Read bahnar Hos 8 Bible Online

Hos 8 - bahnar bible

Hos 8

¹Dan bĕ tơgiĕp 'bơ̆t 'bơ̆r ih! Lu ayăt thoi sem grơ̆ năm blah bơngai Kră Yang, yua kơ kon pơlei pơm glăi boih kơ đêl nơ̆r pơgơ̆p, păng pơm yoch kơ tơdrong juăt Inh.

²Lu sư gô ôr krao Inh: ‘Ơ Kră Yang 'Bok Kei-Dei nhôn, lu nhôn kon Isơrael băt kơnăl kơ ih!’

³Mă-lei lu bơngai Isơrael sơngah boih kơ tơdrong 'lơ̆ng, na lu ayăt gô druh lu sư.

⁴Lu sư pôk boih pơtao kơdih mă ưh kơ trŏ đơ̆ng Inh, lu sư kư̆m rơih iŏk lu bơngai pơgơ̆r mă-lei kư̆m ưh kơ đei pơdrơ̆ng inh. Lu sư iŏk jên hu, maih lu sư man boih rup yang jing tơdrong pơrăm blơ̆ lu sư kơdih.

⁵Ơ Samari, Inh hŭt lê̆ boih rup kon rơmo ih; Inh hil mĭl blah boih lu sư; ưh kơ băt đunh dang yơ lu sư gô chă tơdrong 'lơ̆ng rơgoh.

⁶Rup kon rơmo noh đơ̆ng minh 'nu bơngai Isơrael pơm; noh ưh kơ Kră Yang 'Bok Kei-Dei ôh. Sĭt, rup kon rơmo lu bơngai Samari đe gô teh pơchah đĭ.

⁷Yua kơ lu sư rei boih kial, lu sư gô yuă iŏk hơbŭt tih; tơm 'ba lu sư oei dơ̆ng, mă-lei pă đei hnông, 'ba lu sư ưh pă đei găr pă jing phe; mă khan đei găr ră mă-lei lu bơngai tơmoi gô luăn sa đĭ.

⁸Đe luăn sa bơngai Isơrael boih, dang ei lu sư oei tŏk-bŏk hăm kon bơngai thoi pơnhan tơmam ưh kơ gĭt.

⁹Lu sư tŏk boih tơ dêh Asiri, thoi minh pôm aseh iĕ bri chă hoang hơdrô̆; lu bơngai Êphraim tĕch lu sư boih tơ lu bơngai pơm pơyô kư̆ kă mă lu sư hưch.

¹⁰Mă khan lu sư tĕch boih lu sư kơdih kơ adrĕch adrung bơngai nai, mă-lei Inh oei akŭm lu sư; păng lu sư rai huach yua kơ đơ̆ng pơtao kơtang pơjuă pơđep lu sư.

¹¹Yua kơ Êphraim pơm rai đei lơ chơnang soi huai đơ̆ng yoch; na đơ̆ng dôm chơnang soi noh tơhuŏng lu sư lăm tơdrong yoch.

¹²Inh đei chih ăn boih tơdrong juăt Inh lơ, mă-lei lu sư lăng thoi tơdrong mă lu sư ưh kơ hlôh.

¹³Mă khan lu sư soi pơyơ̆r kơ Inh, păng sa sĕch 'nhĕm noh, Kră Yang ưh kơ hiôk ôh kơ lu sư. Na Kră Yang 'blŏk kơ tơdrong kơnê̆ đêl lu sư pơm, păng gô phak pơjĭ lu sư yua kơ tơdrong yoch lu sư pơm; lu sư gô wih brŏk tơ dêh Êyiptơ.

¹⁴Lu bơngai Isơrael hiơt boih kơ Tơ'ngla pơjing lu sư, păng đei pơdơ̆ng lu hnam pơtao, Juđa kư̆m đei thim lơ pơlei tih đei dur kơjăp, mă-lei Inh gô ăn ŭnh truh sa tơ pơlei tih, păng ŭnh 'noh soh chhông sa lu kơđông kơjăp lu sư.