Read bahnar Jo 17 Bible Online

Jo 17 - bahnar bible

Jo 17

¹Kră Yang khan kơ Môis:

²Khan bĕ kơ kon pơlei bơngai Isơrael păng iŏk bĕ đơ̆ng lu sư minh pôm 'long jra; wă khan mơjĭt-'bar tŏ 'long jra đơ̆ng lu yŏng kơdră rim kơ adrĕch.

³Ih athei chih anăn tơ rim 'long jra, 'long jra bu chih anăn sư păng chih anăn Arôn tơ 'long jra bơngai Lêwi; rim adrĕch đei minh pôm 'long jra,

⁴ih athei 'măn lê̆ lu 'long jra noh 'bơ̆t anăp Hom Tơdrong Pơgơ̆p, anih mă Inh ngăl tơ'bơ̆p ih.

⁵Bơngai bu mă inh rơih iŏk, 'long jra noh đei bluh pơkao; thoi noh Inh wă chĭt lê̆ 'bơ̆r lu bơngai Isơrael mă đei jŏk pơjah hăm lu iĕm.

⁶Môis khan kơ kon pơlei Isơrael, hăm đĭ-đăng lu yŏng kơdră, kiơ̆ kơ rim adrĕch sư kơdih, năm ba 'long jra, wă khan mơjĭt-'bar tŏ 'long jra, 'long jra Arôn dan tŏk-bŏk lu 'long jra noh.

⁷Môis tah lu 'long jra noh 'bơ̆t anăp Kră Yang tơ lăm Bơsŭn Roi Tơbăt.

⁸Truh pơgê Môis mơ̆t tơ lăm Bơsŭn Roi Tơbăt 'bôh 'long jra Arôn adrĕch Lêwi đei bluh pơkao; chơnăt bluh, đei pơkao păng plei đum.

⁹Môis iŏk lu 'long jra đơ̆ng anăp Kră Yang tơlĕch tơ đaih, 'bơ̆t anăp bơngai Isơrael. Lu sư lăng păng lu sư iŏk 'long jra lu sư kơdih.

¹⁰Kră Yang khan kơ Môis: Iŏk bĕ 'long jra Arôn na dan 'bơ̆t Hom Roi Tơbăt, wă răk tơ'blŏk pơm tơdra tơ'bôh kơ kon sâu wă iung blah, “ih athei khă chĭt lê̆ nơ̆r lu sư jŏk iung blah pơjah hăm Inh, kơnh hli kơ lu sư lôch.”

¹¹Môis pơm thoi noh, wă khan pơm kiơ̆ thoi Kră Yang đei tơtă kơ sư boih.

¹²Bơngai Isơrael hli tơrơ khan kơ Môis: Âu 'nâu, lu nhôn gô lôch, lu nhôn lôch răm, lu nhôn gô lôch hiong đĭ-đăng!

¹³Dah bơngai bu mă năm jê̆ bơsŭn Kră Yang gô lôch, na lu nhôn gô lôch đĭ hă?