Read bahnar Da 2 Bible Online

Da 2 - bahnar bible

Da 2

¹Tơdrong Hơ'mon Lăm sơnăm mă 'bar lăm chăl pơtao Nebukatnessar, pơtao đei apo 'bôh, na lăm jơhngơ̆m ưh kơsŭk dĭng mah pă đei tep.

²Thoi noh, na pơtao krao lu bơngai hơgei, lu pơjâu, lu bơngai Kalđê wă athei tơblang tơdrong pơtao đei apo 'bôh. Lu sư năm đĭ 'bơ̆t anăp 'Bok pơtao.

³Pơtao khan kơ lu sư thoi âu: Inh đei apo 'bôh minh tơdrong; Na jơhngơ̆m inh ưh kơsŭk, wă kơ băt tơdrong inh apo noh, wă khan thoi yơ.

⁴Mă-lei lu bơngai Kalđê pơma hăm pơtao hăm nơ̆r Aram thoi âu: Kơkuh kơ ih pơtao hơpơi ăn kơ ih arih sot! Apinh ih roi bĕ tơdrong apo noh kơ lu đĭch đam ih păng lu nhôn gô tơblang.

⁵Pơtao tơl lu bơngai noh thoi âu: Tơdrong noh lĕch hlôi đơ̆ng inh boih. Tơdah lu iĕm ưh kơ roi kơ inh băt tơdrong apo noh thoi yơ păng tơblang liơ, lei lu iĕm gô lôch sơ̆k akâu, hnam lu iĕm đe kư̆m gô pơrăm đĭ truh tơ hơnă.

⁶Mă-lei tơdah iĕm gơh tơblang tơdrong apo noh kơ inh, lei iĕm gô đei tơmam apah tih păng gô pôk pơang iĕm lăm anih ư-ang inh, lu iĕm athei tơblang ăn kơ inh tơdrong apo noh păng wă khan liơ.

⁷Lu sư wơ̆t apinh mă 'bar dơ̆ng thoi âu: Apinh pơtao roi ăn kơ lu nhôn đĭch đam ih păng lu nhôn gô tơblang.

⁸Pơtao khan: Inh băt lu iĕm chă đon wă pơhiơ̆, yua kơ lu iĕm băt boih tơdrong noh inh hiơt đĭ boih.

⁹Mă-lei tơdah lu iĕm ưh kơ gơh tơblang tơdrong apo noh kơ inh, na kư̆m lăp minh tơdrong pơm ăn kơ lu iĕm; yua kơ lu iĕm đei pơđâu băl boih hăm tơdrong hơlĕnh păng pơma kư̆ kă kơ inh, chang hơmĕng gô đei năr tơplih. Thoi noh, tơbăt bĕ tơdrong apo noh, wă kơ inh băt iĕm gơh tơblang trŏ dah ưh.

¹⁰Lu bơngai Kalđê khan dơ̆ng kơ pơtao thoi âu: Ưh kơ đei minh 'nu bơngai bu ala teh âu gơh tơblang ăn tơdrong ih apo noh; yua kơ ưh kơ đei pơtao ayơ păng yŏng mơng pơgơ̆r ayơ mă pơtă tơdrong thoi noh kơ lu bơngai pơjâu lăng sơnglŏng dah lu bơngai Kalđê tơblang.

¹¹Yua kơ tơdrong pơtao wă apinh noh khăi dêh păng ưh kơ đei bu gơh băt gơh tơblang tơdrong apo noh kơ 'bok pơtao, hli kơ lu yang đĕch gơh, yang mă ưh kơ oei arih hăm sĕch akar âu.

¹²Thoi noh na pơtao blĕk hil dêh, na athei đe rôp pơlôch đĭ lu bơngai hơgei lăm char Babilôn.

¹³Thoi noh na nơ̆r noh kư̆m athei lu bơngai jang kơ pơtao wă năm pơlôch lu bơngai hơgei, na kư̆m wă chă Đaniel hăm lu buăl sư hai wă pơlôch.

¹⁴Kơplah jơ noh Đaniel kiơ̆ kơ tơdrong gơh hơgei hlôh wao sư na khan kơ Ariok. Bơngai wei-lăng pơtao, bơngai mă năm wă pơlôch lu bơngai hơgei lăm char Babilôn.

¹⁵Đaniel khan kơ Ariok yŏng linh wei pơtao thoi âu: Yua kơ kiơ mă đei tơdrong hăt hot dêh đơ̆ng pơtao thoi noh? Ariok roi ăn kơ Đaniel băt hơđăl.

¹⁶Đaniel năm mơ̆t hloi, apinh pơtao ăn kơ sư hơya minh 'bar năr dơ̆ng wă kơ gơh tơblang tơdrong pơtao apo noh.

¹⁷Đơ̆ng noh, Đaniel brŏk tơ hnam păng roi dôm tơdrong noh kơ buăl sư Hanania, Misael păng Asaria.

¹⁸Sư apinh buăl sư krao khan hơpơi kơ Kră Yang 'Bok Kei-Dei mơnat kơ lu sư tơ'bôh ăn tơdrong hlơp noh, wă kơ Đaniel hăm lu buăl sư huay kơ đe pơlôch, hơdai hăm lu bơngai hơgei đe Babilôn.

¹⁹Thoi noh tơdrong hlơp noh tơ'bôh ăn kơ Đaniel 'bôh kơmăng; Đaniel bơnê kơ Kră Yang 'Bok Kei-Dei kơpal plĕnh.

²⁰Đơ̆ng noh, Đaniel pơih 'bơ̆r pơma khan: Kơkuh bơnê kơ Kră Yang 'Bok Kei-Dei ling-lang hlong hloi! Yua kơ tơdrong hơgei păng mơsêh lăm Sư.

²¹Đơ̆ng Sư boih mă tơplih khei 'năr, bơyan, pơjing pơdơ̆ng pơtao păng ăn tơdrong gơh hơgei hlôh wao kơ lu bơngai hơgei păng ăn tơdrong hlôh băt kơ lu bơngai hơdah.

²²Đơ̆ng Sư boih mă tơbăt dôm tơdrong jrŭ ataih mă hlơp: Sư băt tôm tơdrong. Tơ lăm măng mu păng tơdrong hơdah oei lăm Sư.

²³Ơ Kră Yang 'Bok Kei-Dei inh! Inh bơnê păng ư-ang kơ Ih, yua kơ đơ̆ng Ih ăn kơ inh tơdrong hlôh wao gơh hơgei păng tơdrong mơsêh dang ei, Ih ăn boih kơ inh jing băt kơ tơdrong mă lu nhôn krao khan apinh, na roi tơbăt ăn kơ nhôn băt kơ tơdrong pơtao apo.

²⁴Thoi noh na Đaniel năm tơ hnam Ariok bơngai mă pơtao athei sư năm pơlôch lu bơngai hơgei lăm Babilôn; păng kư̆m khan kơ sư thoi âu: 'Nĕ pơlôch lu bơngai hơgei Babilôn mă-lei apinh ih năm ba inh 'bơ̆t anăp pơtao na inh gô tơblang ăn tơdrong pơtao apo noh.

²⁵Đơ̆ng noh Ariok hăt hot hloi năm ba Đaniel tơ pơtao păng khan kơ pơtao thoi âu: Inh đei chă 'bôh minh 'nu lăm lu kon sâu Juđa mă bơ̆n rôp pơm bơnă, bơngai noh gô tơblang tơbăt ăn kơ ih pơtao.

²⁶Pơtao khan kơ Đaniel, mă đe juăt kơ krao sư Beltơsatsar thoi âu: Hăm trŏ ưh ih gơh tơblang ăn kơ inh apo 'bôh noh, wă tơblang thoi yơ?

²⁷Đaniel dơ̆ng 'bơ̆t anăp pơtao drơ̆ng thoi âu: Tơdrong hlơp mă pơtao wă kơ băt, na mă dôm lu bơngai hơgei lu bơngai hlôh wao, lu pơjâu tă ưh kơ đei bu gơh tơblang ăn kơ ih băt ôh.

²⁸Mă-lei minh 'nu Kră Yang 'Bok Kei-Dei oei tơ kơpal plĕnh gô tơbăt ăn tơdrong hlơp; păng tơbăt hloi kơ pơtao Nebukatnessar băt tơdrong wă truh tơ anăp âu kơnh, lăm năr wă tôch thoi âu: Tơdrong ih apo păng đei 'bôh kơplah ih 'bĭch kơpal giơng noh.

²⁹Ơ pơtao kơplah ih 'bĭch kơpal giơng đei tơdrong ih tơchĕng ning-mônh gô đei tơdrong truh, thoi noh yang mă đei tơbăt tơdrong hlơp kơ pơtao 'bôh noh gô truh.

³⁰Gah inh, tơdrong mă hlơp noh đei tơ'bôh boih kơ inh, ưh kơ sĭ kơ đơ̆ng inh gơh hơgei hloh kơ bơngai nai ôh lăm lu bơngai mă oei arih; mă-lei wă roi tơbăt ăn kơ pơtao 'bôh nhen păng ăn kơ pơtao băt mă lăm đon tơchĕng.

³¹Ơ pơtao, pơtao lăng păng âu, đei minh pôm rup man tih. Rup man noh tih păng hlĭch chrơp; dơ̆ng 'bơ̆t anăp pơtao păng rup hơbŏ krưp tơpă.

³²Kơ̆l rup âu man hăm maih rơgoh, kơtơh hăm ti sư man hăm hu; klak hăm blu sư man păng kong;

³³tơkong man păng bơsei păng tơpang jơ̆ng minh puăt man păng bơsei minh puăt păng lơ̆n.

³⁴Pơtao oei lăng pơglăn tơ rup man noh dĭng truh tơ đei minh pôm tơmo ưh kơ trŏ đơ̆ng ti kon bơngai klơ̆m, năm hơtat tơ tơpang jơ̆ng mă man păng bơsei hăm teh lơ̆n noh păng jơ̆ng noh pơchah đĭ.

³⁵Đang kơ noh lu maih, hu, kong bơsei păng lơ̆n kư̆m pơchah đĭ, jing thoi hla đuih hla đăm, thoi hơnong 'ba đông tơ anih pơjuă 'ba bơyan phang, tơ'bơ̆p kial dơhlu pơđông đĭ, chă lăng sư pă đei 'bôh dơ̆ng, mă-lei tơmo đêl hơtat kơ tơpang jơ̆ng noh jing minh pôm kông tih păng 'bĕnh tơ jơ̆p teh đak.

³⁶Noh boih tơdrong ih apo 'bôh. Dang ei lu nhôn gô tơblang ăn 'bơ̆t anăp ih.

³⁷Ơ pơtao, pơtao kơ lu pơtao, yua kơ Kră Yang 'Bok Kei-Dei kơpal plĕnh đei ăn boih teh đak, gơh kĕ pran kơtang păng tơdrong ư-ang kơ pơtao.

³⁸Kră Yang 'Bok Kei-Dei đei ăn boih tơ lăm ti pơtao dôm lu adrĕch kon bơngai, lu kon sem brem, lu sem păr, tơ jơ̆p-jang anih mă khan lu sư oei tơ yơ, Sư kư̆m đei ăn pơtao pơgơ̆r đĭ-đăng; thoi noh kơ̆l pơm hăm maih noh ih boih.

³⁹Mă-lei đơ̆ng rŏng kơ ih, gô đei minh pôm char nai, iung blah tơrăn 'biơ̆ kơ dêh char pơtao ih; đơ̆ng noh đei dơ̆ng dêh char mă pêng, wă khan kong gô pơgơ̆r jơ̆p kơ teh đak.

⁴⁰Đei dơ̆ng dêh char mă puăn pran thoi bơsei yua kơ bơsei gô pơm pơchah kơ dôm tơmam, thoi noh dêh noh gô pơm kơ đe pơchah đĭ hĕch hoch thoi bơsei pơm kơ tơmam noh.

⁴¹Bê̆ gah ih đei 'bôh tơpang hơnglâu jơ̆ng minh puăt hăm bơsei minh puăt hăm teh lơ̆n, noh wă khan minh pôm char gô klaih asong; mă-lei lăm dêh char gô đei dêh char mơ'nah pran thoi bơsei, kiơ̆ thoi ih đei 'bôh bơsei hrâu hăm teh lơ̆n.

⁴²Lu hơnglâu jơ̆ng minh puăt hăm bơsei minh puăt hăm lơ̆n.

⁴³Ih đei 'bôh bơsei hrâu hăm lơ̆n dêh noh kư̆m đei minh puăt dêh char pran dêh char tơrăn, noh lu sư tơhrâu băl adrĕch kon bơngai; mă-lei sư ưh kơ đei tơklep băl, kư̆m thoi bơsei ưh kơ tơklep hăm lơ̆n.

⁴⁴Lăm chăl lu pơtao 'nâu Kră Yang 'Bok Kei-Dei kơpal plĕnh gô pơdŏng minh pôm dêh char ưh kơ đei layơ hiong răm, tơdrong dêh char noh pơgơ̆r ưh kơ đei minh adrĕch kon pơlei nai, kĕ tơgar iŏk, na sư iung pơrăm pơlôch đĭ lu dêh char mă đei adrol sơ̆ noh, na kơdih sư gô kơjăp ling-lang hloi.

⁴⁵Kŭm thoi ih đei 'bôh tơmo tơphĕ đơ̆ng kông, ưh kơ đei ti bu klơ̆m, hơtŭt pơchah kơ bơsei, kong, teh lơ̆n, hu păng maih. Kră Yang 'Bok Kei-Dei đei ăn boih kơ ih đei 'bôh tơdrong gô truh tơ anăp âu kơnh. Tơdrong apo âu sĭt păng nơ̆r tơblang âu 'blep trŏ tơpă.

⁴⁶Đơ̆ng noh pơtao Nebukatnessar drap, kơkuh kơ Đaniel păng athei pơyơ̆r ăn tơmam apah păng pơgang 'bâu phu ăn kơ Đaniel.

⁴⁷Đang kơ noh pơtao pơih nơ̆r pơma hăm Đaniel thoi âu: Sĭt tơpă boih, Kră Yang 'Bok Kei-Dei iĕm jơ̆ Yang kơ lu yang păng yŏng kơ lu pơtao, đơ̆ng Sư tơbăt ăn tơdrong hlơp, yua kơ ih đei tơblang boih mă ưh kơ đei bu băt âu.

⁴⁸Pơtao pôk ăn Đaniel pơm tih păng pơjao ăn kơ sư tơmam mă gĭt dêh. Pơtao ăn kơ sư pơgơ̆r đĭ lăm char Babilôn.

⁴⁹Đaniel apinh pơtao, thoi noh pơtao kư̆m ăn kơ Sadrak, Mêsak păng Abetnigo jang pơm tih lăm char Babilôn, mă-lei Đaniel oei jang kơtă lăm hnam pơtao.