Read bahnar Da 1 Bible Online

Da 1 - bahnar bible

Da 1

¹Sơnăm mă pêng lăm chăl Jêhôiakim, pơtao đe Juđa, na Nebukatnessar, pơtao Babilôn, năm truh tơ pơlei tih Jêrusalem wang wă blah iŏk.

²Kră Yang 'Bok Kei-Dei jao Jêhôiakim, pơtao đe Juđa păng đei tơmam đơ̆ng hnam Kră Yang 'Bok Kei-Dei lăm ti Nebukatnessar. Sư anhăk ba tơmam noh brŏk tơ dêh Babilôn, tơmơ̆t lăm rông yang sư păng 'măn lê̆ tơ lăm hnam mong tơmam ăn kơ yang sư kơdih.

³Pơtao pơkă kơ Aspenas, bơngai mă pơgơ̆r tơm lu linh krĕo, chă rơih iŏk lăm lu kon sâu Isơrael, lăm adrĕch pơtao păng lăm lu jang tih.

⁴Năm ba lu hơ'lơ̆p drŏ-nglo 'lơ̆ng huay kơ đei jĭ jăn, muh măt 'lơ̆ng hơbŏ, đei dôm tơdrong gơh hơgei, gơh tơchĕng hlôh wao, gơh băt dôm tơdrong, gơh jang tơ lăm anih hnam pơtao, bơtho kơ lu sư tơdrong gơh hơgei păng nơ̆r pơma bơngai Kalđê.

⁵Pơtao khan wă ăn kơ lu bơngai noh sŏng sa rim năr tơmam sŏng sa 'băt 'lơ̆ng mă pơtao sa păng tơdrô mă đơ̆ng pơtao huch, wă rong păng bơtho lu sư thoi noh lăm pêng sơnăm, na lu sư gô awih awăn 'bơ̆t anăp pơtao.

⁶Lăm lu buăl noh đei Đaniel, Hanania, Mêsael păng Asaria adrĕch adrung bơngai Juđa.

⁷Bơngai yŏng pơgơ̆r linh krĕo krao ming anăn lu sư; Đaniel sư krao Beltơsatsar, Hanania sư krao Sadrak; Mêsael sư krao Mêsak; păng Asaria krao sư Abetnigo.

⁸'Nâu, Đaniel pơkă lăm jơhngơ̆m sư khan, ưh kơ wă sŏng sa tơmam 'lơ̆ng păng tơdrô pơtao soi kơ yang jing pơm kơ inh kơnê̆, na apinh bơngai wei-lăng 'nĕ pơgŏ sư pơm yoch kơnê̆ noh.

⁹Kră Yang 'Bok Kei-Dei pơm ăn bơngai wei-lăng linh krĕo gơh mơnat ăn kơ Đaniel.

¹⁰Bơngai yŏng linh krĕo âu khan kơ Đaniel thoi âu: Inh hli kơ pơtao yŏng tơ'ngla inh, đei pơkă athei ăn kơ lu iĕm tơmam sa păng tơdrô huch, na kơnh pơtao 'bôh muh măt iĕm hơkĕ hloh kơ buăl 'lơ̆p nai, mă sơnăm 'lơ̆p 'lŏ iĕm hơdai, na lu iĕm gô năm ba kơ pơtao kăt hơko inh hă?

¹¹Đaniel khan kơ Hamensa bơngai wei-lăng linh krĕo mă kư̆m wei rong lu đe Đaniel, Hanania, Mêsael, Asaria thoi âu:

¹²Inh apinh ih pơlong lăng đĭch đam ih âu lăm mơjĭt năr, ăn kơ lu nhôn sŏng sa 'nhot. Păng nhă đak 'blăng hmă đĕch.

¹³Đơ̆ng rŏng ih gô pơting lăng muh măt lu nhôn hăm lu hơ'lơ̆p mă sŏng sa huch tơdrô, tơmam 'lơ̆ng đơ̆ng 'bok pơtao; đơ̆ng noh ih gô pơm, thoi nơ̆r ih đei pơma kơ lu đĭch đam ih.

¹⁴Hamensa chu kiơ̆ nơ̆r lu sư apinh păng pơlong lăng lu sư lăm mơjĭt năr.

¹⁵Tôm mơjĭt năr boih, lăng muh măt lu sư oei bek 'lơ̆ng hloh kơ lu hơ'lơ̆p nai mă đei sŏng sa tơmam sa 'lơ̆ng đơ̆ng pơtao.

¹⁶Thoi noh, Hamensa ming lê̆ tơmam sa 'lơ̆ng păng tơdrô đơ̆ng ăn kơ lu sư sa ră păng ăn kơ lu sư sa 'nhot.

¹⁷Đơ̆ng noh, Kră Yang 'Bok Kei-Dei ăn kơ puăn 'nu bơngai tơdăm noh đei kơ̆l 'ngok gơh hơgei lăm rim tơdrong lu sư hŏk pơhrăm. Đaniel kư̆m đei gơh băt tơblang tơdrong tơ'bôh păng tơdrong apo.

¹⁸Dĭng truh tơ pơtao pơkă wă tơ'bơ̆p lu sư, na yŏng linh krĕo ba lu sư truh tơ anăp pơtao Nebukatnessar.

¹⁹Pơtao pơma dơnuh păng lu sư păng lăm đĭ-đăng lu sư, đe bu gơh hơgei dang Đaniel, Hanania, Mêsael păng Asaria; Na lu sư gơh dơ̆ng bơ̆jang 'bơ̆t anăp pơtao.

²⁰Na pơtao apinh lu sư tôm tơdrong gah tơdrong gơh hơgei, na 'bôh lu sư gơh hơgei hloh kơ bơngai păng bơngai tơwir lăm jơ̆p kơ dêh char sư mơjĭt wơ̆t 'mơ̆i.

²¹Thoi ei, Đaniel oei hloi tơ noh dĭng truh tơ sơnăm blŭng-a lăm chăl pơtao Sirus.