Read bahnar Jo 14 Bible Online

Jo 14 - bahnar bible

Jo 14

¹Đĭ-đăng lu tơpôl bơngai akŭm ôr re păng lu kon pơlei nhơ̆m hmoi lăm măng noh.

²Đĭ-đăng lu bơngai Isơrael jŏk kơ Môis păng Arôn; đĭ-đăng lu bơngai tơpôl khan kơ bre sư thoi âu: 'Lơ̆ng hloh kơ lu nhôn jah lôch tơ lăm char Êyiptơ ki, dah jah lôch tơ lăm char glă âu đĕch!

³Liơ mă Kră Yang chông ba lu nhôn mơ̆t tơ lăm dêh char 'nâu wă ăn kơ lu nhôn lôch ngôi kơ đao gưm đe? Kon akăn lu nhôn jing tơmam đe plah tơgar iŏk đĕch. Hăm trŏ 'lơ̆ng hloh lu nhôn jah wih hơlơ̆k tơ char Êyiptơ hă?

⁴Đơ̆ng noh lu kon pơlei pơma pơđâu tơduă lu sư khan: Bĕ bơ̆n chă pơjing pôk minh 'nu pơm yŏng pơgơ̆r bơ̆n jah wih hơlơ̆k tơ char Êyiptơ năm.

⁵Bre Môis păng Arôn drap bon tơ teh 'bơ̆t anăp kon pơlei Isơrael akŭm.

⁶Jôsuê kon drŏ-nglo Nun păng Kalep kon drŏ-nglo Jêphunê bre sư kư̆m lăm lu bơngai năm chop dăr lăng char noh, hek ao bre sư kơdih.

⁷Bre sư năm tơ lu kon pơlei Isơrael oei akŭm khan: Char mă lu nhôn năm chop dăr jing minh char 'lơ̆ng dêh;

⁸tơdah Kră Yang lăp đon hăm bơ̆n sư chông ba ăn kơ bơ̆n mơ̆t oei lăm char noh; char noh đei mơ̆r 'lơ̆ng tơmam sa rơkah rơkai. Kră Yang gô ăn char noh kơ lu bơ̆n.

⁹Lăp kơ bơ̆n 'nĕ kơ hil blah Kră Yang; păng kư̆m 'nĕ kơ hli kơ lu kon pơlei lăm char noh, yua kơ lu sư jing thoi tơmam sa bơ̆n boih, ưh pă đei bu tơgŭm lu sư kĕ blah bơ̆n dơ̆ng păng 'nĕ pă hli Kră Yang oei gah bơ̆n.

¹⁰Kơplah noh lu kon pơlei Isơrael akŭm wă klơ̆m bre sư tơmo, mă-lei đei tơdrong rang mơnhal Kră Yang đei pơdah pơchrang tơ Bơsŭn Anih Akŭm 'bơ̆t anăp lu kon pơlei Isơrael Akŭm.

¹¹Kră Yang khan kơ Môis thoi âu: Kon pơlei 'nâu hil areh păng ưh kơ lui kơ Inh dĭng dang yơ, mă khan Inh đei pơm tơ'bôh tơdrong hlĭch 'bơ̆t anăp lu sư boih ră?

¹²Inh gô ăn kơ kon pơlei âu jĭ lôch hơbuh, Inh gô pơrăm lê̆ dôm tơmam mă lu sư đei, na Inh gô pơjing minh adrĕch lĕch dơ̆ng ih kơdrâ̆m păng pran kơtang hloh kơ lu sư.

¹³Môis tơl Kră Yang thoi âu: Lu kon pơlei char Êyiptơ gô kơtơ̆ng, ih chông tơlĕch lu kon pơlei Isơrael âu hăm tơdrong mơsêh mơyang pran kơtang Ih,

¹⁴păng đei roi tơbăt ăn kơ kon pơlei char 'nâu. Ơ! Kră Yang lu sư băt Ih oei hơdai hăm lu kon pơlei âu, yua kơ Ih tơ'bôh kơ lu sư, hơmơ̆l dơ̆ng boih kơpal lu kon pơlei âu păng Ih yak adrol, jrăng hơmơ̆l gah kơ'năr, jrăng ŭnh gah kơmăng.

¹⁵Tơdah Ih pơlôch đĭ kon pơlei adrĕch 'nâu, minh 'măng, na lu dêh char nai mă kơtơ̆ng boih gah lu sư khan:

¹⁶Kră Yang ưh kơ gơh ôh chông ba lu adrĕch adrung 'nâu mơ̆t tơ lăm dêh char mă sư pơkă wă ăn kơ lu sư; yua kơ thoi noh, sư pơlôch boih lu đe noh tơ lăm char glă.

¹⁷Dang ei, inh apinh Ih, ăn tơdrong mơsêh mơyang pran kơtang Ih tih thoi Ih đei khan:

¹⁸Kră Yang hiơ̆ kơ hil păng 'bĕnh hăm tơdrong 'mêm mơnat; huay kơ jô̆ yo tơdrong yoch; mă-lei Sư ưh kơ jô̆ ôh lu bơngai pơm yoch khan 'lơ̆ng; păng ưh kơ lê̆ pŭ tơdrong yoch đơ̆ng 'bok yă lu sư truh tơ kon sâu sư pêng puăn jơhnơr.

¹⁹Apinh Ih mơnat 'nĕ jô̆ tơdrong kon pơlei âu pơm yoch kiơ̆ thoi tơdrong mơnat tih đơ̆ng Ih, thoi Ih đei mơnat ăn boih kơ lu nhôn đơ̆ng char Êyiptơ sơ̆ khơ̆ dang ei.

²⁰Kră Yang tơl tơwih: Inh ưh kơ jô̆ yoch thoi ih đei apinh.

²¹Mă-lei Inh Kră Yang oei arih na pơkă, tơdrong ư-ang Kră Yang gô 'bĕnh-'bang jơ̆p-jang kơ teh đak,

²²lu iĕm 'bôh boih dôm tơdrong ư-ang, tơdrong hlĭch chrơp Inh đei pơm boih lăm char Êyiptơ păng lăm char glă, lu iĕm đei pơlong lăng Inh mơjĭt wơ̆t păng kuă pă mơ̆ng nơ̆r Inh,

²³lei na lăm lu sư ưh kơ đei minh 'nu bu mă gơh 'bôh char mă Inh đei pơkă wă ăn kơ lu 'bok yă lu sư păng lu bơngai mă ưh kơ chu boih nơ̆r Inh, ưh kơ đei bu mă gơh 'bôh char noh.

²⁴Mă-lei Kalep buăl Inh, chu kiơ̆ lui ngeh kơ nơ̆r Inh tơpă ưh kơ wă kiơ̆ nơ̆r lu đe, na Inh gô chông ba ăn kơ sư mơ̆t lăm char noh, char mă đêl sư đei năm boih, ăn kơ lu adrĕch adrung sư oei jang sa tơ noh.

²⁵Kon pơlei Amalek păng kon pơlei Kanaan oei lăm thŭng; dơning lu iĕm athei kơdŭn tơ rŏng 'biơ̆, năm rok char glă gah đak Dơsĭ 'Brê.

²⁶Kră Yang khan kơ Môis păng Arôn:

²⁷Oei pă dang yơ dơ̆ng Inh gô mơ̆ng lu tơpôl bơngai kơnê̆ âu jŏk? Inh đei kơtơ̆ng boih lu tơpôl kon pơlei Isơrael jŏk chrih kơ Inh.

²⁸Khan bĕ kơ tơpôl kon pơlei: Kră Yang khan thoi âu: Inh pao tơdrong arih Inh na pơkă, Inh gô pơm kơ lu iĕm kiơ̆ thoi nơ̆r mă Inh đei kơtơ̆ng lu iĕm pơm;

²⁹akâu lu iĕm gô pơ̆k lôch tơ lăm char glă âu, dôm lu bơngai jŏk chrih kơ Inh jô̆ đĭ dôm yơ kư̆m lei-lăi, đei jô̆ boih iŏk đơ̆ng 'bar-jĭt sơnăm tơ kơpal,

³⁰na gô ưh kơ gơh mơ̆t oei tơ char mă Inh đei pơkă wă ăn kơ lu iĕm oei, lăp Kalep kon drŏ-nglo Jêphunê păng Jôsuê kon drŏ-nglo Nun đĕch.

³¹Mă-lei Inh gô ăn lu kon hơ'lơ̆p iĕm gô mơ̆t oei tơ lăm char noh mă lu iĕm đei khan: Lu sư jing tơmam đe tơtông tơgar iŏk; đơ̆ng noh lu sư gô oei lăm char mă lu iĕm pơjăm.

³²Bĕ lu iĕm akâu lu iĕm gô pơ̆k lôch tơ lăm char glă 'nâu.

³³Lu kon sâu iĕm gô wei triu lăm char glă 'nâu lăm puăn-jĭt sơnăm lu sư gô pŭ iŏk tơdrong phak đơ̆ng lu iĕm ngôi kư̆ kă ưh kơ wă lui dĭng truh tơ lu iĕm pơ̆k lôch đĭ lăm char glă 'nâu.

³⁴Lu iĕm gô yak dăr lăng hơdôm năr wă khan puăn-jĭt năr păng lu iĕm gô pŭ iŏk tơdrong phak đơ̆ng yoch lu iĕm kơdih dôm yơ, wă khan puăn-jĭt sơnăm, minh sơnăm jô̆ thoi minh năr; kơplah noh lu iĕm băt boih kơ Inh achăng lê̆ iĕm.

³⁵Inh Kră Yang khan boih: Inh gô pơm kơ lu tơpôl adrĕch kon pơlei kơnê̆ 'nâu, mă lu sư đei pơgơ̆p pôm đon pơm kơnê̆ kơ Inh; lu sư gô lôch huach hiong tơ lăm char glă 'nâu.

³⁶Lu bơngai mă Môis đei wơh năm chop dăr lăng char, pơtrŭt lu kon pơlei akŭm pơma jŏk kơ Môis

³⁷păng lu bơngai roi hơlĕnh khan char noh kơnê̆, lu bơngai 'nâu lôch lăm tơdrong kơnê̆ pơmat tơpă 'bơ̆t anăp Kră Yang.

³⁸Mă-lei lăm lu bơngai năm chop dăr lăng char, oei pă Jôsuê, kon drŏ-nglo Nun păng Kalep kon drŏ-nglo Jêphunê oei arih.

³⁹Kơplah Môis roi khan đơ̆ng tơdrong 'nâu ăn kơ đĭ-đăng kon pơlei; đơ̆ng noh đĭ lu kon pơlei nhơ̆m hmoi sơ'ngon dêh tơpă.

⁴⁰Lu kon pơlei iung đơ̆ng hrôih tŏk năm tơ kơpal kông păng khan: Lu nhôn 'nâu gô năm tŏk truh tơ char Kră Yang mă đei pơkă boih, yua kơ lu nhôn pơm yoch boih.

⁴¹Mă-lei Môis khan: Liơ lu iĕm pơm pơhloh kơ nơ̆r Kră Yang tơtă? Tơdrong noh ưh kơ gơh ôh.

⁴²'Nĕ tŏk tơ noh, kơnh hli kơ lu ayăt blah lu iĕm, yua kơ Kră Yang ưh pă oei hơdai iĕm boih.

⁴³To, kon pơlei Amalek păng kon pơlei Kanaan oei 'bơ̆t anăp iĕm, lu iĕm gô pơ̆k lôch kơ đao gưm đĭ, yua kơ lu iĕm blah Kră Yang boih, Kră Yang ưh kơ oei hơdai iĕm.

⁴⁴Mă-lei kon pơlei năm tơ anăp khŏm tŏk kơpal kông noh; gah Hom Tơdrong Pơgơ̆p Kră Yang păng Môis ưh kơ năm ôh đơ̆ng kơđông.

⁴⁵Kon pơlei Amalek păng kon pơlei Kanaan đơ̆ng kông noh jur druh blah prah pơlôch pơrăm lu kon pơlei Isơrael, dĭng truh tơ pơlei Horma.