Read bahnar Hos 10 Bible Online

Hos 10 - bahnar bible

Hos 10

¹Bơngai Isơrael sơ̆ thoi minh tơnơm hơmu hơdrih 'lơ̆ng, plei sư trem. Lăp plei sư rai trem lơ, lu sư kư̆m pơdơ̆ng chơnang soi rai lơ; kiơ̆ thoi lu sư chăt rai lơ rai mơdrŏng lăm char sư, lu sư pơm rup yang rai lơ thoi noh mơ̆n.

²Jơhngơ̆m lu sư jing tơklah 'bar, na dang ei lu sư gô pŭ tơdrong pơmat yua kơ tơdrong yoch lu sư Kră Yang gô teh tơlơ̆ lê̆ chơnang soi, păng gô pơrăm lê̆ rup yang lu sư.

³Tơpă lu sư gô khan: Lu bơ̆n ưh kơ đei pơtao yua kơ lu bơ̆n ưh kơ hli yom kơ Kră Yang; mă đei pơtao sư gơh tơgŭm kơ lu bơ̆n kiơ?

⁴Lu sư chă pơma pơkă pơkăm hơlĕnh lăm nơ̆r pơgơ̆p, Thoi noh tơdrong lu sư. Jing thoi 'nhĕt kơnê̆ hơkăm chăt rok trong đêl choh lăm chŭn.

⁵Lu kon pơlei oei lăm char Kon pơlei Samari hli, yua kơ rup yang kon rơmo Bêt Awen hiong boih, kon pơlei ơh sơ'ngon yua rup yang noh, păng lu 'bok soi kư̆m nhơ̆m ơh 'mêm kơ rup kon rơmo 'lơ̆ng rŏ noh, yua kơ rup yang noh ưh pă đei boih.

⁶Sĭt tơpă đe gô tung ba rup 'noh tơ char Asiri pơm tơmam thuê̆ pơyơ̆r ăn kơ pơtao tơm Jarep. Lu bơngai Êphraim kơdơ̆, lu bơngai Isơrael gô mơlâu kơdih akâu.

⁷Char Samari gô hiong hơdai hăm pơtao sư hiong hach thoi blôk kơpal đak.

⁸Lu anih kơjung tơ Awen, wă khan anih đei tơdrong yoch lu bơngai Isơrael, đe gô pơrăm đĭ, 'long jơla, păng jơla bơmrôm gô chăt hro tơ kơpal chơnang soi lu sư. Kơplah noh lu sư gô khan kơ kông: Klơ̆p lê̆ nhôn bĕ păng khan kơ lu groi. Gom đơ̆p lê̆ lu nhôn bĕ!

⁹Ơ Isơrael, lu iĕm pơm yoch boih đơ̆ng năr iĕm pơm kơnê̆ tơ pơlei Gibêah! Lu iĕm oei pơm yoch ngăl, Hăm trŏ tơdrong tơblah tih hăm lu kon bơngai yoch kơnê̆ tơ pơlei Gibêah gô truh tơ iĕm?

¹⁰Layơ Inh wă, Inh gô phak pơjĭ lu sư; păng lu dêh đe gô iung blah phak lu sư, yua kơ lu sư đei pơm yoch 'bar hơtăl.

¹¹Êphraim thoi minh pôm kon rơmo adruh đĭ pơjuăt boih, wă pơjuă 'ba; mă-lei Inh gô dan 'long ăt tơ kơpal hơko bek 'lơ̆ng sư. Inh gô ăn kơ đe hao kơpal hơko Êphraim; na Juđa gô rơuơ păng Jakôp gô preh pơhĕch teh kơ sư kơdih.

¹²Rei bĕ lu iĕm kơdih hăm tơdrong 'lơ̆ng tơpăt, yuă iŏk bĕ plei đơ̆ng tơdrong 'mêm sĭt, choh bĕ teh lu iĕm mă lê̆ bri! Truh boih jơ chă Kră Yang, dĭng truh tơ Sư ăn jur tơdrong tơpăt thoi đak 'mi tơ lu iĕm.

¹³Lu iĕm choh rơuơ boih tơdrong kơnê̆, lu iĕm yuă iŏk boih tơdrong kơnê̆ boih, lu iĕm sa plei đơ̆ng tơdrong hơlĕnh pơdăr. Yua kơ lu iĕm gơnang boih kơ trong lu iĕm kơdih, păng lu linh pran kơtang lu iĕm.

¹⁴Tơdrong tơblah tơblŭng ơ-ôs ơ-as gô pơm kơ kon pơlei iĕm, đe gô pơrăm dôm lu pơlei kơđông kơjăp lu iĕm, thoi Salman pơrăm pơlei Bêt Arbel lăm năr tơblah băl. Mă đe đei teh pơlôch mĕ hơdai hăm lu kon sư.

¹⁵Ơ Bethel đe kư̆m gô pơm kơ lu iĕm thoi noh, yua kơ tơdrong yoch kơnê̆ lu iĕm tih dêh. Đe gô pơlôch Pơtao Isơrael lăp 'brưch hơdah til pơgê lăm năr noh kơnh.