Read bahnar Am 5 Bible Online

Am 5 - bahnar bible

Am 5

¹Ơ adrĕch Isơrael, mơ̆ng bĕ nơ̆r 'nâu, jơ̆ nơ̆r nhơ̆m hmoi yua kơ lu iĕm.

²Ơ bơngai adruh hơlai Isơrael pơ̆k huŏng boih, ưh pă kĕ iung dơ̆ng, sư noh đe klơ̆m lê̆ boih tơ teh, ưh kơ đei bu tơiung sư.

³Yua kơ Kră Yang khan: Pơlei ayơ năm minh-rơbâu 'nu linh, oei pă minh-hrĕng 'nu, pơlei ayơ năm minh-hrĕng 'nu, oei pă mơjĭt 'nu lăm adrĕch Isơrael klaih.

⁴Kră Yang khan kơ adrĕch Isơrael: Chă bĕ inh na lu iĕm gô arih.

⁵Lê̆ pă chă pơlei Bethel, 'nĕ pă mơ̆t lăm pơlei Gilgal, dah 'nĕ pă năm rok trong pơlei Bêrsêba. Yua kơ pơlei Gilgal đe gô puh pơm bơnă đĭ, pơlei Bethel gô jing minh anih pơchah pơchek.

⁶Chơchă bĕ Kră Yang, na lu iĕm gô arih; tơdah ưh Kră Yang gô phak adrĕch Jôsep păng pơlei Bethel, thoi ŭnh sa ưh kơ đei bu kĕ pĭt.

⁷Lu iĕm, tơplih tơdrong tơpăt na iŏk tơm 'long tăng păng klơ̆m lê̆ tơdrong 'lơ̆ng tơpăt tơ teh.

⁸Chơchă bĕ Tơ'ngla pơjing kơ sơnglŏng hơdrŭng iĕr păng sơnglŏng gŭt-'năk, na tơplih măng mu jing hơdah, 'năr jing măng, Tơ'ngla krao đak đơ̆ng lăm dơsĭ na tuh kơpal teh. Anăn Sư Kră Yang.

⁹Noh boih Kră Yang Tơ'ngla mă pơm kơ lu bơngai pran kơtang 'bôh 'băi lôch răm hloi, tơdrong pơrăm dĭng mah truh tơ lăm kơđông.

¹⁰Lu sư areh kơ lu bơngai ngăl chrih kơ lu sư tơ 'măng jang pơlei păng ưh kơ iă kơ lu bơngai pơma tơpăt.

¹¹Yua kơ lu iĕm pơjuă lu bơngai dơnuh răm păng pơgŏ lu sư rai ăn 'ba mi, mă khan lu iĕm đei pơm boih lu hnam man păng tơmo iĕm kư̆m ưh kơ gơh oei ôh. Lu iĕm đei pơtăm boih pơgar hơmu đei plei 'ngam mă-lei kư̆m ưh kơ đei huch đak sik sư ôh.

¹²Yua kơ inh băt boih kơ tơdrong yoch lu iĕm lơ pă băt dang yơ, tơdrong yoch iĕm tih dêh, lu iĕm pơmat lu bơngai tơpăt, iŏk sa pơgâm, tơ anih 'măng jang pơlei lu iĕm sơngah kơ tơdrong trŏ tơpăt lu bơngai dơnuh hin lăm năr sek tơlang.

¹³Yua kơ lăm chăl kơnê̆ dêh yua kơ thoi noh lu bơngai hơgei gô mơ̆ng đĕch; lăm chăl thoi âu.

¹⁴Chơchă bĕ tơdrong 'lơ̆ng păng 'nĕ pă chă tơdrong kơnê̆, wă kơ lu iĕm đei tơdrong arih, na Kră Yang 'Bok Kei-Dei Tih hloh gô oei hơdai iĕm, thoi iĕm đei hơpơi boih.

¹⁵Areh bĕ kơ tơdrong kơnê̆, na 'mêm bĕ kơ tơdrong 'lơ̆ng; pơm pơjing bĕ tơdrong 'lơ̆ng tơpăt 'bơ̆t 'măng jang pơlei. Rŏ lăng Kră Yang 'Bok Kei-Dei Tih hloh gô mơnat ăn kơ dôm lu bơngai Jôsep mă oei arih.

¹⁶Thoi noh na Kră Yang 'Bok Kei-Dei Tih hloh, khan thoi âu: Tơ rim anih lăm pơlei đe gô nhơ̆m hmoi: Tơ rim trong đe ôr krao ơu pơmat dêh! Ơu pơmat dêh! Đe gô pơtơm lu bơngai choh mir chŭn năm truh tơ anih ơh sơ'ngon păng chă lu bơngai gơh hmoi năm nhơ̆m hmoi.

¹⁷Tơ lăm pơgar hơmu gô kơtơ̆ng nơ̆r nhơ̆m hmoi yua kơ inh gô yak tŏk-bŏk iĕm, Kră Yang khan thoi noh.

¹⁸Răm-'băm dêh kơ lu iĕm mă chang gô năr Kră Yang! Lu iĕm chang gô năr Kră Yang wă pơm kiơ? Noh năr măng mu, ưh kơ trŏ năr hơdah ôh.

¹⁹Thoi minh 'nu bơngai kơdâu đơ̆ng dăm-brang mă-lei oei tơ'bơ̆p chơgơu dơ̆ng; dah thoi lu đe mơ̆t tơ lăm hnam, hơgơn ti tơ tơnăr, na 'bih choh ti sư.

²⁰Năr Kră Yang hăm trŏ măng mu, ưh kơ hơdah, noh tơdrong ơh sơ'ngon, măng klăm hăm đei hơdah hơdong rang mơnhal deh?

²¹Inh areh, inh sơ'ngon kơ năr iĕm pơm kơ̆m giĕng; Inh ưh kơ hiôk gah tơdrong iĕm akŭm kơkuh tih noh.

²²Mă khan iĕm pơyơ̆r kơ inh dôm tơmam soi phe 'ba, dah tơmam soi 'buh, inh ưh kơ iŏk ôh; Inh ưh kơ wă lăng ôh dôm lu tơmam soi bơnê hăm rơmo bek đơ̆ng lu iĕm.

²³Weh ataih bĕ dôm nơ̆r hơri lu iĕm đơ̆ng inh! Inh ưh kơ 'maih mơ̆ng nơ̆r brŏ-kơni đơ̆ng lu iĕm.

²⁴Kơtrơ̆m jah lê̆ lu tơdrong 'lơ̆ng tơpăt sĭt ro thoi đak păng tơdrong tơpăt kơkhŭr thoi đak glung ro ling-lang.

²⁵Ơ adrĕch Isơrael lu iĕm hăm lah pơyơ̆r tơmam soi kơ inh kơplah lăm puăn-jĭt sơnăm tơ char glă sơ̆ ưh?

²⁶Tă tơ, lu iĕm tung hnam bơsŭn pơtao iĕm, bơwei rup yang iĕm man păng yang sơnglŏng mă lu iĕm đei man kơdih.

²⁷Yua kơ thoi noh, gô rôp ba lu iĕm jing pơm đĭch tơ pah to pơlei Đamas, Kră Yang khan thoi noh, anăn sư Kră Yang 'Bok Kei-Dei Tih hloh.