Read bahnar Da 3 Bible Online

Da 3 - bahnar bible

Da 3

¹Pơtao Nebukatnessar man minh pôm rup hăm maih, kơjung tơdrâu-jĭt hơgăt păng tih sư tơdrâu hơgăt; man pơdơ̆ng tơ lăm thŭng glă Dura, lăm char Babilôn.

²Đơ̆ng noh, pơtao Nebukatnessar krao athei lu kuan tih, 'bok pơgơ̆r linh bơ̆jang lăm hnam pơtao, lu yŏng pơgơ̆r lăm tơring. Yŏng wei tơmam, yŏng wei jên, lu 'bok sek tơlang păng krao đĭ lu yŏng pơgơ̆r lăm char Babilôn, pơih blŭng-a wă kơkuh kơ rup man mă pơtao man noh.

³Thoi noh, na lu yŏng kuan tih, yŏng pơgơ̆r linh, yŏng wei jên, lu yŏng bơ̆jang lăm hnam pơtao, yŏng pơgơ̆r tơring kư̆m truh đĭ tơ noh wă akŭm pơih blŭng-a wă kơkuh kơ rup man ei mă đơ̆ng pơtao athei đe man keh boih; đĭ-đăng lu sư dơ̆ng 'bơ̆t anăp tơklă rup man mă pơtao đei man noh.

⁴'Bơ̆t ei na đei minh 'nu bơngai bơ̆jang pơih pơma, pơma 'bơ̆r re roi tơbăt khan: Đĭ kon pơlei đĭ dêh char, đĭ nơ̆r pơma 'nâu nơ̆r pơkă athei iĕm.

⁵Tơdah iĕm kơtơ̆ng keng, brŏ, tơgiĕp, 'lal, lillul đe hlôm re, lei lu iĕm athei drap bon kơkuh kơ rup man mă pơtao pơdơ̆ng âu:

⁶Lu đe bu mă ưh kơ drap kơkuh, đe gô klơ̆m lê̆ sư tơ lăm ŭnh kơdơ̆r to.

⁷Thoi noh, na mưh lu kon tơring kơtơ̆ng keng, brŏ, tơgiĕp, 'lal re, đĭ-đăng teh đak, rim kơ nơ̆r pơma, drap đĭ wă kơkuh kơ rup man mă pơtao Nebukatnessar đei pơm noh.

⁸Kơplah noh dôm lu bơngai hơgeia năm jê̆ răp lăng wă kêng lu bơngai Juđa.

⁹Thoi noh lu đe ei ôr năm roi kơ pơtao Nebukatnessar thoi âu: Ơ pơtao, hơpơi kơ ih đei arih ling-lang!

¹⁰Ơ pơtao ih boih pơkă, bơngai bu kơtơ̆ng keng, brŏ, 'lal re, athei đĭ-đăng kon bơngai drap kơkuh kơ rup man păng maih noh.

¹¹Păng lu đe bu mă ưh kơ drap kơkuh kơ rup man noh, đe gô klơ̆m lê̆ sư tơ lăm ŭnh kơdơ̆r.

¹²Na tơ âu đei lu bơngai Juđa mă 'bok pơtao đei pôk ăn kơ lu sư pơm tih pơgơ̆r tơring Babilôn, noh jơ̆ Sadrak, Mêsak, Abetnigo; ơ pơtao lu đe noh ưh kơ hli yom kơ ih tŏ sĕt hloi. Lu sư ưh kơ wă kơkuh kơ yang ih ôh, lu sư kư̆m ưh kơ wă kơkuh kơ rup man hăm maih mă đơ̆ng ih man noh mơ̆n.

¹³Thoi noh pơtao Nebukatnessar 'brik blĕk hil, athei đe chông Sadrak, Mêsak, Abetnigo năm tơ sư, na đe năm ba lu đe ei truh 'bơ̆t anăp pơtao.

¹⁴Pơtao Nebukatnessar pơma khan kơ lu sư thoi âu: Ơ Sadrak, Mêsak, Abetnigo hăm trŏ kơ lu iĕm kuă kơkuh kơ yang inh păng kư̆m kuă kơkuh kơ rup yang mă inh 'nao man păng maih noh hei hă?

¹⁵Na dang ei, dah iĕm kơtơ̆ng jơwa keng, brŏ, 'lal păng đĭ lu tơmam reh, na iĕm athei drap bon tơ teh wă kơkuh kơ rup yang mă inh đei man, lei huay mă-lei dah iĕm ưh kơ drap bon kơkuh, jơ noh hloi boih đe gô klơ̆m lu iĕm tơ lăm ŭnh kơdơ̆r to. Na yang kiơ gơh pơklaih iĕm đơ̆ng ti inh?

¹⁶Sadrak, Mêsak, Abetnigo tơl pơtao thoi âu: Ơ pơtao Nebukatnessar, gah tơdrong noh, ưh kơ kăl kơ nhôn roi kơ ih.

¹⁷'Nâu ơ pơtao! Kră Yang 'Bok Kei-Dei mă lu nhôn oei bơ̆jang, Sư gô dŏng pơklaih lu nhôn klaih đơ̆ng ŭnh kơdơ̆r noh. Păng sĭt gô pơklaih lu nhôn đơ̆ng ti ih.

¹⁸Mă ưh, ơ pơtao, apinh ih athei băt lu nhôn ưh kơ wă kơkuh dah bơ̆jang kơ yang ih păng kư̆m ưh kơkuh ôh kơ rup yang mă ih 'nao man hăm maih noh.

¹⁹Đơ̆ng noh pơtao Nebukatnessar rai blĕk muh măt sư đum rak hil kơ Sadrak, Mêsak, Abetnigo păng krao đe rŭk ŭnh mă dêh tŏ hloh dang tơpơh wơ̆t kơ adrol hei.

²⁰Wơh lu bơngai pran kơtang, lăm khŭl linh sư năm rôp chô̆ Sadrak, Mêsak, Abetnigo, na athei năm klơ̆m hơtat lăm ŭnh kơdơ̆r noh.

²¹Đe hơloh rôp chô̆ hloi pêng 'nu tơdăm noh, chô̆ hơbĭ hăm hơbĕn ao, mă ao tai 'nguaih hai na klơ̆m lu sư tơ lăm ŭnh kơdơ̆r noh.

²²Đơ̆ng noh pơtao athei gơnhĕk dêh, mă ŭnh noh kư̆m tŏ hloh tơpă, na lu bơngai klơ̆m Sadrak, Mêsak, Abetnigo, noh ŭnh dơhlông sa lu sư kư̆m lôch đĭ.

²³Gah lu pêng 'nu lu tơdăm, Sadrak, Mêsak, Abetnigo klơ̆m lu sư tơ lăm ŭnh kơdơ̆r noh akâu lu sư oei chô̆ đĕch.

²⁴Dang ei, pơtao Nebukatnessar 'bôh hlĭch tơpă, na iung hăt hot, pơma kơ yŏng wang pơđâu thoi âu: Dôm lu bơngai mă inh đei athei đe chô̆ păng klơ̆m tơ lăm ŭnh kơdơ̆r hăm trŏ kơ pêng 'nu đĕch? Lu sư tơl pơtao khan: Ơ pơtao trŏ boih.

²⁵Pơtao khan dơ̆ng: 'Nâu inh 'bôh đei puăn 'nu bơngai ưh kơ đei chô̆, yak năm lăm ŭnh, mă-lei ŭnh ưh kơ sa; păng bơngai mă puăn noh hơbŏ thoi minh 'nu kon tơdăm yang.

²⁶Đơ̆ng noh pơtao Nebukatnessar năm nger tơ jê̆ 'măng ŭnh kơdơ̆r noh, krao: Ơ Sadrak, Mêsak, Abetnigo jơ̆ đĭch đam Kră Yang 'Bok Kei-Dei Tih hloh, lĕch păng năm tơ âu bĕ! Sadrak, Mêsak, Abetnigo lĕch đơ̆ng lăm ŭnh noh.

²⁷Lu yŏng tơring, lu yŏng linh păng đĭ lu bơngai pơgơ̆r. Lu bơngai jang kơ pơtao akŭm băl, lăng 'bôh ŭnh ưh kơ đei pơrăm akâu jăn pêng 'nu tơdăm noh ôh. Lu sư, ŭnh kư̆m ưh kơ đei sa dah hur minh găr sŏk sop lu sư, dah hơbĕn ao lu sư hơya tŏ sĕt păng akâu jăn lu sư kư̆m ưh kơ đei 'bâu khet đêl ŭnh hur.

²⁸Pơtao Nebukatnessar pơma khan dơ̆ng thoi âu: Trŏ bơnê kơkuh tơpă kơ Kră Yang 'Bok Kei-Dei Sadrak, Mêsak, Abetnigo, Sư đei wơh boih Linh jang 'lơ̆ng Sư păng dŏng pơklaih lu đĭch đam Sư, mă gơnang kơ Sư lu sư ưh kơ pơm kiơ̆ kơ pơtao păng jao akâu jăn, wă huay kơ bơ̆jang dah kơkuh kơ yang nai 'nguaih kơ 'Bok Kei-Dei lu sư.

²⁹Thoi noh inh ăn nơ̆r tơtă âu: Mă khan kon pơlei ayơ, dêh char ayơ, nơ̆r pơma kiơ, dah đei bu pơma kơnê̆ kơ Kră Yang 'Bok Kei-Dei Sadrak, Mêsak, Abetnigo gô koh pơhĕch sư, hnam dơnŏ noh kư̆m gô jing mơ̆r kơ teh, yua kơ ưh kơ đei yang kiơ mă gơh dŏng pơklaih thoi 'nâu.

³⁰Pơtao pôk ăn kơ Sadrak, Mêsak, Abetnigo pơm yŏng pơgơ̆r lăm tơring Babilôn