Read bahnar Jon 1 Bible Online

Jon 1 - bahnar bible

Jon 1

¹Đei nơ̆r Kră Yang khan kơ Jôna kon drŏ-nglo Amitai thoi âu:

²Ih iung bĕ! Năm tơ pơlei tih Niniwe, pơma khă lu sư, yua kơ tơdrong yoch lu sư tih kơtơ̆ng truh tơ Inh.

³Mă-lei Jôna kơdâu năm tơ pơlei Tarisi, wă klĕnh đơ̆ng anăp Kră Yang. Sư jur truh tơ pơlei Jôpa, tơ'bơ̆p duk năm tơ pơlei Tarisi, wă klĕnh đơ̆ng anăp Kră Yang.

⁴Mă-lei Kră Yang ăn đei kial hơbŭt tih tơ đak dơsĭ, duk mah wă jê̆ pơchah.

⁵Lu bơngai wơ̆r duk păng lu bơngai jang lăm duk hli tơpă, rim 'nu bơngai hao lăm duk krao chă yang lu sư kơdih. Đơ̆ng noh, lu sư hŭt lê̆ đĭ tơmam đơ̆ng lăm duk tơ đak dơsĭ, wă kơ duk phiơl 'biơ̆. Mă-lei Jôna sư oei 'bĭch tep tơ anih ala lăm duk.

⁶'Bok yŏng tơ'ngla duk noh năm tơ sư păng râu sư khan: Ơ bơngai oei tep noh, pơm kiơ thoi noh? Iung bĕ! Krao khan apinh yang ih bĕ! Wă kơ Yang ih 'blŏk kơ bơ̆n, na lu bơ̆n huay kơ lôch.

⁷Đơ̆ng rŏng kơ noh, lu sư pơma tơduă lu sư khan: Lu bơ̆n athei hlang lăng wă kơ băt tơdrong truh kơ bơ̆n âu, yua kơ đơ̆ng bu. Na lu sư hlang lăng trŏ kơ Jôna.

⁸Na lu sư apinh Jôna: Apinh ih athei roi ăn kơ lu nhôn băt yua kơ kiơ đei tơdrong truh kơ lu bơ̆n âu. Ih bơngai jang kiơ? Păng ih đơ̆ng yơ? Tơring ih oei tơ yơ? Ih bơngai kiơ?

⁹Sư tơl thoi âu: Inh bơngai Hêbrơ păng inh bơngai hli yom kơ Kră Yang 'Bok Kei-Dei kơpal plĕnh, Sư Tơ'ngla pơjing kơ plĕnh teh păng đak dơsĭ. Inh klĕnh đơ̆ng Sư.

¹⁰Lu bơngai lăm duk đĭ-đăng lu sư hli păng khan kơ Jôna thoi âu: Liơ ih pơm thoi noh? Lu đe noh băt boih kơ sư bơngai kơdâu klĕnh đơ̆ng Kră Yang; kơtơ̆ng đơ̆ng sư roi.

¹¹Na lu sư khan: Lu bơ̆n pơm liơ wă kơ đak dơsĭ huay pă tơdrŏ, yua kơ đak dơsĭ poh-yă rai dêh.

¹²Jôna khan: Lu iĕm rôp klơ̆m lê̆ inh bĕ! Klơ̆m lê̆ tơ lăm đak dơsĭ, lei đak dơsĭ huay pă tơdrŏ. Inh băt boih yua kơ đơ̆ng inh na đei kial hơbŭt tih thoi âu:

¹³Lu sư adrin wơ̆r duk gơwĕch wă tŏk tơ kông ră, mă-lei ưh kơ kĕ, yua kơ đak dơsĭ poh-yă rai dêh pơm kơ lu sư.

¹⁴Lu sư krao khan kơ Kră Yang thoi âu: Ơ Kră Yang, lu nhôn apinh Ih 'nĕ ăn kơ lu nhôn lôch yua kơ bơngai âu, 'nĕ jô̆ kơ lu nhôn pơlôch bơngai âu. Ơ Kră Yang, yua kơ Ih boih Tơ'ngla pơm tơdrong kiơ kiơ̆ kơ Ih wă.

¹⁵Đơ̆ng noh đe rôp Jôna klơ̆m hơtat lê̆ sư tơ lăm đak dơsĭ, na đak dơsĭ huay pă poh-yă hloi.

¹⁶Yua kơ thoi noh lu bơngai noh hli yom kơ Kră Yang lu sư pơyơ̆r tơmam soi ăn kơ Kră Yang păng pơkă hăm Kră Yang.

¹⁷Mă-lei Kră Yang hơmet lê̆ ka tih luăn Jôna. Jôna oei lăm klak ka pêng năr pêng măng.