Read bahnar Ob 1 Bible Online

Ob 1 - bahnar bible

Ob 1

¹Tơdrong tơ'bôh kơ Ôbadia. Kră Yang khan gah Eđôm thoi âu: Lu bơ̆n đei kơtơ̆ng đơ̆ng nơ̆r Kră Yang păng đơ̆ng lu bơngai Sư wơh năm tơ jơ̆p kơ teh đak, thoi âu: Iung bĕ! Lu bơ̆n iung bĕ ayăt păng lu kon pơlei âu wă tơblah hăm sư!

²Âu, Inh pơm ăn kơ iĕm jing iĕ hloh lăm lu teh đak âu. Đe lăng iĕm ưh kơ ai.

³Ơ lu khŭl bơngai oei lăm sơlam tơmo, lăm anih kơjung, lu iĕm đei khan lăm jơhngơ̆m iĕm thoi âu: Hăm đei bu kĕ tơlơ̆ inh huŏng tơ teh? Tơdrong pơang lăm jơhngơ̆m iĕm hơlĕnh kơdih akâu iĕm boih.

⁴Mă iĕm păr kơjung thoi sem klang, mă ih pơm tơpu lăm lu sơnglŏng, Inh gô tơlơ̆ ih huŏng đơ̆ng noh tơ teh Kră Yang khan thoi noh!

⁵Ô! Tơdrong răm tih gô truh kơ ih. Tơdah lu bơngai truh tơtông, tơgar đơ̆ng kơmăng, hăm trŏ lu sư tơtông iŏk lăp kơ mah đĕch? Tơdah lu bơngai phĕ plei hơmu năm truh tơ ih, hăm trŏ lu sư wơ̆l minh 'bar hơie?

⁶Đe gô chă pơpơih iŏk tơmam Êsâu, dôm tơmam gĭt sư ôn hlơp ră mă-lei đe gô chă pơpơih iŏk.

⁷Khŭl đe pôm đon hăm ih pơpuh boih ih dĭng truh tơ anih tôch. Dôm lu bơngai lăp đon hăm ih, na hơlĕnh kơ ih, jei lu sư, gah lu bơngai sa 'bĕng ih; hơ'năk hơđong ala ih, na ih ưh kơ băt hloi.

⁸Kră Yang khan: Hăm trŏ lăm năr noh, inh gô pơlôch dôm lu bơngai hơgei đơ̆ng lăm pơlei Eđôm? Păng dôm lu bơngai hlôh wao đơ̆ng kông Êsâu?

⁹Ơ char Têman dôm lu linh nuih kơtang ih gô hơwơ̆l hơwang, thoi noh na đe gô pơlôch đĭ lu drŏ-nglo đơ̆ng kông Êsâu lăm ei.

¹⁰Noh yua kơ đơ̆ng tơdrong kơnê̆ ih pơm kơ oh ih Jakôp, mă ih gô pŭ iŏk mơlâu păng lôch hiong ling-lang hlong hloi!

¹¹Lăm năr đe tơmoi tơgar iŏk mŭk tơmam sư, lu kon pơlei tơmoi mơ̆t lăm 'măng jang pơlei sư păng wă hlang lăng iŏk teh pơlei Jêrusalem, na lăm năr noh ih dơ̆ng pah to, ih kư̆m thoi minh 'nu bơngai lăm lu sư,

¹²ô! Rŏ kơ ih lê̆ kơ lăng ră năr pơmat-tat truh kơ 'nhŏng oh ih, ih 'nĕ kơ chơt hiôk lăm năr đe pơlôch lu kon sâu Juđa; kư̆m 'nĕ pơma pơang lăm năr lu sư pơmat-tat.

¹³Trŏ kơ ih 'nĕ kơ mơ̆t tơ 'măng jang kon pơlei Inh kơplah lu sư đei tơdrong pơmat-tat; glăi boih ih pơang lăng tơ tơdrong gleh truh kơ lu sư, lăm năr lu sư pơmat-tat glăi boih ih iŏk mŭk tơmam lu sư, kơplah lu sư oei đei tơdrong gleh pơmat.

¹⁴Trŏ kơ ih 'nĕ kơ dơ̆ng găn 'bơ̆t trong tơklah pêng wă pơlôch lu bơngai mă kơdâu ôn păng kư̆m 'nĕ kơ rôp ăn kơ đe pơlôch lu bơngai mă klaih oei arih lăm năr gleh tih hli tơrơ.

¹⁵Yua kơ năr Kră Yang wă jê̆ truh năr phak đĭ-đăng adrĕch kon bơngai boih năr ei kơnh đe gô pơm kơ ih kư̆m thoi ih đei pơm kơ đe dôm tơdrong jang ih gô tuh kơpal kơ̆l ih kơdih dơ̆ng.

¹⁶Sĭt thoi ih đei huch tơdrong Inh phak tơ kông rơgoh Inh thoi yơ, na đĭ-đăng teh đak kư̆m gô huch thoi noh; sĭt, lu sư gô huch sa păng luăn hloi, huch ling-lang pă pơdơh đơ̆ng noh lu sư gô lôch hiong thoi ưh tam đei lu sư!

¹⁷Mă-lei gô đei dôm lu bơngai gơh klaih oei tơ kông Siôn, kông noh jing 'lơ̆ng rơgoh pơm anih akŭm păng hnam Jakôp gô đei yua jang sa sư kơdih.

¹⁸Hnam Jakôp gô thoi ŭnh păng hnam Jôsep gô thoi pla ŭnh; hnam Êsâu gô thoi hơnong 'ba, mă sư gô soh sa đĭ, hnam Êsâu gô ưh pă đei bu klaih kơ lôch; yua kơ Kră Yang đei khan thoi noh.

¹⁹Lu bơngai oei tơ gah gơal gô blah iŏk đei kông Êsâu, dôm lu bơngai oei tơ teh thŭng dơnă gô tŏk oei tơ teh khŭl bơngai Philistin: Lu sư gô đei iŏk mir chŭn Êphraim păng mir chŭn Samari; lu bơngai Bênjamin gô đei iŏk Gileat.

²⁰Dôm lu bơngai Isơrael pơm bơnă oei lăm dêh Kanaan, gô đei bri seh teh choh sư truh tơ Sarephat. Lu bơngai bơnă Jêrusalem oei char Sephahat gô đei iŏk pơlei gah gơal.

²¹Gô đei lu bơngai mă đei dŏng pơklaih tŏk tơ kơpal kông Siôn wă wei-lăng kông Êsâu; na teh đak noh gô jing gah Kră Yang.