Read bahnar Ese 6 Bible Online

Ese 6 - bahnar bible

Ese 6

¹Đei nơ̆r Kră Yang khan kơ inh thoi âu:

²“Ơ kon bơngai, athei tơwih muh măt ih tơklă tơ lu kông Isơrael păng khan lê̆ adrol blah plơ̆ lu sư

³Păng khan: Ơ lu kông Isơrael, mơ̆ng bĕ nơ̆r Kră Yang Tih Hloh 'nâu nơ̆r Kră Yang Tih Hloh khan kơ lu kông, lu groi, lu thong păng lu thŭng dơnă: Âu, Inh gô iŏk đao hơlă blah lu iĕm păng Inh gô pơrăm anih kơjung lu iĕm.

⁴Gô pơrăm đĭ lu chơnang soi iĕm, rup yang măt 'năr lu iĕm gô teh pơchah, Inh gô klơ̆m hŭt lu bơngai mă lôch, 'bơ̆t anăp lu rup yang mă iĕm kơkuh.

⁵Inh gô dan akâu lu bơngai lôch kon pơlei Isơrael 'bơ̆t anăp rup yang lu sư păng săi kơting lu sư jum dăr kơ chơnang soi.

⁶Mă anih ayơ lu iĕm oei, mă pơlei lu iĕm oei kư̆m gô pơrăm, lu anih kơjung lu iĕm juăt kơkuh gô păk. Chơnang soi kư̆m gô pơrăm pă đei, rup yang lu iĕm kư̆m teh pơchah ưh pă đei, gơ̆ng lu iĕm kơkuh kơ rup yang măt 'năr pơchah hơlih, dôm tơdrong jang lu iĕm pơm gô răm đĭ.

⁷Lu bơngai mă đe pơlôch lăm lu iĕm gô pơ̆k lôch păng lu iĕm gô băt Inh boih Kră Yang!

⁸Mă-lei, kơplah lu iĕm tơklah tơklang jơ̆p kơ teh đak, Inh oei đei ăn mơ'nah oei arih, klaih đơ̆ng đao hơlă lu teh đak blah iĕm.

⁹Lu bơngai lăm lu sư mă đei klaih noh oei tơ lăm teh đak mă lu sư oei, đe rôp pơm bơnă. Lu sư 'blŏk kơ jơhngơ̆m Inh đei pơchah, chhŭr nuih bơih, yua kơ tơdrong lu sư, pơm kư̆ kă weh đơ̆ng Inh păng măt lu sư pơm pơyô kư̆ kă kiơ̆ kơ lu yang kơnê̆. Kơplah noh lu sư kơdih gô lăng krưp areh kơ tơdrong kơnê̆, yua kơ tôm tơdrong kơnê̆ lu sư đei pơm krưp tơpă.

¹⁰Lu sư gô băt Inh boih Kră Yang păng nơ̆r Inh pơma ưh kơ đei hiong đĕch ôh, tơdrong mă Inh pơm truh kơ lu sư 'nâu.

¹¹Kră Yang Tih Hloh khan thoi âu: Athei tap ti kơtrơ̆m jơ̆ng păng krao ôr! Ơu kah! Gah dôm tơdrong kơnê̆ krưp adrĕch adrung Isơrael, lu sư gô lôch kơ đao hơlă pơngot rơwĕt păng jĭ lôch hơbuh.

¹²Lu bơngai oei ataih gô lôch kơ jĭ hơbuh. Lu bơngai oei jê̆ gô pơ̆k răm kơ đao, lu bơngai oei arih, gô lôch kơ pơngot rơwĕt Thoi noh Inh gô ăn truh tơdrong Inh hil mĭl kơ lu sư.

¹³Đĭ lu iĕm gô băt, Inh boih Kră Yang, kơplah lu bơngai lăm lu iĕm lôch tơ'bĭch 'bơ̆t hơdai rup yang lu iĕm, jum dăr kơ chơnang soi, tơ kơpal kông groi, kơpal kơ̆l kông, ala hơmŭl 'long hơdrih păng lăm rơ̆m 'long kôih, jơ̆p kơ anih mă lu sư pơyơ̆r pơgang 'bâu phu 'bơ̆t anih kơkuh kơ lu rup yang lu sư.

¹⁴Inh gô yơ̆r ti Inh wă blah lu sư; Inh gô pơm kơ teh đak, anih lu sư oei gô jing juơ; Inh gô pơrăm đơ̆ng char glă truh tơ pơlei Dibla. Thoi noh na lu sư gô băt Inh boih Kră Yang.”