Read bahnar Jo 10 Bible Online

Jo 10 - bahnar bible

Jo 10

¹Kră Yang khan kơ Môis:

²Pơm bĕ 'bar tŏ keng hu; ih hơjơ̆m sư, na ih gô yua hlôm sư 'bơ̆t năr wă krao akŭm dah roi tơbăt wă yak năm.

³Tơdah đe hlôm yua pơđĭ 'bar tŏ keng lei đĭ-đăng lu bơngai năm akŭm tơ ih 'bơ̆t 'măng Bơsŭn Anih Akŭm,

⁴tơdah đe hlôm lăp minh pôm keng đĕch lei lu yŏng kơdră wă khan lu yŏng pơgơ̆r lu linh bơngai Isơrael gô năm akŭm tơ ih.

⁵Mưh iĕm hlôm keng re pơtĕnh roi tơbăt wă tơblah lei lu bơngai oei gah hơlĕch lu sư năm;

⁶mưh lu iĕm hlôm keng re pơtĕnh mă 'bar lei lu bơngai oei gah gơal năm; đe gô hlôm pơtĕnh kơplah noh lei wă tơbăt kơ 'bar kơđông noh năm.

⁷Wă krao akŭm kon pơlei, lu iĕm hlôm re, mă-lei 'nĕ kơ hlôm re pơtĕnh,

⁸lu kon drŏ-nglo Arôn, lu bơngai mă pơm 'bok soi, lu sư gô hlôm keng noh. Đơ̆ng chăl arih âu dĭng truh tơ chăl nai, noh boih tơdrong juăt ăn kơ lu iĕm ling-lang.

⁹Layơ lăm dêh iĕm đei tơdrong lu iĕm wă năm blah lu ayăt dah ayăt năm blah iĕm, lei lu iĕm athei hlôm keng re pơtĕnh, Kră Yang 'Bok Kei-Dei gô 'blŏk kơ lu iĕm păng lu iĕm gô klaih đơ̆ng ti lu bơngai ayăt.

¹⁰Lăm năr chơt hiôk, lăm năr pơm giĕng et sa tih păng lăm khei blŭng-a lu iĕm, lu iĕm hlôm keng 'bơ̆t kơplah lu iĕm pơyơ̆r tơmam soi 'blŏk bơnê hiôk-hian păng tơmam soi 'buh bơ̆n kơdih, keng noh pơm tơmam tơ'blŏk 'bơ̆t anăp Kră Yang, 'Bok Kei-Dei lu iĕm.

¹¹Lăm sơnăm mă 'bar, khei 'bar, năr 'bar-jĭt, hơmơ̆l đông đơ̆ng bơbŭng Bơsŭn Anih Akŭm roi tơbăt.

¹²Lu kon pơlei Isơrael, pơm kiơ̆ tơdrong tơdă lê̆ boih lu sư năm lĕch đơ̆ng char glă Sinai păng hơmơ̆l dơ̆ng 'bơ̆t char glă Pharan:

¹³Thoi noh bơngai Isơrael chu kiơ̆ Kră Yang tơtă thoi sư đei khan boih kơ Môis, na lu sư lĕch yak năm tăl mă mônh.

¹⁴Hla-kơ adrĕch Juđa, yak kiơ̆ kơ khŭl, yak adrol. Nahsôn kon drŏ-nglo Aminađap pơm yŏng kơdră pơyơ̆r lu sư.

¹⁵Nathanel kon drŏ-nglo Suar pơm yŏng kơdră pơgơ̆r lu adrĕch Isakar.

¹⁶Êliap kon drŏ-nglo Hêlôn, yŏng kơdră pơgơ̆r khŭl Sabulôn.

¹⁷Đe yuih Bơsŭn Anih Akŭm boih na lu bơngai drŏ-nglo kon sâu Gersôn păng lu drŏ-nglo kon sâu Mêrari, lu sư tung tơmam Bơsŭn Anih Akŭm, na yak năm.

¹⁸Đơ̆ng noh, khŭl adrĕch kon sâu Rubên chĕp hla-kơ yak năm kiơ̆ kơ khŭl linh lu sư. Êlisur kon drŏ-nglo Sêdur yŏng pơgơ̆r lu adrĕch Rubên.

¹⁹Sêlumiel kon drŏ-nglo Surisadai yŏng kơdră pơgơ̆r lu adrĕch kon sâu Simêôn.

²⁰Êliasap kon drŏ-nglo Đêuel yŏng kơdră pơgơ̆r lu adrĕch kon sâu Gat.

²¹Đơ̆ng noh khŭl Kôhat yak năm, tung ba tơmam rơgoh; lu đe tơiung pơdơ̆ng Bơsŭn Anih Akŭm păng khăn noh boih adrol kơ lu sư truh.

²²Đơ̆ng noh, khŭl kon sâu Êphraim yak năm chĕp hla-kơ khŭl lu sư, Êlisama kon drŏ-nglo Amihut yŏng kơdră pơgơ̆r lu sư.

²³Gamaliel kon drŏ-nglo Pêdasur yŏng kơdră pơgơ̆r khŭl adrĕch kon sâu Manase.

²⁴Abidan kon drŏ-nglo Gideôni yŏng kơdră pơgơ̆r lu adrĕch kon sâu Bênjamin.

²⁵Na, khŭl kon sâu Dan chĕp hla-kơ kiơ̆ kơ khŭl lu sư; lu sư jing khŭl yak đơ̆ng rŏng kơ lu khŭl adrĕch nai. Ahiser kon drŏ-nglo Amisadai, yŏng kơdră pơgơ̆r khŭl adrĕch kon sâu Đan.

²⁶Pagiel kon drŏ-nglo Ôkran yŏng kơdră pơgơ̆r khŭl lu adrĕch kon sâu Aser.

²⁷Ahira kon drŏ-nglo Ênan yŏng kơdră pơgơ̆r khŭl adrĕch kon sâu Naptali.

²⁸'Nâu boih tơdrong lu sư asong băl năm hơtuch adrol kiơ̆ kơ khŭl lu sư tơdah lu sư wă yak năm.

²⁹Môis khan kơ Hôbap kon drŏ-nglo Rêuel, bơngai Madian, Hêbap 'nhŏng akăn sư, thoi âu: Lu nhôn năm truh tơ dêh char mă Kră Yang đei pơkă khan: Inh gô ăn kơ lu iĕm dêh char noh. Apinh ih năm hơdai nhôn, lu nhôn gô pơm 'lơ̆ng hăm ih; yua kơ Kră Yang pơkă wă ăn pŭn hiôk kơ kon pơlei adrĕch Isơrael.

³⁰Hôbap tơl: Inh ưh kơ năm ôh, mă-lei inh wih brŏk tơ dêh char inh kơdih, noh kon pơlei inh.

³¹Môis khan kơ sư dơ̆ng: Inh apinh ih 'nĕ kơ achăng lê̆ nhôn, yua kơ ih băt tơ lăm char glă anih ayơ lu nhôn mă gơh oei pơdơh pơdơ̆ng bơsŭn; ih thoi măt,

³²tơdah ih năm hơdai nhôn, lu nhôn pơm ăn kơ ih đei pŭn hiôk kiơ̆ thoi Kră Yang ăn pŭn hiôk kơ nhôn.

³³Thoi noh, kon pơlei bơngai Isơrael yak năm đơ̆ng kông Kră Yang, pêng năr kơ trong; hom tơdrong pơgơ̆p Kră Yang yak adrol kơ lăm pêng năr kơ trong 'nâu, wă chă anih ăn kơ kon pơlei pơdơh.

³⁴Kơplah kơ'năr, kon pơlei Isơrael yuih anih bơsŭn lu sư yak năm, na hơmơ̆l Kră Yang kiơ̆ hơdai kơpal lu sư.

³⁵Rim wơ̆t Hom Pơgơ̆p năm, na Môis khan thoi âu: Ơ Kră Yang, apinh ih iung yak bĕ, wă kơ lu bơngai ayăt kơ Ih kơdâu tơklah tơklang đĭ; lu đe bu areh kơ Ih gô kơdâu ôn đĭ đơ̆ng anăp Ih!

³⁶Mưh đe tơjur Hom Pơgơ̆p, na Môis khan thoi âu: Ơ Kră Yang, apinh Ih wih brŏk bĕ tơ rơbâu hơngan bơngai Isơrael.