Read bahnar Ese 8 Bible Online

Ese 8 - bahnar bible

Ese 8

¹Lăm sơnăm tăl mă tơdrâu, năr pơđăm khei tơdrâu, kơplah inh oei hơ-oei lăm hnam, lu kră pơlei Juđa, oei 'bơ̆t anăp inh, tơpang ti Kră Yang tih hloh tơ'bôh kơ inh.

²Inh lăng 'bôh nhen hơbŏ thoi bơngai, đơ̆ng kơiĕng tơ ala thoi ŭnh, păng đơ̆ng kơiĕng tơ kơpal hơdah rang mơnhal thoi kong đe pơiel.

³Sư yơ̆r kiơ noh thoi tơpang ti, rôp sŏk tơ kơpal kơ̆l inh. Yang Bơhngol pôk hơtŏk inh tŏk-bŏk teh hăm plĕnh, păng lăm tơdrong Kră Yang 'Bok Kei-Dei tơ'bôh sư ba inh mơ̆t tơ pơlei Jêrusalem tơ trong 'măng jang gah yă-nơ̆m kơ cham gah lăm, anih mă đe dan rup yang areh wă khan rup yang mă pơm kơ 'Bok Kei-Dei areh.

⁴Păng inh 'bôh tơdrong rang mơnhal Kră Yang 'Bok Kei-Dei Isơrael tơ noh thoi inh đei 'bôh tơ anih thŭng dơnă.

⁵Na Sư khan kơ inh: “Ơ kon bơngai, ngơk măt lăng tơ gah yă-nơ̆m.” Na inh ngơk măt lăng tơ gah yă-nơ̆m, to tơ gah yă-nơ̆m 'măng jang chơnang soi đei rup yang areh 'bơ̆t trong mơ̆t.

⁶Na Sư khan kơ inh dơ̆ng: “Ơ kon bơngai, ih hăm 'bôh dôm tơdrong lu sư oei pơm, lu tơdrong krưp kơnê̆ 'mê̆-'mach tih dêh mă adrĕch Isơrael pơm wă puh Inh ataih đơ̆ng anih rơgoh Inh? Tơpă ih gô 'bôh lơ tơdrong krưp kơnê̆ tih hloh dơ̆ng.”

⁷Na Sư ba inh tơ 'măng mơ̆t tơ cham, inh lăng 'bôh đei minh bơlôh tơ dur.

⁸Sư khan kơ inh: “Ơ kon bơngai, bŏk dur đei bơlôh noh bĕ.” Inh bŏk dur noh na 'bôh minh pôm 'măng mơ̆t tơ noh.

⁹Sư khan kơ inh: “Mơ̆t lăng bĕ lu tơdrong kơnê̆ krưp mă lu sư đei pơm tơ âu.”

¹⁰Na inh mơ̆t lăng 'bôh tơ noh đei tôm kơ rup man kon sem krưp, kơep lep-ler, dôm rup yang man đơ̆ng adrĕch Isơrael đei chhơ̆ jum dăr kơ tơnăr dur.

¹¹'Bơ̆t anăp rup inh 'bôh thoi đei tơpơh-jĭt 'nu kră pơlei adrĕch Isơrael oei dơ̆ng hơdai hăm Jaasania kon drŏ-nglo Saphan. Rim 'nu lu sư chĕp get pơgang 'bâu phu 'nhui pơgang 'bâu phu đông jơ̆p-jang.

¹²Sư khan kơ inh: “Ơ kon bơngai, ih hăm 'bôh tơdrong kơnê̆ lu kră pơlei adrĕch Isơrael pơm lăm măng mu ưh, rim 'nu lu sư lăm anih rup yang sư kơdih? Lu sư đei khan: ‘Kră Yang ưh kơ 'bôh lu bơ̆n ôh; Kră Yang achăng lê̆ boih teh đak âu.’ ”

¹³Sư khan dơ̆ng: “Ih gô 'bôh tơdrong krưp tih hloh phara kơ noh dơ̆ng mă lu sư oei pơm.”

¹⁴Na Sư chông ba inh mơ̆t tơ hnam Kră Yang, rok 'măng jang gah yă-nơ̆m; tơ noh Inh 'bôh lu drŏ-kăn nhơ̆m hmoi kơ Tamus.

¹⁵Sư khan kơ inh: “Ơ kon bơngai, hăm 'bôh ưh? Ih gô 'bôh tơdrong krưp tih hloh kơ tơdrong 'nâu dơ̆ng”

¹⁶Na, Kră Yang Sư ba inh mơ̆t tơ cham hnam Kră Yang; păng tơ noh trong mơ̆t tơ hnam kơkuh kơ Kră Yang, tŏk-bŏk kơdeng 'măng păng chơnang soi, inh 'bôh đei dang 'bar-jĭt pơđăm 'nu bơngai drŏ-nglo, rŏng tơwih kơ hnam Kră Yang păng muh măt lu sư tơwih gah hơlĕch, drap kơkuh kơ măt 'năr đơ̆ng hơlĕch.

¹⁷Sư khan kơ inh: “Ơ kon bơngai, ih hăm 'bôh ưh? Noh adrĕch Juđa oei đei pơm tơdrong yoch kơnê̆ krưp, hăm trŏ tơdrong iĕ dah liơ? Lu sư pơm tơdrong kơnê̆ 'bĕnh lăm teh đak âu, păng tơblĕk Inh ling-lang dơ̆ng. Âu, lăng bĕ lu sư tah 'long lăm trôm muh wă tơblĕk Inh!

¹⁸Na Inh kư̆m gô blĕk areh dêh; măt Inh pă lăng mơnat kơ lu sư boih, mă lu sư krao ôr 'bĕnh kơ đon Inh, Inh kư̆m ưh pă mơ̆ng lu sư.”