Read bahnar Da 4 Bible Online

Da 4 - bahnar bible

Da 4

¹Pơtao Nebukatnessar roi tơbăt ăn kơ đĭ-đăng kon pơlei, lu dêh char, rim nơ̆r pơma, oei tơ jơ̆p kơpal teh thoi âu: Hơpơi kơ iĕm đei hiôk-hian rai dêh!

²Tơdrong hiôk inh na inh wă roi tơbăt ăn kơ lu iĕm, dôm tơdra hlĭch păng tơdrong chrơp mă Kră Yang 'Bok Kei-Dei Tih hloh đei pơm ăn kơ inh.

³Ô! Dôm tơdrong mơsêh Sư tơdrong hlĭch chrơp Sư tih dêh tơpă, dêh char Sư jơ̆ dêh char oei oei ling-lang, tơdrong Sư pơgơ̆r oei oei rim jơhnơr.

⁴Inh Nebukatnessar, oei pơdơh hiôk lăm hnam inh păng rai ư-ang lăm hnam pơtao inh.

⁵Inh đei apo 'bôh pơm kơ inh hli tơtăm; dôm tơdrong inh tơchĕng 'bơ̆t inh oei kơpal giơng păng dôm kơ̆l 'ngok inh 'bôh pơm kơ inh hơwơ̆l hơwang.

⁶Thoi noh inh chih roi tơbăt, athei ba đĭ-đăng lu bơngai hơgei lăm char Babilôn năm truh tơ inh, wă kơ lu sư tơblang tơdrong inh apo 'bôh.

⁷Dang ei lu bơngai pơm tih lu bơngai Kalđê păng lu pơjâu truh đĭ, inh roi ăn đĭ-đăng tơdrong inh apo 'bôh kơ lu sư, mă-lei lu sư ưh kơ đei bu gơh tơblang ăn kơ inh.

⁸Đơ̆ng rŏng, đei Đaniel, đe anăn sư Beltơsatsar kiơ̆ kơ anăn yang inh, sư đei mơsêh đơ̆ng lu yang nai, thoi noh năm dơ̆ng 'bơ̆t anăp inh. Inh roi dôm tơdrong inh apo 'bôh noh thoi âu:

⁹Ơ Beltơsatsar, ih pơm yŏng đĭ kơ lu bơngai hơgei, inh băt đei yang 'lơ̆ng oei lăm ih păng ưh kơ đei tơdrong kiơ mă hlơp mă tơnat kơ ih, thoi ei boih na apinh ih tơblang ăn kơ inh tơdrong inh apo 'bôh păng tơblang kơ inh bĕ.

¹⁰'Nâu mă dôm tơdrong inh đei 'bôh tơ lăm kơ̆l inh kơplah inh oei 'bĭch kơpal giơng. Inh pơglăn lăng na 'nâu, tơ lăm teh âu đei tơm 'long tih hlĭch tơpă.

¹¹'Long noh rai tih rai kơjăp; kơnhŏng wĕch sư hơtŭt kơ plĕnh păng mă đe oei tôch kơ teh kư̆m oei tơmang 'bôh sư.

¹²Hla sư 'lơ̆ng plei sư trem, đĭ-đăng kon sem gơh sa plei sư, lu sem bri ngôi tơ ala yơ̆p sư, lu sem păr kôp tơ dơng sư păng lu kon bơngai sĕch akar oei arih đơ̆ng sư.

¹³Inh lăng lu tơdrong lăm kơ̆l 'ngok inh 'bôh, kơplah inh oei 'bĭch kơpal giơng păng âu, inh đei 'bôh minh 'nu yang 'lơ̆ng rơgoh wei-lăng tơnơm 'long noh sư jur đơ̆ng plĕnh.

¹⁴Sư ôr krao thoi âu: Kăl 'long noh bĕ păng chơ̆ng lê̆ dơng sư, pơm kơ hla sư hơlŭng bĕ păng săi hŭt lê̆ plei sư; puh tơweh bĕ lu sem bri đơ̆ng tơm sư păng puh sem păr weh đơ̆ng dơng sư!

¹⁵Mă-lei, athei lê̆ rơh hăm tơm sư tơ lăm teh, na chô̆ sư hăm glang bơsei păng glang kong, tơ anih tơmăn 'nhĕt hơdrih lăm mir, ăn kơ tŭk jur pơm kơ sư hơiuh đĭ, ăn kơ sư hăm lu sem bri oei hơdai 'nhĕt ala teh âu.

¹⁶Tơplih lê̆ bĕ jơhngơ̆m đon sư, gô ăn kơ sư jơhngơ̆m kon sem brem; păng dĭng truh tơpơh sơnăm.

¹⁷Tơdrong hơgăt noh đơ̆ng lu yŏng mă wei-lăng pơkă păng nơ̆r lu bơngai 'lơ̆ng rơgoh đei roi tơbăt, wă kơ lu bơngai oei arih băt kơ Kră Yang 'Bok Kei-Dei Tih hloh pơgơ̆r lăm teh đak kon bơngai; Sư wă ăn kơ bu mơ̆ng kơ Sư wă păng gô tơiung lu bơngai răm-'băm tơ anih pơgơ̆r noh.

¹⁸Inh âu pơtao Nebukatnessar, đei apo 'bôh boih tơdrong noh. Thoi noh, Beltơsatsar, ih athei tơblang kơ inh, yua kơ đĭ-đăng bơngai hơgei lăm dêh char bơ̆n ưh kơ đei bơngai bu gơh tơblang ăn kơ inh; mă-lei ih gơh tơblang, yua kơ Yang 'lơ̆ng rơgoh oei tơ lăm ih.

¹⁹Dang ei, Đaniel, mă krao Beltơsatsar, jing kơmlo wă đunh păng dôm tơdrong tơchĕng pơm ăn kơ sư hơwơ̆l. Pơtao khan dơ̆ng: Ơ! Beltơsatsar 'nĕ ăn tơdrong apo âu păng tơdrong tơblang pơm kơ ih hơwơ̆l, Beltơsatsar khan thoi âu: Ơ yŏng tơ'ngla, thŭ tơdrong apo noh tuh ăn kơ lu bơngai areh kơ ih păng tơdrong tơblang tuh kơ bơngai ayăt kơ ih.

²⁰Tơnơm 'long mă ih đei 'bôh noh, gô jing pran păng tih, kơjăp kơnhŏng wĕch hơtŭt kơ plĕnh păng jơ̆p kơ teh đak tơmang 'bôh.

²¹Hla sư 'lơ̆ng tơpă păng plei sư trem đei tôm mah kơ lu sem brem sa, lu sem bri ngôi tơ ala yơ̆p sư păng lu sem păr gô pơm tơpu tơ lăm dơng sư.

²²Ơ pơtao, noh jơ̆ ih boih, ih pran kơtang tơdrong ih pơgơ̆r rai kơjung truh tơ plĕnh, tơdrong kĕ ih gom tơ jơ̆p lăm teh đak.

²³Gah tơdrong mă ih đei 'bôh minh 'nu Yang 'lơ̆ng rơgoh jur đơ̆ng plĕnh bơwei păng khan: Kăl păng chơ̆ng pơrăm lê̆ bĕ! Mă-lei athei 'măn lê̆ rơh păng tơm sư tơ lăm teh, dơng noh chô̆ bĕ sư hăm glang bơsei păng glang kong, tơ lăm tơmăn glă mir chŭn, lê̆ sư hngôm hơiuh kơ đak ngom jur đơ̆ng plĕnh; păng ăn kơ sư oei hơdai lu sem bri tơ tơmăn dĭng truh tơ tơpơh sơnăm.

²⁴Ơ pơtao, 'nâu boih nơ̆r tơblang păng 'nâu kư̆m nơ̆r pơsĭt đơ̆ng Kră Yang 'Bok Kei-Dei Tih hloh, truh boih tơ ih yŏng inh.

²⁵Đe gô pơpuh lê̆ ih đơ̆ng lăm kon bơngai păng ih gô oei hơdai hăm kon sem brem tơ bri, ih gô sa 'nhĕt thoi rơmo păng akâu jăn ih tŭk gô gom hơiuh đĭ-đăng truh tơpơh sơnăm, dĭng mă truh tơ ih 'blŏk băt kơ Kră Yang 'Bok Kei-Dei Tih hloh pơgơ̆r lăm teh đak kon bơngai păng Sư ăn kơ bu mơ̆ng kơ Sư wă.

²⁶Bê̆ tơdrong đei khan boih 'măn lê̆ tơm hăm rơh 'long 'noh, wă khan dang yơ ih băt kơ Kră Yang 'Bok Kei-Dei Tih hloh pơgơ̆r teh đak kon bơngai kơplah noh tơdrong pơgơ̆r gô tơwih kơ ih.

²⁷Thoi noh! Ơ Pơtao, apinh ih mơ̆ng nơ̆r inh bơtho khan kơ ih; iŏk bĕ tơdrong tơpăt na huai iŏk đơ̆ng yoch, 'mêm bĕ kơ lu bơngai dơnuh hin wă huai iŏk đơ̆ng dôm tơdrong kơnê̆ ih pơm. Thoi noh tơdrong hiôk-hian ih gô oei đei đunh năr.

²⁸Đĭ-đăng tơdrong noh tă truh kơ pơtao Nebukatnessar ngăl.

²⁹Hlôi kơ mơjĭt-'bar khei, kơplah pơtao yak nơnăm rok cham hnam pơtao Babilôn.

³⁰Na sư khan: 'Nâu ưh kơ trŏ hă pơlei tih Babilôn mă đei pơdơ̆ng đơ̆ng tơdrong pran inh, wă pơm pơlei tơm lăm chăl pơtao inh păng wă pơư pơang 'lơ̆ng rŏ kơ inh.

³¹Nơ̆r pơma tam mă tôch, na đei hloi nơ̆r đơ̆ng plĕnh ti khan thoi âu: Ơ pơtao Nebukatnessar, đei tơbăt kơ ih boih: Anih pơtao pă đei tơ ih boih.

³²Đe gô tơweh lê̆ ih đơ̆ng kon bơngai, ih gô oei hơdai lu sem brem; kư̆m sa 'nhĕt thoi rơmo, dĭng truh tơpơh sơnăm, dĭng mă ih 'blŏk băt thoi âu: Kră Yang 'Bok Kei-Dei Tih hloh pơgơ̆r teh đak kon bơngai păng Sư wă ăn kơ bu mơ̆ng kơ Sư wă.

³³Kơplah lăm jơ noh, nơ̆r pơma noh đei trŏ sĭt kơ pơtao Nebukatnessar, pơtao mă đe gô puh tơweh đơ̆ng kon bơngai; sa 'nhĕt thoi rơmo; akâu jăn pơtao gô hơiuh kơ đak ngom jur đơ̆ng plĕnh, dĭng truh sŏk kơ̆l sư chăt thoi sŏk sem kring, tơngiơh sư kư̆m thoi tơngiơh sem brem.

³⁴Dĭng truh tôch kơ năr đêl pơkă, inh âu, Nebukatnessar inh ngoi muh măt tơ plĕnh, tơdrong hơgei đei dơ̆ng tơ inh păng inh pơư pơang anăn Kră Yang 'Bok Kei-Dei Tih hloh. Inh gô pơư pơang anăn Kră Yang 'Bok Kei-Dei mă arih ling-lang, dêh char Sư oei đei đơ̆ng chăl âu truh tơ chăl nai.

³⁵Đĭ-đăng lu kon pơlei jing nhen hoh-hoy, Kră Yang 'Bok Kei-Dei pơm kơ lu khei sơnglŏng tơ plĕnh ti mơ̆ng kơ Sư wă păng pơm kơ kon pơlei oei kơpal teh, ưh kơ đei bu gơh găn ti Sư păng apinh thoi âu: Kră Yang 'Bok Kei-Dei pơm kiơ thoi noh?

³⁶Kơplah noh tơdrong hơgei đei dơ̆ng tơ lăm inh, inh đei ư-ang lăm dêh char pơtao inh, tơdrong krưp rŏ hơdah hơdong tơ inh dơ̆ng; dôm lu yŏng pơgơ̆r lu pơm tih gô năm kơkuh kơ inh. Đe gô pôk inh pơm pơtao dêh char păng tơdrong inh pơgơ̆r rai pran kơjăp.

³⁷Dang ei inh, Nebukatnessar, bơnê kơkuh kơ Kră Yang 'Bok Kei-Dei Pơtao rang mơnhal kơpal plĕnh; dôm tơdrong jang Sư tă kơ sĭt tơpă, lu trong gơlong Sư tơpăt; păng bơngai bu mă yak lăm trong pơang, Kră Yang 'Bok Kei-Dei gô tơjur lê̆ sư.