Read bahnar Joe 2 Bible Online

Joe 2 - bahnar bible

Joe 2

¹Hlôm bĕ keng tơ lăm pơlei Siôn, hlôm tơgiĕp krao bĕ wă kơ đe kơchăng tơ kông rơgoh Inh! Đĭ-đăng kon pơlei hli tơtơ̆ bĕ, yua kơ wă jê̆ truh năr Kră Yang wă phak. Tơpă năr Kră Yang wă jê̆ truh.

²Wă khan năr măng klăm măng mu gueo, năr hơmơ̆l găm păng tŭk hơ'bơ̆l gom kông. Đei minh adrĕch adrung tih păng pran kơtang truh thoi hơdah pơgê hrôih pơchrang jơ̆p kơpal kông. Đơ̆ng sơ̆ tam biơh đei, mă truh tơ ning-mônh kư̆m ưh kơ đei lu adrĕch bơngai thoi lu sư noh.

³Ŭnh sa tơ anăp lu sư, đei ŭnh sa tơ rŏng lu sư, đei pla ŭnh sa pơgoh. Adrol kơ sư teh đak âu thoi pơgar Êđen, truh đơ̆ng rŏng kơ sư weh teh đak noh jing juơ juŏ, păng ưh kơ đei kiơ gơh klĕnh đơ̆ng lu sư ôh.

⁴Đe 'bôh lu sư hơbŏ thoi lu aseh, păng lu sư kơdâu thoi bơngai hao aseh năm tơblah.

⁵Lu sư pơplŏng truh tơ wĕch kông, thoi noh kơtơ̆ng thoi re gre aseh, kơtơ̆ng thoi pla ŭnh sa hơnong 'ba; noh thoi minh khŭl linh tih pran kơtang, săp pơrĕng wă năm tơblah.

⁶Kơplah 'bôh lu sư, kon pơlei tă kơ ơh sơ'ngon, đĭ-đăng tă kơ hli ngăl hơ'brơ̆p hơ'brônh, kơ muh măt.

⁷Lu sư kơdâu tơpăt anăp thoi bơngai năm tơblah pran; lu sư hao dur pơlei thoi lu linh tơblah; rim 'nu lu sư năm tơ anăp, lu sư năm ưh kơ đei weh ôh đơ̆ng trong khŭl sư.

⁸Lu sư yak năm huay kơ hơtŭt băl, yak kiơ̆ tơklă anăp kơdih kơdih, lu sư kơdâu rok trong anih đei tak hơlă ưh kơ đei lê̆ trong sư kơdih.

⁹Lu sư yak trong tơklă pơlei tih, kơdâu rok kơpal dur, mơ̆t tơ lăm hnam, mơ̆t trong 'măng-'mŏk thoi lu đe tơtông.

¹⁰Teh đak tơdrŏ 'bơ̆t anăp lu sư, plĕnh kư̆m pơpơ̆, măt 'năr măt khei jing măng mu, lu sơnglŏng ưh pă pơchrang hơdah dơ̆ng.

¹¹Kră Yang pơma re thoi grơ̆m glaih 'bơ̆t anăp lu linh Sư; lu linh Sư lơ dêh, ưh kơ gơh jô̆. Lu linh pơm kiơ̆ pơsĭt nơ̆r Sư, tơtă jing pran kơtang. Tơpă năr Kră Yang wă phak tih dêh păng hli krưp, bu kĕ dơ̆ng lăm năr noh?

¹²Mă-lei Kră Yang khan: “Dang ei iĕm athei wih brŏk tơ Inh, hăm đĭ jơhngơ̆m lu iĕm, hăm tơdrong ơ̆t por, hăm tơdrong ơh sơ'ngon nhơ̆m hmoi.

¹³Hek bĕ jơhngơ̆m lu iĕm, 'nĕ kơ hek hơbĕn ao lu iĕm.” Wih brŏk bĕ tơ Kră Yang 'Bok Kei-Dei lu iĕm, yua kơ Sư iơ̆m dim, păng băt mơnat hiơ̆ kơ hil, păng 'bĕnh kơ tơdrong 'mêm mơnat, păng Sư băt tơplih huay pă pơrăm.

¹⁴Bu băt lê̆ adrol, rŏ lăng sư gô tơplih tơdrong tơchĕng, oei lê̆ pŭn hiôk kơ bơ̆n, wă khan ăn kơ bơ̆n oei gơh soi pơyơ̆r phe 'ba păng pơyơ̆r tơmam soi huch sa ăn kơ Kră Yang 'Bok Kei-Dei lu bơ̆n.

¹⁵Hlôm bĕ keng lăm pơlei Siôn; athei hơmet pơkă ơ̆t kơ sŏng sa, krao akŭm tơpôl lơ!

¹⁶Krao akŭm bĕ kon pơlei pơla, pơm rơgoh bĕ lu khŭl bơngai akŭm. Athei krao lu kră pơlei năm tơ noh, athei akŭm lu hơ'lơ̆p, păng lu nge mă oei mŏm! Ăn klo hle sư lĕch bĕ đơ̆ng anih 'bĭch sư, păng ăn akăn hơlai 'nao sư lĕch bĕ đơ̆ng anih sư.

¹⁷Lu 'bok soi mă bơ̆jang kơ Kră Yang, nhơ̆m bĕ 'bơ̆t kơđeng cheng truh tơ chơnang soi, păng khan bĕ thoi âu: “Ơ Kră Yang, apinh Ih 'mêm mơnat kơ kon pơlei pơla Ih, păng 'nĕ ăn lu bơngai dêh đe pơ'brơh kơ kon pơlei pơla Ih, păng 'nĕ ăn kơ đe pơma khan thoi âu: ‘Tơ yơ Kră Yang 'Bok Kei-Dei lu sư?’ ”

¹⁸Na Kră Yang gar teh đak Sư păng 'mêm mơnat kơ kon pơlei pơla Sư.

¹⁹Kră Yang đei tơl tơwih kơ kon pơlei Sư: 'Nâu Inh gô ăn kơ iĕm 'ba, sik 'nao, đak rơmă, iĕm gô phĭ jơnap. Inh pă ăn kơ lu iĕm mơlâu kơ đe dơ̆ng tơ lăm lu kon pơlei đe.

²⁰Inh gô puh tơweh lu sư mă đơ̆ng gah yă-nơ̆m weh ataih đơ̆ng lu iĕm, păng puh tơmơ̆t lu sư tơ lăm teh hrĕng kro, păng tơ bri brah, puh lê̆ lu sư mă yak adrol huŏng tơ lăm đak dơsĭ gah hơlĕch, păng lu linh đơ̆ng rŏng huŏng tơ lăm dơsĭ gah bơmơ̆t. 'Bâu ôm păng 'bâu khach lu sư yuh đông jơ̆p-jang, yua kơ Kră Yang đei pơm boih tơdrong mơsêh tih.

²¹Ơ teh đak, 'nĕ kơ hli ôh, chơt hiôk 'nă hal bĕ, yua kơ Kră Yang đei pơm boih tơdrong mơsêh tih.

²²Ơ lu kon sem brem lăm bri brah, 'nĕ pă hli, yua kơ 'nhĕt lăm bri noh bluh tơmơ̆ng boih, 'long đei plei, tơm 'long hơra đei plei păng tơm hơmu plei trem ngăl boih.

²³Ơ lu kon pơlei Siôn, chơt hiôk bĕ 'nă hal bĕ lăm Kră Yang 'Bok Kei-Dei lu iĕm, yua kơ Sư ăn tơdrong tơpăt jur thoi 'mi jruh lăm bơyan, ăn 'mi hrôih lăm bơyan blŭng-a păng ăn 'mi klui lăm bơyan tuch-luch thoi adrol sơ̆.

²⁴Dôm lu anih preh 'ba gô 'bĕnh kơ 'ba. Dôm lu kơthŭng gô blai kơ sik hơmu păng 'bĕnh kơ đak rơmă ôliwơ.

²⁵Inh gô mong ăn kơ lu iĕm đêl dôm sơnăm đĭ kơ lu lep sa, lu lep tih, lep 'ba, lep iĕ lep tung-nut khŭl linh Inh lơ mă Inh đei wơh truh tơ iĕm.

²⁶Lu iĕm gô phĭ jơnap sŏng sa rơkah rơkai, na lu iĕm gô bơnê ư-ang kơ Anăn Inh Kră Yang 'Bok Kei-Dei iĕm, Tơ'ngla mă đei ăn kơ lu iĕm dôm tơdrong hlĭch chrơp. Đơ̆ng âu tơ anăp kon pơlei Inh đe ưh pă wă pơjăm dơ̆ng.

²⁷Kơplah noh lu iĕm gô băt kơ Inh oei hơdai hăm lu iĕm bơngai Isơrael, băt kơ Inh jing Kră Yang 'Bok Kei-Dei lu iĕm, ưh kơ đei bu nai; Đơ̆ng âu tơ anăp kon pơlei Inh đe huay pă pơ'brơh dơ̆ng.

²⁸Năr ei kơnh Inh gô tuh ăn Yang Bơhngol 'Lơ̆ng Inh kơ đĭ-đăng kon bơngai. Lu kon drŏ-nglo kon drŏ-kăn gô pơma khan lê̆ adrol; dôm lu kră iĕm gô hơpo 'bôh, păng dôm lu kon hơ'lơ̆p iĕm gô 'bôh tơdrong tơ'bôh đơ̆ng Kră Yang.

²⁹Lăm năr noh mă dôm lu đĭch đam drŏ-nglo drŏ-kăn, Inh kư̆m gô tuh ăn Yang Bơhngol 'Lơ̆ng Inh.

³⁰Inh gô tơ'bôh ăn dôm tơdrong hlĭch chrơp tơ kơpal plĕnh ti păng kơpal teh đak âu, noh wă khan ŭnh, pham, păng lu jrăng 'nhui ŭnh.

³¹Măt 'năr gô măng mu, măt khei gô jing thoi pham, adrol kơ năr krưp tih Kră Yang truh.

³²Na bu krao hơpơi kơ Kră Yang gô klaih, Kră Yang đei khan, tơ kông Siôn păng lăm pơlei Jêrusalem, gô đei lu bơngai kơdâu ôn klaih bơih, lu bơngai mă Kră Yang gô krao iŏk.