̆m trong noh.

⁹Kơplah kon pơlei char noh wă mơ̆t 'bơ̆t anăp Kră Yang lăm năr phĕt, bơngai bu mơ̆t kơkuh năm rok trong 'măng jang gah yă-nơ̆m, gô lĕch trong 'măng jang gah gơal; bơngai bu mơ̆t trong 'măng jang gah gơal gô lĕch trong 'măng jang gah yă-nơ̆m, ưh kơ đei bu gơh lĕch tơ trong đêl mơ̆t, mă-lei athei mơ̆t tơpăt tơklă anăp.

¹⁰Yŏng pơgơ̆r oei hơdai hăm lu kon pơlei. Tơdah lu kon pơlei mơ̆t sư kư̆m mơ̆t. Tơdah lu kon pơlei lĕch sư kư̆m lĕch hơdai.

¹¹Lăm lu năr phĕt păng pơm giĕng tih, tơmam pơyơ̆r phe ba hơbĭ hăm rơmo dăm, minh êpha; minh êpha hăm kon triu tơno păng lu tơmam soi pơyơ̆r phe ba hăm lu triu kon mơ̆ng kơ đei, hơdai hăm đak rơmă rim minh êpha minh hin.

¹²Mưh yŏng pơgơ̆r pơyơ̆r tơmam soi 'buh, jơhngơ̆m wă kơdih, dah tơmam soi apinh hiôk-hian, jơhngơ̆m wă kơdih ăn kơ Kră Yang, măng jang gah hơlĕch đe pơih kơ sư. Sư gô pơyơ̆r tơmam soi 'buh păng tơmam soi apinh hiôk-hian thoi đei pơm lăm năr Sa'bat, na sư lĕch, mưh sư lĕch hlôi boih, 'măng jang đe gô tang lê̆ dơ̆ng.

¹³Rim năr kiơ̆ pơgê, ih athei pơyơ̆r minh pôm triu kon, minh sơnăm ưh kơ đei jĭ rơka, pơm tơmam soi 'buh ăn kơ Kră Yang.

¹⁴Rim pơgê ih athei pơyơ̆r tơmam soi phe ‘ba hơdai hăm tơmam soi noh, minh lăm tơdrâu êpha hăm minh lăm pêng hin đak rơmă wă bơlŭ hăm tơmam soi phe 'ba, wă pơm tơmam soi pơyơ̆r kơ Kră Yang rim năr noh tơdrong juăt ling-lang hlong hloi.

¹⁵Thoi noh rim pơgê, ih gô pơyơ̆r kon triu, tơmam soi pơyơ̆r phe 'ba păng đak rơmă wă pơm tơmam pơyơ̆r, soi 'buh ling-lang.

¹⁶Kră Yang khan thoi âu: Tơdah yŏng pơgơ̆r iŏk minh tơmam sư ăn kơ kon drŏ-nglo sư kơdih, tơmam noh jing tơmam kon drŏ-nglo sư, jing mŭk tơmam sư, noh jing tơmam sư iŏk yua đơ̆ng 'bă pơsư̆ ăn.

¹⁷Mă-lei tơdah 'bok yŏng iŏk minh lăm tơmam noh na ăn kơ lu đĭch đam sư, tơmam noh jing tơmam kơ đĭch đam sư truh tơ sư rơngei; tơmam noh pơdrâu kơ yŏng noh. Dôm tơmam 'bok yŏng đei noh lăp ăn kơ lu kon sâu sư đĕch gơh iŏk.

¹⁸Yŏng pơgơ̆r ưh kơ gơh iŏk mŭk tơmam kiơ đơ̆ng kon pơlei, dah pơgŏ tơgar iŏk mŭk tơmam lu sư; sư gô iŏk tơmam sư kơdih na ăn kơ lu kon sâu wă bơ̆jang sa, thoi noh na kon pơlei Inh ưh kơ đei bu đe gơh tơgar iŏk mŭk tơmam đơ̆ng lu sư.

¹⁹Đơ̆ng noh sư chông ba inh mơ̆t rok trong 'măng jang cheng, năm truh tơ anih 'lơ̆ng rơgoh gah yă-nơ̆m wă 'măn kơ lu 'bok soi; tơ noh đei minh anih tơ tuch-luch gah bơmơ̆t.

²⁰Sư khan kơ inh: “'Nâu anih lu 'bok soi hơtŭk 'nhĕm tơmam soi huai đơ̆ng yoch păng tơmam soi huai đơ̆ng glăi păng soh tơmam soi phe ba wă huay kơ anhăk ba tơ cham gah 'nguaih kơnh hli pơm kơ kon pơlei jing 'lơ̆ng rơgoh.”

²¹Sư kư̆m chông ba inh tơ cham gah 'nguaih, chông inh năm tơ puăn pah mum cham; âu inh 'bôh tơ rim mum cham đei minh hlak cham nai.

²²Tơ rim puăn pah mum cham, đei cham iĕ, tor kơjung puăn-jĭt hơgăt wơ̆l pêng-jĭt hơgăt; đĭ-đăng puăn hlak cham tơ puăn pah mum, să iĕ tor wơ̆l lei-lăi.

²³Tơ lăm lu cham noh đei tơnăr gŏch jum dăr păng jum dăr jơ̆ng tơnăr đei trôm pơm tơnuh anih wă pai.

²⁴Sư khan kơ inh: Âu boih hnam gŏ, anih lu bơngai bơ̆jang awih awăn lăm hnam akŭm pai hơtŭk lu tơmam soi đơ̆ng kon pơlei pơyơ̆r.”