Read bahnar Am 8 Bible Online

Am 8 - bahnar bible

Am 8

¹'Nâu tơdrong mă Kră Yang tơ'bôh ăn kơ inh. 'Nâu đei minh pôm bai plei 'long bơyan puih.

²Sư khan: Amôs, ih 'bôh kiơ? Inh tơl: Inh 'bôh minh pôm bai plei 'long bơyan puih, Kră Yang khan kơ inh dơ̆ng thoi âu: Năr tôch truh boih tơ kon pơlei Isơrael; Inh ưh pă 'mêm kơ sư dơ̆ng.

³Lăm năr noh, dôm lu tơdrong hơri lăm hnam pơtao gô jing nơ̆r nhơ̆m hmoi Kră Yang khan. Gô đei lơ akâu bơngai lôch đe gô klơ̆m hŭt lê̆ tơ jơ̆p anih hreh tơthĕng.

⁴Iĕm mă lu bơngai luăn sa pơjuă bơhlơ̆r lu bơngai dơnuh hin păng pơrăm lu bơngai pơmat-tat kơpal teh, mơ̆ng bĕ nơ̆r 'nâu.

⁵Lu iĕm khan: Layơ khei 'nao jah đĭ wă kơ bơ̆n gơh tĕch 'ba layơ năr Sa'bat, tôch wă kơ lu bơ̆n gô pơih pơk 'ba mi, na bơ̆n tĕch pơhrŏ lê̆ epha na pơthim kơ jên hu rai trăp păng bơ̆n kŏng hơlĕnh wă hơlĕnh kơ đe.

⁶Wă kơ lu bơ̆n iŏk jên noh na răt iŏk lu bơngai mă pơmat-tat, iŏk minh hơgrop chơkhŏ tơplih bơngai dơnuh hin păng tĕch pơđĭ truh tơ lu 'ba mi bo.

⁷Kră Yang pao anăn sư mă Jakôp ư-ang, na pơkăm pơkă nơ̆r 'nâu: Sĭt inh ưh kơ đei layơ hiơt dôm tơdrong mă lu sư đei pơm!

⁸Teh đak ưh kơ tơdrŏ hă kơ tơdrong noh, đĭ-đăng lu kon pơlei sư ưh kơ nhơ̆m hmoi hă? Đĭ-đăng teh tŏk 'bĕnh blai nhen thoi đak krong Nil sư gô pơpơ̆ păng hrŏ thoi đak krong Êyiptơ noh.

⁹Kră Yang khan: Lăm năr noh gô đei tơdrong truh, inh gô pơm ăn kơ măt 'năr mơ̆t kơplah măt 'năr dơ̆ng păng pơm kơ teh măng mu kơplah 'năr oei đei.

¹⁰Inh gô ăn kơ năr chơt hiôk iĕm jing năr ơh sơ'ngon păng đĭ-đăng lu tơdrong hơri iĕm jing nhơ̆m hmoi. Inh gô chô̆ ăn 'bi nai tơ rim kơiĕng păng pơm ăn kơ rim kơ̆l jing kơ̆l hoh. Inh gô ăn tơdrong ơh sơ'ngon, thoi hiong minh 'nu kon pôm drŏ-nglo păng năr tôch sư thoi năr ơh sơ'ngon dêh.

¹¹Kră Yang khan: 'Nâu 'năr wă truh noh kơplah inh ăn tơdrong pơngot rơwĕt truh tơ lăm teh đak, ưh kơ trŏ khan pơngot kơ por sŏng, kư̆m ưh kơ trŏ rơhing kơ đak, mă-lei pơngot kơ 'maih wă mơ̆ng nơ̆r Kră Yang.

¹²Lu sư gô năm pơtoi đơ̆ng đak dơsĭ âu dĭng truh tơ đak dơsĭ to, đơ̆ng yă-nơ̆m truh tơ gah hơlĕch; kơdâu tơ âu tơ to wă chă nơ̆r Kră Yang, mă-lei chă ưh kơ đei.

¹³Lăm năr noh, lu adruh hơlai 'lơ̆ng hơbŏ păng lu tơdăm gô rơdu rơmơ̆n, yua kơ rơhing.

¹⁴Đĭ-đăng lu bơngai tơhlâu kơ Asima char Samari păng pơkă pơkăm: Ơ Đan, thoi yang ih oei arih! Thoi yang pơlei Bêrsêba oei arih! Đĭ-đăng lu bơngai kơkuh kơ yang gô pơ̆k păng ưh pă kĕ iung dơ̆ng.