Read bahnar Ese 7 Bible Online

Ese 7 - bahnar bible

Ese 7

¹Đei nơ̆r Kră Yang khan kơ inh:

²“Ơ kon bơngai, 'nâu nơ̆r Kră Yang Tih Hloh khan kơ dêh char Isơrael: 'Nâu tơdrong tôch truh bơih! Tơdrong răm truh boih tơ puăn pah mum kơ dêh char.

³Dang ei tơdrong ih truh bơih. Inh gô tuh tơdrong Inh hil tơ ih, Inh gô sek tơlang phak ih kiơ̆ kơ trong ih yak, hăm Inh gô pơm tơwih kơ ih kiơ̆ dôm tơdrong kơnê̆ krưp mă ih đei pơm.

⁴Măt Inh ưh pă lăng 'mêm mơnat kơ ih păng ưh pă đei dŏng ih; Inh gô phak ih tơpă yua kơ lu tơdrong ih yak kiơ̆ păng tơdrong kơnê̆ krưp lăm ih. Na ih gô băt Inh boih Kră Yang.

⁵'Nâu tơdrong Kră Yang Tih Hloh khan: Tơdrong truh 'nâu, đei dơ̆ng tơdrong truh nai âu sư truh boih.

⁶Tơdrong răm tuch-luch truh boih, tơdrong răm truh tuch-luch truh boih, tơdrong truh kơ ih boih.

⁷Ơ lu kon pơlei oei lăm dêh char âu, tơdrong răm tih truh kơ lu iĕm boih, truh jơ 'năr boih, wă jê̆ năr boih noh năr hli tơrơ, ưh kơ trŏ năr chơt hiôk tơ kơpal kông.

⁸Âu Inh wă tuh tơdrong Inh hil tơ ih păng wă pơhrăp tơdrong Inh hil blĕk kơ ih, Inh gô sek tơlang phak ih kiơ̆ kơ trong ih yak păng gô pơm tơwih kơ ih kiơ̆ kơ dôm tơdrong kơnê̆ krưp mă ih đei pơm.

⁹Măt Inh ưh pă lăng mơnat kơ ih, Inh kư̆m ưh pă dŏng ih, Inh gô phak kiơ̆ kơ trong ih yak kiơ̆ păng tơdrong kơnê̆ krưp lăm ih. Na ih gô băt Inh boih Kră Yang Tơ'ngla mă đei phak ih.

¹⁰Âu, năr 'nâu! Sư truh boih. Tơdrong răm truh kơ ih boih, tơdrong pơm kơnê̆ rai krưp thoi 'long bluh pơkao, tơdrong pơang rai tih thoi 'long bluh tơmơ̆ng.

¹¹Tơdrong pơm kơnê̆ rai dêh jing tơdrong kơnê̆ lơ hloh; lăm lu sư pă đei bu oei đei, mŭk tơmam pă đei, tơdrong mơdrŏng lu sư kư̆m pă đei, lăm lu sư ưh pă đei bu đe pơyom.

¹²Jơ trŏ boih, 'năr truh boih! Bơngai răt 'nĕ kơ chơt hiôk, bơngai tĕch kư̆m 'nĕ kơ ơh sơ'ngon, yua kơ tơdrong truh kơ đĭ-đăng.

¹³Lu bơngai tĕch ưh pă đei wơ̆t huai iŏk dơ̆ng tơmam mă hlôi tĕch; kơplah bre sư oei arih ră, yua kơ tơdrong truh đei tơ'bôh tơ bơngai tơpôl ưh pă gơh pơdrâu dơ̆ng. Yua kơ đơ̆ng tơdrong yoch lu sư kơdih; Ưh kơ đei bu gơh bơwei tơdrong arih kơdih.

¹⁴Mă lu sư hlôm keng boih păng tôm tơdrong hơmet lê̆ bơih, mă-lei ưh kơ đei bu lĕch năm tơblah yua kơ tơdrong Inh hil tuh tơ kơpal đĭ-đăng lu sư bơih.

¹⁵Tơ 'nguaih đei đao hơlă, tơ lăm đei lôch hơbuh păng pơngot rơwĕt. Lu bơngai oei tơ 'nguaih chŭn gô lôch kơ đao hơlă, lu bơngai oei tơ lăm pơlei, gô lôch kơ pơngot rơwĕt păng lôch kơ jĭ hơbuh đĭ.

¹⁶Dôm lu bơngai ayơ klaih oei arih gô oei tơ kơpal kông nhơ̆m hmoi thoi sem kơtơp lăm pŭng-lŭng, đĭ-đăng lu sư nhơ̆m hmoi yua kơ tơdrong yoch kơdih.

¹⁷Rim tơpang ti gô rơdu ưh pă jăng, dôm lu kŭl-tăng rơdu rơmuăn thoi đak.

¹⁸Lu sư gô hrŭk ao 'bi păng đei tơdrong hli krưp gom lu sư thoi ao. Rim kơ muh măt lu sư hơ'nhŭk oei mơlâu. Lu sư hơkôih kơ̆l 'ngôch đĭ yua kơ sơ'ngon.

¹⁹Lu sư hŭt lê̆ hu tơ trong, maih lu sư jing thoi tơmam kơnê̆. Maih, hu ưh kơ gơh pơklaih lu sư kơplah năr Kră Yang hil. Kŭm ưh kơ đei pơm kơ lu sư huay kơ pơngot, kư̆m ưh kơ pơm kơ lu sư phĭ klak, tơmam noh pơm kơ lu sư pơ̆k lăm tơdrong yoch.

²⁰Đơ̆ng lu tơmam drŏ-kăn pơguăng 'lơ̆ng rŏ mă lu sư pơang kơdih; lu sư yua tơmam noh pơm rup yang kơkuh kơnê̆ krưp. Lei na Inh gô pơm kơ tơmam noh jing tơmam 'mê̆-'mach kơ lu sư!

²¹Inh gô pơjao tơmam noh kơ bơngai tơmoi, thoi tơmam tơtông tơgar ăn kơ lu bơngai ala teh âu thoi tơmam iŏk đơ̆ng tơblah jei; lu sư gô pơm 'mê̆-'mach.

²²Inh gô weh ataih muh măt Inh đơ̆ng lu sư, lu sư gô pơm kơnê̆ anih gĭt kăl Inh; lu bơngai tơtông gô mơ̆t tơ noh pơm kơnê̆ 'mê̆-'mach dêh.

²³Hơmet lê̆ glang yua kơ lăm teh đak âu 'bĕnh kơ tơdrong pơm yoch kơnê̆ 'bet pơlôch băl păng lăm pơlei âu 'bĕnh kơ tơdrong pơrăm băl.

²⁴Inh gô anhăk ba lu bơngai đơ̆ng dêh tơmoi pơm kơnê̆ tih hloh năm blah iŏk hnam lu sư; Inh gô pơrăm lê̆ tơdrong pơang lu bơngai kră păng pơm kơ anih rơgoh lu sư jing 'mê̆-'mach.

²⁵Mưh tơdrong pơmat-tat hli krưp truh; lu sư chă tơdrong hiôk-hian, mă-lei ưh kơ đei.

²⁶Tơdrong gleh răm âu truh kư̆m đei dơ̆ng tơdrong gleh răm nai truh; kơtơ̆ng ang đei tơdrong âu kư̆m đei kơtơ̆ng ang tơdrong nai hai dơ̆ng. Lu sư chă tơdrong tơ'bôh đơ̆ng lu bơngai khan lê̆ adrol; tơdrong bơtho tơ'bôh khôi juăt đơ̆ng 'bok soi hăm đơ̆ng lu kră tă kơ hiong tôch đĭ bơih.

²⁷Pơtao gô nhơ̆m hmoi. Lu kon pơtao gô pŭ iŏk tơdrong răm, pă hơmĕng tơpang ti lu kon pơlei pơla gô hli tơtey. Inh gô pơm kơ lu sư kiơ̆ kơ trong lu sư, oei arih sa thoi yơ Inh gô sek tơlang thoi noh. Lu sư gô băt Inh boih Kră Yang.”