Read bahnar Hos 4 Bible Online

Hos 4 - bahnar bible

Hos 4

¹“Ơ lu kon sâu Isơrael, mơ̆ng bĕ nơ̆r Kră Yang khan yua kơ Kră Yang đei jô̆ hil boih kơ kon bơngai mă oei lăm teh đak âu. Ưh kơ đei bu tơpăt, ưh kơ đei bu băt 'mêm mơnat, păng ưh kơ đei bu băt hlôh kơ Kră Yang 'Bok Kei-Dei.

²Lăm noh pôm băt kơ pơm tơdrong hơlĕnh pơdăr, plêl, pơlôch băl, tơtông klĕ păng pơm pơyô kư̆ kă; lu sư pơm lơ tơdrong kơnê̆, pơlôch băl rai dêh pơm plơ̆ pham 'mong pham.

³Yua kơ thoi noh na lăm char âu đei ơh sơ'ngon, lu bơngai oei lăm noh rơmơ̆n rơmok, lu sem brem, lu sem păr kư̆m lei-lăi, ka lăm đak dơsĭ kư̆m lôch.

⁴Yua kơ thoi noh, iĕm 'nĕ tơ jô̆ băl, 'nĕ kơ tơchrih băl, 'nĕ kơ tơjâu băl ôh, Mă-lei Inh jô̆ iĕm yoch Ơ 'bok soi.

⁵Ih gô kơtơih kơ năr, kơmăng gah 'bok khan lê̆ adrol kư̆m gô kơtơih pơ̆k hăm ih păng Inh gô pơlôch mĕ ih.

⁶Kon pơlei Inh răm boih yua kơ lu sư ưh kơ hlôh wao. Yua kơ ih sơngah boih kơ tơdrong băt hlôh, Inh kư̆m lei-lăi gô sơngah kơ ih na ih ưh pă jing bơngai khan lê̆ adrol dơ̆ng. Yua kơ ih hiơt boih tơdrong juăt Inh Kră Yang 'Bok Kei-Dei ih, kư̆m lei-lăi thoi noh mơ̆n Inh kư̆m gô hiơt kơ kon sâu ih.

⁷Lu sư hrôh rai lơ dang yơ, lu sư kư̆m pơm yoch hăm Inh dang noh. Inh gô tơplih tơdrong ư-ang lu sư jing tơdrong mơlâu.

⁸Lu sư 'me rong lu sư kơdih hăm tơdrong yoch kon pơlei Inh, lu sư hưch ham kơ tơmam sa đơ̆ng tơdrong kơnê̆ kon pơlei Inh pơm.

⁹'Bok soi jing thoi yơ Kon pơlei pơla Inh kư̆m jing thoi noh, Inh gô phak pơbral lu sư, kiơ̆ thoi trong lu sư pơm, păng kư̆m tơwih pơdrâu kơ lu sư thoi tơdrong jang đêl lu sư pơm.

¹⁰Lu sư gô sŏng sa mă-lei ưh kơ phĭ. Lu sư gô pơm pơyô kư̆ kă mă-lei ưh pă đei hơ'lơ̆p; yua kơ lu sư achăng lê̆ boih Kră Yang, thoi noh 'maih pơm pơyô kư̆ kă.

¹¹Sik hơmu so păng sik hơmu 'nao pơm tơhiong lê̆ tơdrong hơgei lu sư.

¹²Kon pơlei Inh apinh yang rup pơm păng 'long, na 'long jra gô tơl lu sư; yua kơ jơhngơ̆m 'maih pơm kư̆ kă jing pơm kơ lu sư achăng lê̆ Kră Yang 'Bok Kei-Dei lu sư 'maih wă pơm pơyô kư̆ kă.

¹³Lu sư pơm yang kơpal kông, păng soh 'long 'bâu phu tơ kơpal groi, tơ ala tơm 'long kôih, 'long hơngo, 'long têrebin yua kơ đei yơ̆p rơngơp dêh. Yua kơ thoi noh na lu kon adruh lu iĕm pơm pơyô kư̆ kă, păng mŏ mai iĕm tơtông pơyô hăm đe nai.

¹⁴Inh ưh kơ phak lu kon adruh iĕm yua kơ yoch pơm pơyô, kư̆m ưh kơ phak lu mŏ mai iĕm yua kơ yoch ngôi hăm đe nai; yua kơ lu drŏ-nglo iĕm kư̆m ngôi kư̆ kă hăm lu drŏ-kăn đi, păng pơyơ̆r tơmam soi hăm lu bơngai drŏ-kăn kư̆ kă. Thoi noh lu kon pơlei ưh kơ hlôh gô hiong răm.

¹⁵Ơ bơngai Isơrael, ih pơm pơyô kư̆ kă dêh, ơ bơngai Juđa kơchăng bĕ 'nĕ kơ pơm yoch thoi sư, 'nĕ kơ mơ̆t tơ anih Gilgal, kư̆m 'nĕ tŏk tơ pơlei Bêt Awen; 'nĕ pơkă hiap kơdih akâu khan. Tơpă mă thoi Kră Yang arih.

¹⁶Lu bơngai Isơrael kơchu thoi rơmo akăn kơchu, na thoi yơ Kră Yang wă 'me rong lu sư thoi kon triu lăm tơmăn 'nhĕt să.

¹⁷Lu bơngai Êphraim, pơgơ̆p hơdai rup yang, lê̆ măk ai sư.

¹⁸Wă sik lu sư đĭ boih, lu sư oei pơm pơyô kư̆ kă; lu kră pơgơ̆r lu sư lăp đon pơm tơdrong mơlâu.

¹⁹Tơdrong thoi kial yua pơnăr sư gom lê̆ lu sư boih, lu sư gô mơlâu dêh kơ tơdrong lu sư pơm yang.