Read bahnar Hos 12 Bible Online

Hos 12 - bahnar bible

Hos 12

¹Êphraim 'me sư kơdih hăm kial, kơdâu kiơ̆ kial đơ̆ng gah hơlĕch rim năr, lu sư pơma hơlĕnh roi dêh păng pơm rai lơ tơdrong kơnê̆; lu sư pơgơ̆p hăm char Asiri păng chĕp ba đak rơmă ôliwơ tơ char Êyiptơ.

²Kră Yang kư̆m đei pơma chrih kơ adrĕch Juđa, păng Sư gô phak Jakôp kiơ̆ thoi kơ trong sư yak năm; Kră Yang gô pơm tơwih kơ lu sư kiơ̆ thoi tơdrong lu sư pơm.

³Oei lăm klak mĕ sư, Jakôp rôp kơnơl jơ̆ng 'nhŏng sư; păng truh tơ 'lŏ tơ̆l, sư tơglơ̆m hăm Kră Yang 'Bok Kei-Dei.

⁴Sư đei tơglơ̆m hăm linh jang 'lơ̆ng, păng jei sư; sư nhơ̆m păng krao hơdrĭ apinh Kră Yang mơnat ăn. Sư tơ'bơ̆p boih Kră Yang tơ pơlei Bethel păng tơ noh Kră Yang đei bơtho sư.

⁵Noh jơ̆ Kră Yang 'Bok Kei-Dei Tih Hloh; anăn mă đe ư-ang sư boih Kră Yang.

⁶Wih brŏk bĕ tơ Kră Yang 'Bok Kei-Dei, 'mêm mơnat păng oei pơm tơdrong tơpăt, păng chang gô bĕ Kră Yang 'Bok Kei-Dei iĕm ling-lang.

⁷Lu bơngai Isơrael thoi bơngai mơdro chĕp 'long kŏng hơlĕnh lăm ti sư, sư 'maih chă sa pơgâm đe.

⁸Lu bơngai Êphraim pơang akâu kơdih khan: Sĭt tơpă Inh jing bơngai mơdrŏng, inh đei mŭk lơ. Lăm đĭ dôm tơdrong jang mă Inh pơm ưh kơ đe 'bôh minh tơdrong jang kiơ khan yoch kơnê̆.

⁹Mă-lei Inh boih Kră Yang 'Bok Kei-Dei lu iĕm đơ̆ng năr iĕm lĕch đơ̆ng dêh char Êyiptơ; Inh gô ăn kơ lu iĕm oei tơ lăm bơsŭn dơ̆ng kư̆m thoi lăm năr pơm hơmet sŏng sa tih sơ̆.

¹⁰Inh kư̆m đei khan boih kơ lu bơngai khan lê̆ adrol; Inh boih đei ăn thim tơdrong tơ'bôh, păng Inh kư̆m đei ăn lu bơngai khan lê̆ adrol pơtruh nơ̆r pơtih gia đơ̆ng Inh.

¹¹Gileat kơnê̆ tơpă, lu sư ưh kơ yua kiơ. Lu sư pơm yang hăm rơmo tơno tơ Gilgal. Chơnang soi lu sư gô jing pôi tơmo tơ lăm trong đêl choh lăm mir.

¹²Jakôp kơdâu tơ char Aram, tơ noh Isơrael jang gleh wă kơ đei akăn, yua kơ wă kơ đei akăn, na sư wei triu.

¹³Kră Yang yua minh 'nu 'bok khan lê̆ adrol chông anhăk Isơrael lĕch boih đơ̆ng char Êyiptơ, păng yua minh 'nu 'bok khan lê̆ adrol wei-lăng sư.

¹⁴Êphraim tơ tơblĕk Inh blĕk Inh. Yua kơ thoi noh Kră Yang lu sư gô pơm tơwih kơ lu sư pŭ iŏk pham lĕch yua kơ dôm tơdrong kơnê̆ dêh lu sư pơm păng gô pơdrâu ăn tơdrong mơlâu kơ lu sư.