Read bahnar Am 7 Bible Online

Am 7 - bahnar bible

Am 7

¹'Nâu mă tơdrong Kră Yang tơ'bôh ăn kơ inh: Sư pơjing lu lep lăm kơplah 'nhĕt 'nao wă bluh dơ̆ng. Đơ̆ng rŏng kơ đe yuă ăn kơ pơtao.

²Đơ̆ng rŏng kơ lep sa đĭ 'nhĕt lăm teh boih, inh khan: Ơ Kră Yang, inh apinh Ih mơnat ăn! Liơ Jakôp gơh kĕ arih? Yua kơ sư tŏ sĕt păng tơrăn dêh.

³Kră Yang tơplih đon tơchĕng. Kră Yang khan thoi âu: Tơdrong noh huay pă đei truh dơ̆ng.

⁴Thoi noh Kră Yang tơ'bôh ăn kơ inh: Kră Yang ăn ŭnh truh wă sek tơlang ŭnh noh sa jrŭ să, oei sa sơlŭng păng teh đak.

⁵Na inh khan: Ơ Kră Yang, inh apinh Ih pơdơh bĕ, liơ Jakôp oei kĕ dơ̆ng, yua kơ tŏ sĕt păng tơrăn dêh. Kră Yang tơplih đon.

⁶Kră Yang khan: Tơdrong noh huay pă truh dơ̆ng.

⁷Sư tơ'bôh ăn kơ inh: 'Nâu Kră Yang dơ̆ng kơpal dur mă đei man tơpăt păng ti Sư chĕp minh dăng tơlei wă kơ pơtŏ.

⁸Kră Yang khan kơ inh dơ̆ng: Ơ Amôs ih 'bôh kiơ? Inh khan: Minh dăng tơlei pơtŏ, na Kră Yang khan: 'Nâu Inh gô dăng tơlei pơtŏ hơgăt lăm kon pơlei Isơrael Inh. Inh ưh pă 'mêm kơ sư dơ̆ng.

⁹Lu anih kơjung Isăk gô juơ, lu anih rơgoh Isơrael gô pơrăm đĭ păng inh gô iŏk đao gưm iung blah hnam Jêrôbôam. Amôt păng 'bok soi Amsia

¹⁰Klaih kơ noh Amsia, 'bok soi pơlei Bethel, wơh đe năm pơtruh nơ̆r kơ Jêrôbôam pơtao Isơrael khan: Amôs sư pơdôr kon pơlei Isơrael wă blah pơm kơnê̆ kơ ih teh đak bơ̆n gô hiong răm yua kơ đơ̆ng dôm lu nơ̆r sư.

¹¹Yua kơ Amôs đei khan boih Jêrôbôam gô lôch kơ đao gưm păng Isơrael sĭt tơpă gô pơm bơnă đe gô puh tơweh đơ̆ng teh đak lu sư kơdih!

¹²Amsia khan kơ Amôs: Ơ bơngai khan lê̆ adrol, weh bĕ đơ̆ng âu, năm tơ lăm teh đak Juđa, arih sa păng khan lê̆ adrol tơ noh.

¹³Mă-lei 'nĕ pă khan lê̆ adrol tơ pơlei Bethel âu, yua kơ noh anih rơgoh pơtao păng noh anih hnam pơtao akŭm kơkuh kơ Kră Yang.

¹⁴Amôs tơl Amsia: Inh ưh kơ trŏ bơngai khan lê̆ adrol ôh păng inh kư̆m ưh kơ trŏ kơ kon 'bok khan lê̆ adrol mơ̆n; mă-lei inh jing minh 'nu bơngai wei triu păng bơngai bơwei hơmet dôm lu 'long hơra bri brah đĕch.

¹⁵Kră Yang iŏk inh đơ̆ng anih wei triu păng khan kơ inh: Ih năm khan lê̆ adrol bĕ kơ kon pơlei Isơrael inh.

¹⁶Na mơ̆ng bĕ nơ̆r Kră Yang: Ih khan thoi âu: 'Nĕ khan lê̆ adrol wă blah Isơrael păng kư̆m 'nĕ kơ bơtho đe pơm kơnê̆ hăm Isăk.

¹⁷Yua kơ inh khan thoi noh na Kră Yang khan dơ̆ng thoi âu: Akăn ih gô pơm đi tơ lăm pơlei tih; kon drŏ-nglo păng kon drŏ-kăn ih gô lôch kơ đao gưm, teh đak ih gô klah asong pơtŏ păng tơlei, gah ih, ih gô lôch lăm teh đak 'mê̆-'mach păng Isơrael gô pơm đĭch tơ dêh đe.