Read bahnar Jo 1 Bible Online

Jo 1 - bahnar bible

Jo 1

¹Năr mônh khei 'bar, sơnăm mă 'bar, đơ̆ng rŏng kơ adrĕch bơngai Isơrael lĕch hlôi đơ̆ng char Êyiptơ, Kră Yang khan kơ Môis oei lăm Bơsŭn Anih Akŭm tơ Thŭng glă Sinai:

²Ih athei chih jô̆ đĭ-đăng adrĕch adrung bơngai Isơrael, kiơ̆ kơ adrĕch, kơtum kơtŏng 'nhŏng oh gah 'bă, chih anăn rim 'nu lu kon drŏ-nglo,

³Ih păng Arôn gô chih jô̆ măt iŏk đơ̆ng 'bar-jĭt sơnăm tơ kơpal, wă khan đĭ-đăng kơ̆l bơngai lăm adrĕch Isơrael gơh kĕ năm tơblah.

⁴Bơngai kơdră pơgơ̆r lu adrĕch sư kơdih. Kư̆ lăm minh adrĕch athei đei minh 'nu bơ̆jang tơgŭm ih păng Arôn.

⁵'Nâu anăn lu bơngai wă jang hơdai păng tơgŭm lu iĕm: Gah adrĕch Rubên đei Êlisur kon drŏ-nglo Sêdur;

⁶đơ̆ng adrĕch Simêôn đei Sêlumiel kon drŏ-nglo Surisadai;

⁷đơ̆ng adrĕch Juđa đei Nahsôn kon drŏ-nglo Aminađap;

⁸đơ̆ng adrĕch Isakar đei Nathanel kon drŏ-nglo Suar;

⁹đơ̆ng adrĕch Sabulôn đei Êliap kon drŏ-nglo Hêlôn;

¹⁰đơ̆ng adrĕch kon drŏ-nglo Jôsep, adrĕch Êphraim đei Êlisama kon drŏ-nglo Amihut, đơ̆ng adrĕch Manase đei Gamaliel kon drŏ-nglo Pêdasur;

¹¹đơ̆ng adrĕch Bênjamin đei Abidan kon drŏ-nglo Gideôni;

¹²đơ̆ng adrĕch Đan đei Ahiser kon drŏ-nglo Amisadai;

¹³Đơ̆ng adrĕch Aser đei Pagiel kon drŏ-nglo Ôkran;

¹⁴đơ̆ng adrĕch Gat đei Êliasap kon drŏ-nglo Đêuel;

¹⁵đơ̆ng adrĕch Neptali đei Ahira kon drŏ-nglo Ênan.

¹⁶Lu đe âu đe rơih iŏk đơ̆ng lăm kon pơlei; lu sư âu boih lu kơdră pơgơ̆r adrĕch lu sư kơdih kiơ̆ kơ adrĕch 'bok lu sư păng jơ̆ yŏng pơgơ̆r linh bơngai Isơrael.

¹⁷Môis păng Arôn sơng iŏk lu bơngai mă đe đei chih anăn;

¹⁸Truh năr mônh khei 'bar krao akŭm đĭ-đăng kon pơlei, chih anăn lu sư kơdih iŏk đơ̆ng 'bar-jĭt sơnăm tơ kơpal na chih tơmơ̆t lăm sơ̆p hla bơar kiơ̆ kơ adrĕch adrung kơtum kơtŏng lu sư.

¹⁹Thoi noh Môis chih jô̆ tơmơ̆t lăm sơ̆p hla bơar tơ Thŭng glă Sinai, thoi Kră Yang Isơrael đei pơkă khan kơ sư.

²⁰Kon sâu Rubên, kon kơdră drŏ-nglo Isơrael, kiơ̆ kơ adrĕch adrung sư, kiơ̆ kơ hnam dơnŏ 'bă sư kơdih, đe jô̆ chih rim anăn lu sư đĭ-đăng kon drŏ-nglo đơ̆ng 'bar-jĭt sơnăm tơ kơpal, wă khan lu kon sâu Rubên mă gơh năm tơblah

²¹đei puăn-jĭt tơdrâu-rơbâu pơđăm-hrĕng 'nu.

²²Kon sâu Simêôn, adrĕch adrung, kiơ̆ kơ hnam dơnŏ 'bă sư kơdih, đe chih jô̆ anăn rim 'nu drŏ-nglo đơ̆ng 'bar-jĭt sơnăm tơ kơpal, wă khan lăm kon sâu Simêôn gơh năm tơblah,

²³đei pơđăm-jĭt tơsĭn-rơbâu pêng-hrĕng 'nu.

²⁴Kon sâu Gat, adrĕch adrung sư kiơ̆ hnam dơnŏ 'bă lu sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm tơ kơpal, wă khan lăm kon sâu Gat gơh năm tơblah,

²⁵đei puăn-jĭt pơđăm-rơbâu tơdrâu-hrĕng pơđăm-jĭt 'nu.

²⁶Kon sâu Juđa, adrĕch adrung sư, kiơ̆ kơ hnam dơnŏ 'bă sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm năm tơ kơpal, wă khan lăm lu kon sâu Juđa gơh năm tơblah,

²⁷đei tơpơh-jĭt puăn-rơbâu tơdrâu-hrĕng 'nu.

²⁸Kon sâu Isakar, adrĕch adrung sư, kiơ̆ kơ hnam dơnŏ 'bă lu sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm tơ kơpal, wă khan lăm kon sâu Isakar gơh năm tơblah,

²⁹đei pơđăm-jĭt puăn-rơbâu puăn-hrĕng 'nu.

³⁰Kon sâu Sabulôn, adrĕch drung sư, kiơ̆ kơ hnam dơnŏ 'bă lu sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm tơ kơpal, wă khan lăm kon sâu Sabulôn gơh năm tơblah,

³¹đei pơđăm-jĭt tơpơh-rơbâu puăn-hrĕng 'nu.

³²Kon sâu Jôsep, noh kiơ̆ kon sâu Êphraim, adrĕch adrung sư, kiơ̆ hnam dơnŏ 'bă lu sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm năm tơ kơpal, wă khan lăm kon sâu Êphraim gơh năm tơblah.

³³Đei puăn-jĭt rơbâu pơđăm-hrĕng 'nu.

³⁴Kon sâu Manase, adrĕch adrung sư kiơ̆ kơ hnam dơnŏ 'bă sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm năm tơ kơpal, wă khan lăm kon sâu Manase gơh năm tơblah,

³⁵đei pêng-jĭt 'bar-rơbâu 'bar-hrĕng 'nu.

³⁶Kon sâu Bênjamin, adrĕch adrung sư, kiơ̆ kơ hnam dơnŏ 'bă lu sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm tơ kơpal, wă khan lăm kon sâu Bênjamin gơh năm tơblah.

³⁷Đei pêng-jĭt pơđăm-rơbâu puăn-hrĕng 'nu.

³⁸Kon sâu Đan, adrĕch adrung sư, kiơ̆ kơ hnam dơnŏ 'bă lu sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm tơ kơpal, wă khan lăm kon sâu Đan gơh năm tơblah.

³⁹Đei tơdrâu-jĭt 'bar-rơbâu tơpơh-hrĕng 'nu.

⁴⁰Kon sâu Aser, adrĕch adrung sư, kiơ̆ kơ hnam dơnŏ 'bă lu sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm năm tơ kơpal, wă khan lăm kon sâu Aser, gơh năm tơblah.

⁴¹Đei puăn mơjĭt-mônh rơbâu pơđăm-hrĕng 'nu.

⁴²Kon sâu Neptali, adrĕch adrung sư, kiơ̆ kơ hnam dơnŏ 'bă lu sư, đei chih jô̆ anăn rim 'nu drŏ-nglo đơ̆ng 'bar-jĭt sơnăm năm tơ kơpal, wă khan lăm kon sâu Neptali gơh năm tơblah,

⁴³đei pơđăm-jĭt pêng-rơbâu puăn-hrĕng 'nu.

⁴⁴'Nâu bơngai mă Môis, Arôn păng mơjĭt-'bar 'nu kơdră pơgơ̆r bơngai Isơrael đei chih jô̆; rim kơdră chih jô̆ adrĕch bơ̆n kơdih.

⁴⁵Thoi noh đĭ-đăng lu bơngai lăm adrĕch adrung Isơrael đe đei chih tơmơ̆t lăm sơ̆p hla bơar jô̆ kơ̆l bơngai kiơ̆ kơ adrĕch kơdih, iŏk đơ̆ng 'bar-jĭt sơnăm tơ kơpal, wă khan lăm adrĕch kon sâu Isơrael gơh năm tơblah,

⁴⁶đei tơdrâu-hrĕng pêng-rơbâu pơđăm-hrĕng pơđăm-jĭt 'nu.

⁴⁷Lu bơngai Lêwi, kiơ̆ kơ adrĕch adrung lu sư kơdih, ưh kơ chih jô̆ hơdai hăm lu adrĕch adrung nai.

⁴⁸Yua kơ Kră Yang đei khan kơ Môis thoi âu:

⁴⁹Ih 'nĕ kơ chih jô̆ adrĕch adrung Lêwi păng kư̆m 'nĕ chih tơmơ̆t hơdai hăm adrĕch Isơrael;

⁵⁰Mă-lei athei klah lê̆ adrĕch Lêwi wă kơ lu sư wei-lăng Bơsŭn Anih Akŭm Pơgơ̆p Sĭt păng đĭ-đăng lu tơmam yua lăm anih akŭm đe pơm păng khăn noh, wă kơ lu sư tơiung pơdơ̆ng păng tung anhăk anih, wei-lăng đĭ lu tơmam yua lăm anih noh bơ̆jang lăm hnam noh păng pơm bơsŭn oei tăp dăr kơ Anih Akŭm noh.

⁵¹Tơdah Anih Akŭm păng khăn noh pôk tơ nai lu adrĕch bơngai Lêwi âu yuih, truh tơ anih boih lu sư gô tơiung pơdơ̆ng ming; lu adrĕch bơngai nai ưh kơ gơh năm jê̆ tơdah năm jê̆ đe gô pơlôch.

⁵²Adrĕch bơngai Isơrael gô pơm bơsŭn oei kiơ̆ kơ adrĕch lu sư, rim 'nu kiơ̆ anih sư kiơ̆ kơ hla-kơ lu sư.

⁵³Mă-lei lu adrĕch Lêwi gô oei tăp dăr kơ Bơsŭn Anih Akŭm Pơgơ̆p Sĭt, wă kơ huay tơhil pơjăng pơjah hăm lu adrĕch bơngai Isơrael; adrĕch Lêwi lu sư gô wei-lăng bơ̆jang lăm Bơsŭn Anih Akŭm Pơgơ̆p Sĭt.

⁵⁴Lu kon pơlei bơngai Isơrael pơm kiơ̆ thoi nơ̆r Kră Yang đei pơkă boih hăm Môis.