Read bahnar Jo 16 Bible Online

Jo 16 - bahnar bible

Jo 16

¹Kôrê kon drŏ-nglo Ishar, sâu Kôhat, sâu i Lêwi, chông ba Đathan păng Abiram kiơ̆ sư; Abiram, Đathan kon drŏ-nglo Êliap, hơdai hăm Ôn, kon drŏ-nglo Pêlet, kon sâu Rubên.

²Lu bơngai âu păng hăm 'bar-hrĕng pơđăm-jĭt 'nu lăm kon pơlei Isơrael, bơngai mă đe đei rơih iŏk pơm yŏng pơgơ̆r lu bơngai jang lăm khŭl tơpôl đe ư-ang, lu sư kư̆m pôm đon năm pơjah pơjăng hăm Môis păng Arôn,

³na khan: Lê̆ pă yua kơ đĭ-đăng khŭl kon pơlei 'lơ̆ng rơgoh ngăl păng Kră Yang oei lăm lu sư. Yua kơ kiơ lu iĕm oei wă pơang kơdih tơ kơpal lu bơngai Kră Yang đei akŭm?

⁴Môis kơtơ̆ng tơdrong noh, sư kŭp kơ̆l drap tơ teh,

⁵khan kơ Kôrê păng đĭ-đăng lu bơngai pôm đon hăm sư thoi âu: Pơgê dơning Kră Yang gô tơ'bôh ăn bơngai bu gah Sư mă 'lơ̆ng rơgoh; Sư gô ăn kơ lu bơngai noh gô năm jê̆ Sư, wă khan ăn kơ bơngai mă Sư đei rơih iŏk boih năm jê̆ Sư.

⁶Ơ Kôrê, pơm bĕ tơdrong 'nâu: Ih păng đĭ-đăng lu bơngai kiơ̆ ih iŏk bĕ gĕl tah nhang pơgang 'bâu phu.

⁷Pơgê dơning tah ŭnh lăm ge iĕ păng dan pơgang 'bâu phu kơpal ŭnh 'bơ̆t anăp Kră Yang. Bơngai bu mă Kră Yang rơih iŏk, noh boih bơngai 'lơ̆ng rơgoh. Ơ kon sâu Lêwi, lê̆ pă!

⁸Môis khan kơ Kôrê: Ơ kon sâu Lêwi, dang ei mơ̆ng bĕ:

⁹Gah lu iĕm, Kră Yang 'Bok Kei-Dei Isơrael đei 'măn lê̆ iĕm pha boih đơ̆ng khŭl kon pơlei bơngai Isơrael păng ăn kơ lu iĕm gơh năm jê̆ Sư wă bơ̆jang kơ Sư lăm Bơsŭn Kră Yang, wă kơ iĕm bơ̆jang awih awăn 'bơ̆t anăp kon pơlei, tơdrong noh iĕm lăng iĕ dêh hă?

¹⁰Kră Yang krao ih păng đĭ-đăng 'nhŏng oh ih kon sâu Lêwi năm jê̆ Sư, lu iĕm oei chă tơdrong jang thoi 'bok soi dơ̆ng hă?

¹¹Yua kơ thoi noh ih păng lu khŭl kiơ̆ ih oei pơgơ̆p chă đon wă blah Kră Yang! Arôn noh bu mă lu iĕm hil jŏk kơ sư?

¹²Môis athei đe năm krao bre Đathan hăm Abiram, kon drŏ-nglo Êliap; mă-lei bre sư tơl: Nhi ưh kơ năm ôh.

¹³Tơdrong 'nâu iĕ đĕch hă? Ih chông anhăk nhôn lĕch đơ̆ng dêh char đak toh đak sut đei tơmam sa rơkah rơkai, wă pơlôch lu nhôn tơ lăm char glă, mă ih kư̆m oei 'maih pơm yŏng pơjuă kơ̆l nhôn dơ̆ng hă?

¹⁴Tơpă, ih ưh kơ đei chông ba nhôn tơ lăm char mă đak toh đak sut ôh, ih ưh kơ đei pơjao ăn kơ lu nhôn mir chŭn pơgar wă kơ jang sa ôh! Ih wă kuek lê̆ măt lu nhôn hă? Lu nhôn ưh kơ wă năm ôh.

¹⁵Môis blĕk dêh krao apinh Kră Yang thoi âu: Ih lê̆ pă iŏk dôm tơmam lu sư pơyơ̆r; inh ưh kơ đei rôp iŏk minh pôm kon aseh iĕ đơ̆ng lu sư ôh păng inh kư̆m ưh kơ đei pơrăm bu lăm lu sư.

¹⁶Môis khan kơ Kôrê: Dơning ih păng lu khŭl bơngai kiơ̆ ih hăm Arôn năm 'bơ̆t anăp Kră Yang,

¹⁷rim 'nu athei chĕp gĕl tah pơgang 'bâu phu tơ lăm noh, đơ̆ng noh na rim 'nu athei pơyơ̆r gĕl păng pơgang 'bâu phu noh 'bơ̆t anăp Kră Yang, wă khan đei 'bar-hrĕng pơđăm-jĭt tŏ gĕl iĕ tah pơgang 'bâu phu. Ih păng Arôn, kư̆m athei đei gĕl iĕ tah pơgang 'bâu phu kơdih.

¹⁸Thoi noh, rim 'nu iŏk gĕl tah ŭnh lăm noh, tah pơgang 'bâu phu kơpal, đơ̆ng noh năm dơ̆ng 'bơ̆t anăp Bơsŭn Anih Akŭm păng Môis hăm Arôn.

¹⁹Kơplah Kôrê pơtơm akŭm, lu kon pơlei iung pơma blah Môis păng Arôn 'bơ̆t 'măng Bơsŭn Anih Akŭm; tơdrong rang hơdah Kră Yang pơchrang kơ đĭ-đăng khŭl kon pơlei akŭm.

²⁰Kră Yang khan kơ Môis păng Arôn thoi âu:

²¹Weh bĕ đơ̆ng tơpôl kon pơlei akŭm âu, na Inh gô pơlôch lu sư wă loh ưh kơ tam kơ băt.

²²Bre sư drap tơ teh kơkuh păng khan: Ơ Kră Yang 'Bok Kei-Dei, Ih Kră Yang 'Bok Kei-Dei ăn tơdrong arih kơ lu sĕch akar kon bơngai! Lăp minh 'nu đĕch pơm yoch lei Ih wă hil mĭl kơ đĭ-đăng kon pơlei hă?

²³Kră Yang khan kơ Môis:

²⁴Khan bĕ kơ kon pơlei lu akŭm thoi âu: Athei weh ataih bĕ dơ̆ng anih Kôrê, Đathan păng Abiram.

²⁵Môis iung, năm hloi tơ Đathan păng Abiram; lu kră pơlei bơngai Isơrael kiơ̆ sư.

²⁶Sư khan kơ tơpôl kon pơlei akŭm thoi âu: Dang ei athei weh bĕ ataih đơ̆ng anih bơsŭn lu bơngai pơm kơnê̆ âu păng kư̆m 'nĕ kơ hơtŭt 'bơm tơmam kiơ lu sư, kơnh hli kơ iĕm lôch yua kơ tơdrong yoch lu sư.

²⁷Thoi noh, lu kon pơlei weh ataih đơ̆ng bơsŭn anih Kôrê, Đathan păng Abiram. Đathan păng Abiram dơ̆ng 'bơ̆t măng bơsŭn hơdai hăm kon akăn sư, kon drŏ-nglo sư, kon hơ'lơ̆p oei iĕ sư kơdih.

²⁸Môis khan dơ̆ng thoi âu: Đơ̆ng tơdrong 'nâu lu iĕm gô băt Kră Yang đei wơh inh pơm tơdrong 'nâu păng inh ưh kơ đei layơ pơm kiơ̆ kơ inh kơdih,

²⁹tơdah lu đe noh lôch kư̆m thoi lu bơngai nai lôch, tơdah lu sư kư̆m chu pŭ thoi lu bơngai nai pŭ, lei Kră Yang ưh kơ đei wơh athei inh.

³⁰Mă-lei tơdah Kră Yang pơm minh tơdrong kiơ 'nao, tơdah teh ha 'bơ̆r luăn lu sư păng dôm tơmam kiơ lu sư đei, kơplah lu sư oei arih mă-lei jur lăm anih lôch, lu iĕm gô băt lu bơngai 'nâu ưh kơ chu păng pơjăm Kră Yang.

³¹Lăp Môis pơma tơdrong 'nâu 'nao wă tôch, teh tơklă lu sư oei dơ̆ng hơđang hloi;

³²teh ha 'bơ̆r luăn lu sư, hnam dơnŏ lu sư đĭ-đăng mŭk tơmam lu sư păng đĭ-đăng bơngai mă kiơ̆ Kôrê.

³³Lu bơngai noh oei arih păng đĭ-đăng mŭk tơmam lu sư huŏng lăm pơlei lôch; teh 'bŭ klơ̆p pơđĭ lu sư hiong tôch ưh pă đei oei hơdai kon pơlei.

³⁴Đĭ-đăng kon pơlei bơngai Isơrael oei tăp dăr kơtơ̆ng nơ̆r lu sư ôr, kơdâu ôn đĭ, yua kơ lu sư khan: Lu bơ̆n athei kơchăng bĕ, kơnh teh kư̆m luăn đĭ lu bơ̆n hai!

³⁵Đơ̆ng noh, đei ŭnh đơ̆ng Kră Yang dơhlông sa pơđĭ 'bar-hrĕng pơđăm-jĭt 'nu lu bơngai drŏ-nglo mă đei soh pơyơ̆r tơmam 'bâu phu.

³⁶Kră Yang khan kơ Môis:

³⁷Khan bĕ kơ Êlêasar kon drŏ-nglo Arôn 'bok soi, athei sư kơih iŏk bĕ lu gĕl soh pơgang 'bâu phu đơ̆ng lăm ŭnh sa noh păng tuh lê̆ ngar lăm lu gĕl iĕ noh tơ ataih, yua kơ lu gĕl iĕ noh jing 'lơ̆ng rơgoh boih,

³⁸gah lu gŏl đơ̆ng lu bơngai pơm yoch tah pơgang 'bâu phu păng soh pơyơ̆r boih jô̆ dĭng đĭ chăl arih lu sư, ih athei iŏk tơtang mă hơtăng na gom chơnang soi. Yua kơ lu gŏl noh pơyơ̆r boih 'bơ̆t anăp Kră Yang jing tơmam rơgoh; lu gĕl tơtang sư hơtăng noh wă pơm tơdra tơ'blŏk ăn kơ bơngai Isơrael.

³⁹Thoi noh, Êlêasar, 'bok soi, iŏk lu gĕl tah pơgang 'bâu phu đe pơm păng kong mă đêl ŭnh sa đe soh pơyơ̆r pơgang 'bâu phu na sư tơtang jing hơtăng yua wă gom chơnang soi.

⁴⁰Noh boih tơmam wă tơ'blŏk hơdơ̆r ăn kơ bơngai Isơrael, wă ưh kơ đei bu 'nguaih kơ kon sâu Arôn mă gơh năm jê̆ soh pơyơ̆r pơgang 'bâu phu 'bơ̆t anăp Kră Yang, hli kơnh kư̆m rok thoi Kôrê păng lu bơngai kiơ̆ hơdai sư, kiơ̆ thoi nơ̆r Kră Yang đei khan ăn boih kơ Môis.

⁴¹Pơgê dơning, đĭ-đăng lu khŭl bơngai Isơrael pơma jŏk kơ Môis păng Arôn khan: Măr iĕm pơlôch boih kon pơlei Kră Yang.

⁴²Kơplah lu khŭl kon pơlei oei pơma kơ Môis păng Arôn, lu sư lăng tơ gah Bơsŭn Anih Akŭm 'bôh hơmơ̆l gom Bơsŭn păng đei tơdrong ư-ang rang mơnhal Kră Yang pơchrang.

⁴³Môis păng Arôn dơ̆ng 'bơ̆t anăp Bơsŭn Anih Akŭm,

⁴⁴Kră Yang khan kơ Môis:

⁴⁵Kơdâu weh bĕ đơ̆ng lu bơngai tơpôl akŭm âu; na Inh gô pơlôch pơrăm lê̆ lu sư ưh kơ tam băt. Mă-lei bre sư drap tơ teh kơkuh,

⁴⁶na Môis khan kơ Arôn: Iŏk bĕ gĕl soh pơgang 'bâu phu ih, tơ̆k ŭnh iŏk đơ̆ng chơnang soi, dan pơgang 'bâu phu kơpal, mă tĕnh tĕnh năm tơ lu khŭl tơpôl oei akŭm to păng pơyơ̆r huai tơdrong yoch lu sư; yua kơ tơdrong Kră Yang hil mĭl boih păng tơdrong gleh wă truh.

⁴⁷Arôn iŏk gĕl pơgang 'bâu phu thoi Môis đei athei sư, kơdâu năm truh tơ lu tơpôl kon pơlei; to tơdrong gleh truh boih tơ lu kon pơlei. Arôn iŏk pơgang 'bâu phu tah, na pơyơ̆r huai tơdrong yoch kơ kon pơlei.

⁴⁸Sư dơ̆ng tŏk-bŏk lu bơngai lôch păng bơngai arih, na tơdrong gleh noh khơ̆t pơdơh hĭ.

⁴⁹Đei mơjĭt-puăn rơbâu tơpơh-hrĕng 'nu bơngai lôch yua kơ tơdrong gleh truh 'nâu; ưh kơ jô̆ lu bơngai lôch yua kơ Kôrê.

⁵⁰Đơ̆ng noh, Arôn wih brŏk tơ Môis tơ 'măng Bơsŭn Anih Akŭm, na tơdrong pơrăm noh pơdơh.