Read bahnar Ese 47 Bible Online

Ese 47 - bahnar bible

Ese 47

¹Bơngai noh, sư chông ba inh wih dơ̆ng tơ ‘măng mơ̆t tơ anih hnam akŭm; na inh 'bôh đak ro đơ̆ng ala kơtơ̆n 'măng anih hnam akŭm, ro gah hơlĕch; yua kơ anăp hnam akŭm tơ gah hơlĕch, Đak đơ̆ng ala 'măng hnam akŭm gah gơal ro năm tơ gah gơal kơ chơnang soi.

²Bơngai noh sư chông ba inh trong 'măng gah yă-nơ̆m, lĕch tơ 'nguaih kơ cham; sư ba inh năm jum dăr gah 'nguaih truh tơ 'nguaih kơ 'măng gah hơlĕch; păng to đei đak ro đơ̆ng gah gơal kơ ‘măng noh.

³Bơngai noh năm rok gah hơlĕch ti sư chĕp ba minh tơlei pơtŏ păng pơtŏ đei minh-rơbâu hơgăt, sư chông ba inh tŏk kơ đak tŏk dang kiơ̆ plei kĕnh.

⁴Bơngai noh pơtŏ minh-rơbâu hơgăt dơ̆ng, na chông inh tŏk kơ đak, đak jrŭ dang kŭl-tăng; sư đei pơtŏ minh-rơbâu hơgăt dơ̆ng na chông ba inh tŏk kơ đak, đak jrŭ tôch kiơ̆ kơiĕng.

⁵Bơngai noh sư pơtŏ dơ̆ng minh-rơbâu hơgăt; tơ âu jơ̆ đak tih jing krong boih, inh ưh pă gơh tŏk boih, yua kơ đak krong tŏk; đak jrŭ athei glơi, ưh pă gơh tŏk hlôi boih.

⁶Bơngai noh sư khan kơ inh: “Ơ, kon bơngai, ih hăm 'bôh ưh? Sư chông ba inh wơ̆t 'bơ̆t đak krong.

⁷Lăp inh wih truh 'bơ̆t đak krong boih, inh 'bôh 'bar pah kơ đak krong đei 'long lơ.

⁸Sư khan kơ inh: “Đak krong âu ro tơpăt tơ gah hơlĕch, truh tơ tơring Araba, ro mơ̆t tơ đak dơsĭ, mưh ro truh tơ đak dơsĭ boih đak dơsĭ noh gô hlăng 'lơ̆ng.

⁹Đak krong ro truh tơ yơ, lu kon sem, hơdrông kơep lep-ler đei arih tơ noh. Gô đei lơ lu ka lăp đak krong ro truh tơ noh na đak gô hlăng 'lơ̆ng; đak krong 'nâu ro truh tơ yơ lu sem brem tơ noh gô arih.

¹⁰Lu bơngai traih ka gô dơ̆ng 'bơ̆t jih krong; đơ̆ng pơlei Êngêđi truh tơ Ên Eglaim đei anih wă dăng hơnhuăl; tơ noh đei lơ ka tôm kơ adrĕch ka kư̆m thoi lăm đak Dơsĭ Tih.

¹¹Đak lăm lu Dơnâu hlŭt tơ noh ưh pă hlăng 'ngam, mă-lei 'măn kơ pơm 'boh.

¹²Tơ tơter jih đak krong 'bar pah đe pơtăm tôm kơ lu 'long plei sa, lu hla ưh kơ hơlŭng, lu 'long đei plei hơnơ̆ng, rim khei đei pơkao plei 'lơ̆ng yua kơ đei đak ro lĕch đơ̆ng hnam akŭm. Plei wă pơm tơmam sa păng yua wă pơm pơgang.”

¹³Kră Yang khan thoi âu: Âu jing hơdral wă kơ lu iĕm klah asong teh jang sa kơ mơjĭt-'bar adrĕch Isơrael. Asong kơ Jôsep 'bar lăm noh.

¹⁴Rim 'nu gô klah asong dih băl teh wă jang sa lei-lăi băl; yua kơ Inh đei pơkă boih gô ăn teh char âu kơ 'bok yă lu iĕm, na teh âu lu iĕm gô iŏk wă jang sa.

¹⁵Âu jing hơdral teh: Gah yă-nơ̆m, đơ̆ng Đak Dơsĭ Tih, rok rong pơlei Hêtlôn truh trong năm truh tơ pơlei Sêdat,

¹⁶pơlei Hơmat, Bêrôha păng Sibraim, 'bơ̆t tŏk-bŏk hơdral sơlam pơlei Đamas păng Hamat, truh tơ pơlei Haser Hathikôn truh tơ hơdral Hauran.

¹⁷Thoi noh hơdral iŏk đơ̆ng đak dơsĭ truh tơ Hasar Ênon, 'bơ̆t hơdral pơlei Đamas gah yă-nơ̆m iŏk đơ̆ng hơdral pơlei Hamat năm tơ gah yă-nơ̆m noh boih hơdral gah yă-nơ̆m.

¹⁸'Nâu gah hơlĕch iŏk đơ̆ng sơlam Hauran păng pơlei Đamas 'moi rok đak Krong Jôrđăn tŏk-bŏk pơlei Gileat păng teh đak Isơrael, lĕch tơ đak dơsĭ gah hơlĕch, tôch tơ Tamar; noh boih hơdral gah hơlĕch.

¹⁹Gah gơal iŏk đơ̆ng Thamar truh tơ lu Đak Mêriba tơ Kades, rok Thong đak Êyiptơ, truh tơ đak Dơsĭ Tih; noh boih hơdral gah gơal.

²⁰Gah bơmơ̆t, rok tơter Đak Dơsĭ Tih, noh hơdral dĭng truh tơ trong năm gah hơlĕch tơ pơlei Lebô Hamat; noh boih hơdral gah bơmơ̆t.

²¹Lei na lu iĕm klah asong băl teh âu, kiơ̆ kơ khŭl adrĕch bơngai Isơrael.

²²Lu iĕm athei hlang lăng klah asong teh âu wă jang sa, ăn kơ lu iĕm păng ăn kơ lu bơngai tơmoi mă oei hơdai lu iĕm păng pơjing lu kon sâu tơ lăm lu iĕm. Lu iĕm kư̆m lăng lu sư thoi adrĕch kon sâu Isơrael. Lu sư kư̆m dai gơh đei asong teh jang sa thoi lu iĕm mă oei hơdai lăm adrĕch bơngai Isơrael.

²³Lu bơngai tơmoi oei hơdai lăm adrĕch ayơ, lu iĕm gô ăn kơ lu sư teh wă jang sa hơdai tơ lăm noh Kră Yang khan.