Read bahnar Jo 11 Bible Online

Jo 11 - bahnar bible

Jo 11

¹Kon pơlei pơma jŏk, kơ tơdrong pơmat-tat anat anot. Kră Yang kơtơ̆ng tơdrong noh, Kră Yang hil mĭl, ŭnh đơ̆ng Kră Yang soh sa khơ̆ng lăm kon pơlei păng ŭnh sa đơ̆ng jih kơđông.

²Kon pơlei krao apinh Môis; Môis krao khan apinh Kră Yang, na ŭnh păt.

³Đe anăn hloi anih 'nâu Tabêra, yua kơ ŭnh đơ̆ng Kră Yang soh sa tơ lăm lu sư.

⁴Đei lu bơngai tơmoi oei hơdai hăm kon pơlei Isơrael đei jơhngơ̆m rơhing 'maih wă sa dêh; na pơm kơ kon pơlei Isơrael nhơ̆m apinh hơpơi khan: Rŏ kơ đei 'nhĕm sa dêh?

⁵Lu nhôn 'blŏk kơ đêl 'nhĕm ka đe ăn kơ lu nhôn sa đĕch lăm dêh char Êyiptơ, đei pia đak pia bih, 'bum kơdĭm, kơdĭm hmă, kơdĭm toih.

⁶Na dang ei, jơhngơ̆m lu nhôn đĭ jô hŏnh, ưh kơ đei kiơ sa! Măt nhôn 'bôh 'băi pôm mana đĕch.

⁷Mana thoi găr hla ngo, hlăng thoi chai 'long.

⁸Kon pơlei chă dônh tah, peh hăm tơpăl wă kơ hĕch, dah ot hăm tơpăl ot, hơtŭk sư lăm gŏ dah pơm 'bĕng; sa sư thoi 'bĕng đe hrâu hăm đak rơmă ôliwơ.

⁹Kơmăng tŭk jur tơ kơpal bơsŭn lu sư lăm kơđông na mana kư̆m jruh hơdai.

¹⁰Môis kơtơ̆ng kon pơlei nhơ̆m, rim 'nu, 'bơ̆t 'măng bơsŭn sư kơdih; tơdrong Kră Yang hil mĭl dêh na Môis sư sơ'ngon dêh kơ tơdrong noh.

¹¹Môis krao khan apinh Kră Yang: Yua kơ kiơ Ih pơm ăn kơ đĭch đam Ih thoi noh? Yua kơ kiơ inh mă ưh kơ đei mơnat 'bơ̆t anăp Ih, na mă Ih ăn kơ inh pŭ dôm tơdrong trăp, đơ̆ng đĭ-đăng kon pơlei pơla 'nâu?

¹²Hăm trŏ kơ inh anăp tơpŭ lu sư ưh? Na mă Ih khan kơ inh: Pŭ krôp kon pơlei wei kon pơla âu lăm jơhngơ̆m ih bĕ, thoi bơngai 'bă mă pôk kon hơ'lơ̆p sư oei mŏm, dĭng mă truh tơ dêh char mă Ih đei pơkă wă ăn kơ lu 'bok yă lu sư.

¹³Inh gô chă đei 'nhĕm đơ̆ng yơ wă asong kơ đĭ-đăng lu kon pơlei âu? Yua kơ lu sư năm nhơ̆m tơ inh khan: Asong ăn kơ lu nhôn 'nhĕm sa.

¹⁴Inh ưh kơ kĕ pŭ đĭ lu kon pơlei âu ôh, lu sư jing trăp trĭn tơpă kơ inh!

¹⁵Tơdah Ih pơm kơ inh thoi noh păng dah inh đei tơdrong mơnat 'bơ̆t anăp ih, 'lơ̆ng hloh Ih jah pơlôch inh đĕch, wă kơ inh huay pă 'bôh tơdrong pơmat-tat inh!

¹⁶Kră Yang khan kơ Môis dơ̆ng thoi âu: Krao akŭm bĕ kơ inh tơpơh-jĭt 'nu lu kră pơgơ̆r bơngai Isơrael wă khan dôm lu kră wei-lăng kon pơlei mă ih băt; ba lu sư năm tơ Bơsŭn Anih Akŭm, dơ̆ng 'bơ̆t noh hơdai ih.

¹⁷Na Inh gô jur, pơma dơnuh hăm ih tơ noh; Inh gô iŏk ăn Yang Bơhngol Inh oei lăm ih păng oei lăm lu sư mơ̆n, wă kơ lu sư wang pŭ tơdrong trăp kon pơlei hơdai ih păng ih huay pă pŭ minh drô̆ ih.

¹⁸Ih athei roi tơbăt ăn kơ kon pơlei thoi âu: Pơgê dơning athei rim 'nu hơmet akâu kơdih mă 'lơ̆ng rơgoh; lei na lu iĕm đei 'nhĕm sa, yua kơ lu iĕm nhơ̆m boih, đon Kră Yang kơtơ̆ng lu iĕm nhơ̆m khan: Bu gô ăn kơ lu nhôn 'nhĕm sa, yua kơ lu nhôn đĭ hiôk boih oei lăm dêh char Êyiptơ, na Kră Yang gô ăn kơ lu iĕm 'nhĕm sa, na lu iĕm gô đei 'nhĕm sa.

¹⁹Lu iĕm sa 'nhĕm ưh kơ sĭ lăp minh năr, lăp 'bar năr, lăp pơđăm năr, mơjĭt năr dah 'bar-jĭt năr đĕch ôh;

²⁰Mă-lei dĭng truh tơ minh khei hloi, dĭng mă 'nhĕm iĕm 'bĕnh mah lĕch trong muh păng lu iĕm đĭ pă 'maih sa, yua kơ lu iĕm achăng lê̆ Kră Yang mă oei tŏk-bŏk lu iĕm păng nhơ̆m krao 'bơ̆t anăp Sư khan: Yua kơ kiơ lu nhôn mă lĕch đơ̆ng char Êyiptơ.

²¹Môis tơl khan: Lăm kon pơlei mă inh oei âu, đei tơdrâu-hrĕng 'nu bơngai drŏ-nglo, na Ih khan: Inh gô ăn kơ kon pơlei âu sa 'nhĕm lăm minh khei.

²²Đe gô pơlôch triu păng rơmo dĭng mah tôm ăn kơ lu sư hă? Dah đe gô rôp akŭm pơpôi đĭ ka lăm đak dơsĭ dĭng mah tôm kơ lu sư hă?

²³Kră Yang khan kơ Môis thoi âu: Ti Kră Yang kơđeh hă?a Ih gô lăng hŏ tơdrong mă Inh đei khan boih hăm ih gô lăng hăm truh trŏ 'blep.

²⁴Môis lĕch, năm roi ăn dôm nơ̆r Kră Yang kơ kon pơlei, dơ̆ng noh na krao akŭm tơpơh-jĭt 'nu lu kră wei-lăng kon pơlei, tơoei lê̆ lu sư tăp dăr kơ Bơsŭn Anih Akŭm.

²⁵Kră Yang jur hăm hơmơ̆l, pơma hăm Môis. Sư iŏk Yang Bơhngol ăn oei hăm Môis păng ăn kơ tơpơh-jĭt 'nu lu kră wei-lăng. Lăp Yang Bơhngol jur oei hăm lu kră, lu sư pơtơm pơma khan lê̆ adrol, mă-lei lu sư ưh kơ pơma khan lê̆ adrol ling-lang hloi ôh.

²⁶Đei 'bar 'nu oei lăm kơđông; minh 'nu anăn sư Eldat, minh noh dơ̆ng anăn sư Mêdat, na Yang Bơhngol mơ̆t oei lăm bre sư, bre sư pơtơm pơma khan lê̆ adrol lăm kơđông. 'Bar 'nu bre sư âu, lăm khŭl mă đe đei chih jô̆ anăn noh, mă-lei ưh kơ đei năm tơ Bơsŭn Anih Akŭm.

²⁷Đei minh 'nu bơngai tơdăm năm khan kơ Môis: Eldat păng Mêdat bre sư pơma khan lê̆ adrol lăm kơđông.

²⁸Jôsuê kon drŏ-nglo Nun, bơngai awih awăn ăn kơ Môis, tơl thoi âu: Ơ Môis, kơdră inh, khă lu sư bĕ!

²⁹Môis tơl sư: Ih wă chrih gar kơ inh loh? Ô! Apơi rŏ kơ đĭ-đăng kon pơlei Kră Yang gơh pơma khan lê̆ adrol păng rŏ kơ Kră Yang ăn Yang Bơhngol kơ lu sư.

³⁰Môis păng lu kră wei-lăng wih brŏk tơ kơđông dơ̆ng.

³¹Kră Yang ăn hloi kial tơthu bah đơ̆ng đak dơsĭ, puh ba hloi sem wăt huŏng tơ jê̆ tăp dăr kơđông, minh pah âu huŏng dă să wă đei minh năr kơ trong yak, minh pah to dơ̆ng huŏng dă să wă đei minh năr kơ trong yak; hơ'bơ̆l wă dang 'bar hlok đơ̆ng teh.

³²Kon pơlei iung dônh sem wăt lăm năr noh, măng noh păng truh năr dơning; bơngai bu dônh tŏ sĕt hloh wă dang mơjĭt hnŏngb đe sơ̆k tơraih sư tăp dăr kơđông.

³³Sa 'nhĕm oei đom lăm hơnĕnh, ưh kơ tam kơkă đei hloi tơdrong Kră Yang hil mĭl kơ kon pơlei, pơm ăn đei tơdrong truh pơrăm kon pơlei pơla trăp dêh tơpă.

³⁴Đe anăn hloi anih noh Kibrôt Hatawa,c yua kơ tơ anih noh đe 'bŭ lu bơngai mă jơhngơ̆m ham kơ sa.

³⁵Đơ̆ng Kibrôt Hatawa kon pơlei năm truh tơ Haserôt, oei pơdơh tơ noh.