Read bahnar Ese 9 Bible Online

Ese 9 - bahnar bible

Ese 9

¹Inh kơtơ̆ng Kră Yang krao re 'bơ̆t đon inh khan kơ đe: “Năm jê̆ tơ âu bĕ lu iĕm mă wei-lăng pơlei, rim 'nu athei chĕp đao hơlă wă pơrăm đe.”

²Inh 'bôh đei tơdrâu 'nu năm đơ̆ng gah 'măng kơpal tơ gah yă-nơ̆m. Rim 'nu ti chĕp 'long tơnôn. Lăm lu sư đei minh 'nu bơngai hrŭk ao che 'bui se kok, bĕng ba kơdŭng 'long chih đak mơ̆k. Lu sư mơ̆t păng dơ̆ng 'bơ̆t cheng chơnang soi kong.

³Na tơdrong rang mơnhal Kră Yang 'Bok Kei-Dei Isơrael tŏk đơ̆ng chêrubim, đơ̆ng anih Sư oei, năm truh 'bơ̆t 'măng hnam akŭm. Na Kră Yang krao bơngai hrŭk ao che 'bui mă bĕng kơdŭng 'long chih đak mơ̆k,

⁴na khan kơ sư: “Năm bĕ tơ jơ̆p lăm pơlei Jêrusalem, chih 'bơ̆t klĕng rim 'nu bơngai bu nhơ̆m hmoi kơ tơdrong yoch kơnê̆ krưp mă đei pơm boih lăm pơlei.”

⁵Inh kơtơ̆ng Kră Yang khan kơ lu bơngai nai: “Athei năm kiơ̆ đơ̆ng rŏng bơngai noh, năm pơlôch jơ̆p pơlei, iĕm 'nĕ lăng mơnat.

⁶Athei pơlôch đĭ lu kră, lu hơmuh hơmŏng, lu hơdruh, lu hơ'lơ̆p, lu drŏ-kăn, mă-lei 'nĕ kơ pơlôch lu bơngai bu mă đei chih 'bơ̆t klĕng sư. Năm iŏk đơ̆ng Anih 'lơ̆ng rơgoh Inh.” Thoi noh lu sư pơtơm pơlôch iŏk đơ̆ng lu kră đơ̆ng 'bơ̆t anăp hnam akŭm.

⁷Kră Yang khan kơ lu sư: “Pơm bĕ kơ hnam akŭm jing 'mê̆-'mach. Tuh tơ cham hnam akŭm 'bĕnh kơ bơngai lôch. Năm bĕ!” Na lu sư lĕch năm pơlôch đe lăm pơlei.

⁸Kơplah lu sư năm pơlôch đe, inh oei minh 'nu. Inh bon muh măt tơ teh ôr krao: “Ơ Kră Yang Tih Hloh, Ih hil mĭl kơ pơlei Jêrusalem, Ih wă pơlôch đĭ lu kon pơlei Isơrael hă?”

⁹Kră Yang tơl inh: “Tơdrong yoch lăm adrĕch Isơrael păng Juđa tih dêh tơpă; teh 'bĕnh kơ pham pơlôch băl, lăm pơlei 'bĕnh kơ tơdrong kơnê̆ pơrăm băl. Lu sư khan: ‘Kră Yang achăng lê̆ boih teh âu, Kră Yang ưh kơ 'bôh.’

¹⁰Gah Inh, măt Inh lăng kư̆m pă mơnat păng Inh kư̆m pă đei lê̆ lu sư oei arih; Inh gô tuh tơ kơ̆l lu sư dôm tơdrong mă lu sư đei pơm.”

¹¹'Nâu bơngai hrŭk ao che 'bui, bĕng 'long chih đak mơ̆k, brŏk roi thoi âu: “Inh đei pơm kiơ̆ kơ nơ̆r Ih tơtă.”