Read bahnar Am 3 Bible Online

Am 3 - bahnar bible

Am 3

¹Ơ lu kon sâu Isơrael, mơ̆ng bĕ nơ̆r âu, 'nâu boih nơ̆r đơ̆ng Kră Yang khan wă blah lu iĕm, wă tơblah hăm đĭ-đăng lu adrĕch adrung mă inh đei chông anhăk đơ̆ng dêh Êyiptơ.

²Lăp minh adrĕch adrung lu iĕm đĕch lăm teh đak âu Inh băt lei na inh gô bơtho pơjĭ yua kơ tơdrong kơnê̆ iĕm pơm.

³Tơdah 'bar 'nu ưh kơ lăp đon băl, lei bre sư hăm gơh yak minh pôm trong?

⁴Hăm trŏ dăm-brang ôr lăm bri, tơdah sư ưh kơ đei rôp sa sem kiơ? Dah dăm-brang ưh kơ đei rôp sa kiơ hăm trŏ sư ôr đơ̆ng lăm trôm anih sư.

⁵Sem păr tơdah ưh kơ đei hơđong đăk tơ teh wă rôp sư, na sư hăm 'leh ưh? Tơdah hơ'năk ưh kơ đei 'leh kiơ hơnhuăl noh hăm gơh tơgloh đơ̆ng teh ưh?

⁶Dah đe hlôm keng lăm pơlei tih, hăm trŏ lu kon pơlei hli? Tơdah Kră Yang ưh kơ đei pơm lei hăm đei tơdrong truh kơ pơlei noh ưh?

⁷Kŭm thoi noh Kră Yang ưh kơ đei pơm minh tơdrong kiơ, tơdah sư ưh tam mă tơbăt lê̆ adrol tơdrong hlơp kơ lu đĭch đam sư, lu bơngai khan lê̆ adrol.

⁸Kơplah dăm-brang ôr grĕnh, hăm đei bu mă ưh kơ hli? Dah Kră Yang bơtho khan boih hăm đei bu ưh kơ khan lê̆ adrol?

⁹Roi tơbăt bĕ tơ lăm lu kơđông kơjăp Asdôt păng tơ lăm lu kơđông kơjăp lăm dêh Êyiptơ: Lu iĕm akŭm băl bĕ tơ kơpal kông lăm char Samari; lăng bĕ đei tơdrong rŭng răng tih tơ noh păng đei tơdrong pơm kơnê̆ băl.

¹⁰Kră Yang khan: Lu sư ưh kơ băt pơm tơdrong tơpăt; lu sư tah mong tơmam tơtông tơgar lăm kơđông kơjăp lu sư.

¹¹Thoi noh na Kră Yang khan: Lu ayăt gô wang tăp dăr kơ dêh char âu; sư tơpăk lê̆ dur iĕm păng pơrăm tơgar iŏk đĭ dôm lu kơđông kơjăp iĕm.

¹²Kră Yang khan: Thoi lu bơngai wei triu dui pơdŭng iŏk 'bar pah jơ̆ng dah minh pah đon đơ̆ng 'bơ̆r dăm-brang, na lu kon sâu Isơrael kư̆m lei-lăi, lu bơngai mă hơ-oei tơ kơpal giơng tơ dêh Samari păng kơpal 'bi lơ̆k tơ pơlei Đamas, kư̆m gô gơh dŏng pơklaih thoi noh.

¹³Kră Yang, 'Bok Kei-Dei Tih hloh khan: Mơ̆ng bĕ păng roi tơbăt wă tơblah hăm adrĕch adrung Jakôp.

¹⁴Lăm năr mă inh wă phak Isơrael yua kơ tơdrong yoch lu sư; Inh gô pơrăm lu chơnang soi tơ pơlei Bethel, dôm lu hơke chơnang soi inh gô chơ̆ng tơhuŏng lê̆ tơ teh.

¹⁵Năr ei kơnh inh gô teh pơrăm hnam bơyan puih păng hnam bơyan phang, lu hnam pơm hăm bơla rôih păng dôm lu hnam tih gô răm đĭ, Kră Yang khan thoi noh.