Read bahnar Jo 15 Bible Online

Jo 15 - bahnar bible

Jo 15

¹Kră Yang khan kơ Môis:

²Khan bĕ kơ kon pơlei Isơrael thoi âu: Mưh iĕm mơ̆t lăm char mă Inh pơkă wă ăn kơ lu iĕm oei,

³lu iĕm pơyơ̆r kơ Kră Yang tơmam soi soh păng ŭnh dah tơmam soi 'buh, noh minh tơmam soi dah pơyơ̆r, dah tơmam soi wă pơsĭt nơ̆r pơkă, dah pơyơ̆r tơmam soi lăm năr kơ̆m tih, lu iĕm 'maih wă pơyơ̆r ăn kơ Kră Yang tơmam soi đei 'bâu phu păng rơmo dah triu,

⁴na bơngai bu wă pơyơ̆r tơmam ăn kơ Kră Yang athei pơyơ̆r tơmam soi phe 'ba dang minh lăm mơjĭt êpha tơpŭng bơlŭ hăm minh lăm puăn hin đak rơmă ôliwơ.

⁵Mưh minh pôm triu kon, pơm tơmam soi 'buh dah hăm tơmam soi nai ih athei pơyơ̆r tơmam soi huch minh lăm puăn lit sik hơmu.

⁶Dah minh pôm triu tơno, na ih athei iŏk tơmam soi pơyơ̆r phe 'ba dang 'bar lăm mơjĭt êpha tơpŭng bơlŭ hăm minh lăm pêng lit rơmă ôliwơ,

⁷păng minh lăm pêng hin sik hơmu pơm tơmam soi huch sa păng pơyơ̆r đei 'bâu phu ăn kơ Kră Yang.

⁸Kơplah ih pơyơ̆r minh pôm rơmo dăm, dah jing soi 'buh, dah tơmam soi kơ tơdrong pơkă lăm tơmam soi bơnê ăn kơ Kră Yang,

⁹thoi noh athei đe pơyơ̆r hơdai rơmo dăm hăm tơmam soi phe 'ba iŏk pêng lăm mơjĭt êpha tơpŭng bơlŭ hrâu hăm minh puăt hin đak rơmă ôliwơ,

¹⁰păng iŏk minh puăt hin sik hơmu pơm tơmam soi huch: Noh boih jing minh tơmam soi yua ŭnh soh pơyơ̆r đei 'bâu phu ăn kơ Kră Yang.

¹¹Đe kư̆m gô pơm thoi noh kơ rim tơmam soi pơyơ̆r rơmo tơno, dah triu tơno, rim tơmam soi hăm triu kon, dah kơ rim bơbe kon.

¹²Kiơ̆ kơ lu iĕm đei pơyơ̆r, iĕm athei pơm hơmet thoi noh kơ rim tŏ tơmam soi noh.

¹³Kơ đĭ-đăng rim bơngai bu mă tơpŭ lăm char athei pơm kiơ̆ thoi noh, tơdah pơyơ̆r tơmam soi soh păng ŭnh, đei 'nhui 'bâu phu ăn kơ Kră Yang.

¹⁴Tơdah đei bơngai tơmoi oei hăm iĕm đunh dah 'nao đơ̆ng chăl âu truh tơ chăl nai, lu sư wă pơyơ̆r tơmam soi 'buh đei 'nhui 'bâu phu ăn kơ Kră Yang, athei pơm kiơ̆ rok thoi lu iĕm đei pơm hơmet noh.

¹⁵Đĭ-đăng lăm tơpôl akŭm đei lăp minh khôi juăt 'nâu đĕch ăn kơ lu iĕm păng lu bơngai tơmoi mă oei hơdai iĕm. 'Nâu boih minh tơdrong juăt pơkă ling-lang kơ adrĕch adrung lu iĕm 'bơ̆t anăp Kră Yang; bơngai tơmoi kư̆m lei-lăi thoi lu iĕm mơ̆n.

¹⁶Gô đei minh khôi juăt păng tơdrong juăt lei-lăi ăn kơ lu iĕm păng kơ lu bơngai tơmoi mă oei hơdai iĕm.

¹⁷Kră Yang kư̆m khan kơ Môis thoi âu:

¹⁸Khan bĕ kơ lu kon pơlei adrĕch bơngai Isơrael thoi âu: Tơdah lu iĕm mơ̆t boih lăm char mă Inh đei chông anhăk lu iĕm mơ̆t,

¹⁹păng tơdah iĕm sa đơ̆ng char noh, lei lu iĕm athei iŏk minh puăt pơm tơmam soi pơyơ̆r ăn kơ Kră Yang.

²⁰Iĕm iŏk minh tơpei 'bĕng wă pơm tơmam soi, wă khan đơ̆ng tơpŭng blŭng-a iĕm tam mă bơlŭ hrâu; lu iĕm pơyơ̆r lei-lăi thoi tơmam soi đơ̆ng anih đe preh 'ba noh mơ̆n.

²¹Đơ̆ng jơhnơr âu truh tơ jơhnơr ning-mônh, lu iĕm athei pơyơ̆r yơ̆r ti tơpơng ăn kơ Kră Yang tơmam soi gah tơpŭng phe 'ba blŭng-a lu iĕm kĕch yuă.

²²Tơdah lu iĕm đei pơm yoch glăi 'bơm, ưh kơ kĕ wei răk dôm tơdrong juăt pơkă 'nâu mă Kră Yang đei pơkă boih kơ Môis,

²³wă khan dôm tơdrong kiơ mă Kră Yang đei tơtă ăn boih kơ Môis wă roi tơbăt ăn kơ iĕm, iŏk đơ̆ng năr Kră Yang tơbăt dôm khôi juăt 'nâu kơ ning-mônh kơ lu adrĕch adrung gô truh đơ̆ng rŏng kơ lu iĕm,

²⁴tơdah tơdrong yoch glăi hơch 'bơm mă kon pơlei ưh tam băt, lei đĭ-đăng kơ bơngai tơpôl kiơ̆ nơ̆r tơtă athei yua minh pôm rơmo dăm pơm tơmam soi 'buh đei 'nhui 'bâu phu ăn kơ Kră Yang, hơdai hăm tơmam soi phe 'ba pham hăm tơmam soi huch; păng minh pôm bơbe tơno pơm tơmam soi huai tơdrong yoch.

²⁵'Bok soi gô soi sơmah huai iŏk đơ̆ng tơdrong yoch ăn kơ đĭ-đăng tơpôl kon pơlei Isơrael, lei na tơdrong yoch đĭ tơpôl kon pơlei noh gô mơnat ăn, yua kơ noh tơdrong yoch glăi hơch 'bơm păng kon pơlei đei anhăk ba 'bơ̆t anăp Kră Yang tơmam soi kơdih, wă khan tơmam soi yua ŭnh soh pơyơ̆r, hơdai hăm tơmam soi huai tơdrong yoch.

²⁶Đĭ-đăng lu kon pơlei Isơrael păng lu bơngai tơmoi mă oei hơdai lu sư gô klaih đơ̆ng yoch, yua kơ đơ̆ng kon pơlei glăi 'bơm pơm yoch boih.

²⁷Tơdah đei minh 'nu glăi hơch 'bơm pơm yoch, sư athei pơyơ̆r minh pôm bơbe akăn truh minh sơnăm pơm tơmam soi huai tơdrong yoch;

²⁸'Bok soi gô soi sơmah huai yoch ăn kơ bơngai mă glăi 'bơm pơm yoch thoi noh 'bơ̆t anăp Kră Yang păng dah đei soi sơmah huai đơ̆ng yoch thoi noh na bơngai noh gơh klaih đơ̆ng yoch.

²⁹Khôi juăt 'nâu yua kơ rim 'nu bơngai hơch 'bơm kơ pơm yoch mă tơdah glăi 'bơm pơm yoch, kư̆m gô pơm lei-lăi minh pôm khôi juăt kơ lu iĕm bơngai Isơrael dah lu bơngai tơmoi mă tơpŭ lăm char âu.

³⁰Mă-lei tơdah đei bơngai bu, kon pơlei Isơrael dah lu bơngai tơpŭ lăm char 'nâu, pơrơ̆ng pơm yoch, kuă kơ chu Kră Yang; bơngai noh gô tơlĕch sư đơ̆ng adrĕch kon pơlei sư kơdih,

³¹yua kơ sư kuă kơ mơ̆ng kiơ̆ nơ̆r Kră Yang păng pơm glăi kơ nơ̆r Kră Yang tơtă; bơngai noh ăn đe pơrăm lê̆ sư tơdrong yoch kơnê̆ sư pơm gô tuh kơ sư kơdih.

³²Kơplah lu kon pơlei bơngai Isơrael oei lăm char glă, tơ'bơ̆p minh 'nu bơngai dônh 'long ŭnh lăm năr Sa'bat,

³³lu bơngai mă tơ'bơ̆p bơngai noh oei dônh 'long ŭnh chông ba sư tơ Môis, Arôn păng tơ đĭ-đăng khŭl tơpôl akŭm.

³⁴Đe rôp chĭt bơngai noh, yua kơ tơdrong đe pơm kơ sư noh tam mă pơsĭt.

³⁵Kră Yang khan kơ Môis thoi âu: Bơngai 'nâu athei pơlôch, đĭ-đăng khŭl tơpôl akŭm athei klơ̆m tơmo kơ sư tơ đaih kơđông.

³⁶Thoi noh, na khŭl tơpôl akŭm chông sư tơ đaih kơ kơđông linh na klơ̆m sư păng tơmo, na sư lôch, thoi Kră Yang đei khan kơ Môis.

³⁷Kră Yang khan dơ̆ng kơ Môis thoi âu:

³⁸Ih athei khan ăn kơ kon pơlei Isơrael păng athei lu sư sĭt reng 'bơ̆t tơdrơi hơbĕn ao lu sư, iŏk đơ̆ng jơhnơr 'nâu truh tơ ning-mônh, sĭt reng noh iŏk brai dreng plĕnh,

³⁹lu iĕm athei đei sĭt reng noh tơ hơbĕn dah ao, mưh iĕm lăng 'bôh reng noh lu iĕm gô 'blŏk kơ dôm khôi juăt nơ̆r Kră Yang tơtă păng pơm kiơ̆, ưh kơ kiơ̆ jơhngơ̆m lăp măt lăng, ngăl pơm kơ iĕm pơm yoch ngôi kư̆ kă.

⁴⁰Thoi noh, lu iĕm gô 'blŏk păng pơm kiơ̆ dôm tơdrong inh tơtă păng oei sa rơgoh ăn kơ Kră Yang 'Bok Kei-Dei iĕm.

⁴¹Inh boih, Kră Yang, 'Bok Kei-Dei lu iĕm Tơ'ngla mă đei chông ba tơlĕch iĕm đơ̆ng dêh char Êyiptơ wă pơm Kră Yang 'Bok Kei-Dei lu iĕm. Inh boih Kră Yang, 'Bok Kei-Dei lu iĕm.