Read bahnar Da 10 Bible Online

Da 10 - bahnar bible

Da 10

¹Lăm sơnăm mă pêng lăm chăl Sirus pơm pơtao dêh char Pherơsơ; đei minh tơdrong tơ'bôh ăn kơ Đaniel đe krao sư Beltơsatsar. Tơdrong tơ'bôh noh sĭt tơpă wă khan tơdrong tơblah tih. Đaniel hlôh kơ tơdrong noh păng băt kơ tơdrong tơ'bôh noh wă khan kiơ.

²Lăm lu năr noh, inh Đaniel, oei sơ'ngon lăm pêng 'măng giĕng.

³Inh ưh kơ sa tơmam 'lơ̆ng păng sik hơmu 'nhĕm kư̆m ưh kơ đei tah lăm 'bơ̆r inh păng inh kư̆m ưh kơ pik đak pơgang 'bâu phu dĭng đĭ pêng 'măng giĕng.

⁴Năr mă 'bar-jĭt puăn khei mônh, inh oei cheng glung tih Hideke.

⁵Inh bơyar măt inh păng lăng 'bôh, minh 'nu hrŭk ao che 'bui kok, tơ̆n tơlei tơ̆n păng maih rơgoh Upha.

⁶Akâu sư thoi jơmŏng; muh măt sư kư̆m thoi kơmlat păng măt sư thoi pla ŭnh; jơ̆ng, ti sư rang thoi mam kong păng nơ̆r pơma sư thoi nơ̆r tơpôl bơngai lơ.

⁷Inh, Đaniel, lăp minh 'nu inh đĕch lăng tơdrong tơ'bôh noh, yua kơ lu bơngai mă oei hơdai inh ưh kơ 'bôh ôh tơdrong tơ'bôh noh; mă-lei lu sư hli tơtơ̆ dêh, kơdâu ôn akâu lu sư.

⁸Thoi noh oei pă minh 'nu inh păng inh 'bôh tơdrong tơ'bôh tih noh na inh pă đei jơhngơ̆m hloi. Muh măt inh jing hơ'blă păng jing ưh kơ đei jơhngơ̆m dơ̆ng.

⁹Đơ̆ng noh inh kơtơ̆ng lu nơ̆r sư, lăp inh kơtơ̆ng inh pơ̆k kơmŭ brum muh măt inh tơ teh na tep hloi.

¹⁰Đơ̆ng noh đei tơpang ti pel inh, na inh iung hơtơ̆p kŭl-tăng, tơjră ti tơ teh.

¹¹Đơ̆ng noh, bơngai noh khan kơ inh thoi âu: Ơ Đaniel, bơngai mă Kră Yang 'Bok Kei-Dei 'mêm kơeng tơpă, ih athei băt hlôh bĕ nơ̆r mă inh đei pơma hăm ih. Kơplah đei bơngai pơma kơ inh nơ̆r ei, inh iung păng hli tơtơ̆.

¹²Đơ̆ng noh bơngai ei khan thoi âu; ơ Đaniel 'nĕ kơ hli; yua kơ đơ̆ng nơ̆r blŭng-a mă ih đei đon hlôh drap kơkuh 'bơ̆t anăp Kră Yang 'Bok Kei-Dei ih păng lu nơ̆r ih pơma kơ Kră Yang 'Bok Kei-Dei kơtơ̆ng boih, yua kơ lu nơ̆r ih noh na inh truh tơ âu.

¹³Mă-lei pơtao dêh char Pherơsơ găn inh lăm 'bar-jĭt mônh năr; mă-lei, 'nâu, Mikael mă minh lăm lu Linh jang Tih hloh, đei truh păng tơgŭm inh boih păng inh oei tơ noh hăm lu pơtao Pherơsơ.

¹⁴Dang ei inh truh tơ âu wă tơbăt kơ ih hlôh kơ tơdrong wă truh kơ kon pơlei ih lăm năr tôch kơnh; yua kơ tơdrong tơ'bôh 'nâu gô truh oei đunh năr đơ̆ng rŏng kơnh.

¹⁵Kơplah sư oei pơma hăm inh lu nơ̆r noh, inh kŭp kơ̆l tơ teh păng oei hreh.

¹⁶'Nâu, đei minh 'nu hơbŏ sư thoi tơdăm kon bơngai năm pel 'bơ̆r inh. Na 'bơ̆r inh ha pơma hăm yang mă dơ̆ng 'bơ̆t anăp inh thoi âu: Ơ yŏng inh, tơdrong truh dơ̆ng kơ inh yua kơ tơdrong tơ'bôh âu, na inh ưh pă đei jơhngơ̆m boih.

¹⁷Thoi yơ inh âu đĭch đam Ih, mă gơh pơma hăm ih yŏng tơ'ngla inh? Yua kơ gah inh, pă đei jơhngơ̆m pran boih lăm jơhngơ̆m inh păng kư̆m pă đei kial dui jơhngơ̆m boih!

¹⁸Dang ei inh đei 'bôh dơ̆ng bơngai mă hơbŏ thoi bơngai drŏ-nglo tơdăm năm tơ inh păng pơm kơ inh đei jơhngơ̆m pran dơ̆ng.

¹⁹Sư khan kơ inh thoi âu: Ơ bơngai mă Kră Yang 'Bok Kei-Dei 'mêm, 'nĕ kơ hli; hơpơi kơ ih đei tơdrong pŭn hiôk oei hăm ih. Pran kơtang bĕ! Tơpă, pran kơtang bĕ! Kơplah sư oei pơma hăm inh, na inh đei jơhngơ̆m pran, na inh khan: Ơ yŏng tơ'ngla, pơma bĕ, yua kơ ih đei pơm boih kơ inh jing pran.

²⁰Sư khan kơ inh thoi âu: Ih hăm băt yua kơ kiơ inh năm tơ ih? Pă 'biơ̆ inh brŏk wă tơblah hăm pơtao Pherơsơ păng kơplah inh năm, to pơtao Grĕk gô truh.

²¹Mă-lei inh khan kơ ih băt dôm tơdrong noh đei chih boih tơ lăm sơ̆p hla bơar tơdrong sĭt. Ưh kơ đei bu wă gơh dŏng tơgŭm inh tơblah hăm lu sư, 'nguaih kơ Mikael, yŏng lu iĕm.