Read bahnar Jo 12 Bible Online

Jo 12 - bahnar bible

Jo 12

¹Miriam păng Arôn pơma 'bơm Môis yua kơ sư iŏk oei kơ minh 'nu drŏ-kăn bơngai Kus;

²Bre sư khan: “Kră Yang yua lăp minh 'nu Môis đĕch hă, wă khan tơbăt kơ kon pơlei? Sư kư̆m ưh kơ wă yua ba hai ah?” Kră Yang kơtơ̆ng tơdrong noh.

³Môis boih mă iŏk đon ala iơ̆m dim hloh kơ đĭ-đăng bơngai kơpal teh âu.

⁴Chĭnh đei hloi nơ̆r Kră Yang khan kơ Môis, Arôn, Miriam thoi âu: Pêng 'nu iĕm athei năm bĕ tơ Bơsŭn Anih Akŭm, năm pơđĭ pêng 'nu iĕm hloi.

⁵Kră Yang jur hăm hơmơ̆l dơ̆ng 'bơ̆t 'măng Bơsŭn Anih Akŭm, na krao Arôn păng Miriam; na bre sư năm.

⁶Kră Yang khan kơ bre sư thoi âu: Mơ̆ng mă nhen bĕ nơ̆r Inh. Tơdah lăm lu iĕm đei bơngai bu pơma khan lê̆ adrol, Inh boih Kră Yang gô tơ'bôh kơ sư lăm tơdrong sư 'bôh, păng pơma kơ sư lăm tơdrong sư apo.

⁷Đĭch đam Inh Môis ưh kơ trŏ thoi noh ôh, sư bơngai tơpăt tơnăp dêh lăm hnam Inh.

⁸Inh pơma dơnuh hăm sư 'bơ̆r păng 'bơ̆r, hơđăl hơdah, ưh kơ đei tơdrong pơpơn ôn ôh; păng sư 'bôh boih rup Kră Yang. Thoi noh, liơ lu iĕm ưh kơ hli pơ̆n pơma 'bơm kơ đĭch đam Inh Môis?

⁹Thoi noh, tơdrong Kră Yang hil mĭl dêh kơ bre sư; đơ̆ng noh Kră Yang tŏk.

¹⁰Kơplah hơmơ̆l tŏk đông đơ̆ng Bơsŭn Anih Akŭm, na Miriam 'bơm kơnê̆ jĭ chin 'bĕnh akâu tơkhôih nhen prĕl, Arôn lăng tơ Miriam, 'bôh sư đĭ jĭ chin boih.

¹¹Arôn khan kơ Môis: Ô, yŏng inh, apinh 'nĕ tơpŭ tơ nhi tơdrong yoch mă nhi pơm kơtul, tơdrong yoch mă nhi pơm ưh kơ hlôh kơwao mă đei pơm boih.

¹²Apinh ih 'nĕ ăn kơ sư thoi minh 'nu kon nge sĕch akâu sư đĭ bluch răm minh puăt boih.

¹³Môis krao khan apinh Kră Yang thoi âu: Ơ, Kră Yang 'Bok Kei-Dei! Inh hơdrĭ hơpơi kơ Ih pơklaih ăn kơ mŏ inh.

¹⁴Kră Yang tơl Môis thoi âu: Tơdah 'bă sư gơsoh đak hai 'bơ̆t muh măt sư, hăm trŏ kơ sư mơlâu lăp tơpơh năr? Đe athei chĭt lê̆ sư tơ 'nguaih kơđông tơpơh năr; đơ̆ng noh đe iŏk sư tơmơ̆t lăm anih kơđông dơ̆ng.

¹⁵Thoi ei, đe chĭt lê̆ Miriam lăm tơpơh năr tơ 'nguaih kơ kơđông, lu kon pơlei ưh kơ đei năm tơ nai ôh dĭng truh tơ Miriam mă đe iŏk tơmơ̆t sư 'mơ̆i.

¹⁶Đơ̆ng rŏng kơ noh, kon pơlei yak năm lĕch đơ̆ng Haserôt, na oei pơdơh tơ char glă Pharan.