Read bahnar Jo 20 Bible Online

Jo 20 - bahnar bible

Jo 20

¹Đĭ-đăng khŭl adrĕch bơngai Isơrael truh tơ lăm char glă Sin. Lăm khei mônh păng pơdơh tơ Kades. Miriam lôch păng 'bŭ hloi tơ noh.

²Kơplah noh, đak nhă ưh kơ đei kơ lu bơngai akŭm wă nhă; lu sư iung pơma kơ Môis păng Arôn.

³Kon pơlei hil kơ Môis păng khan: Kuă kơ kiơ lu nhôn lôch hơdai lu 'nhŏng oh nhôn mă lôch boih 'bơ̆t anăp Kră Yang sơ̆!

⁴Yua kơ kiơ ih chông ba lu khŭl kon pơlei âu năm tơ char glă âu, pơm ăn kơ lu nhôn păng sem dơrong nhôn lôch?

⁵Yua kơ kiơ ih chông lu nhôn lĕch đơ̆ng dêh char Êyiptơ na năm ba lu nhôn tơ anih kơnê̆ dêh thoi âu, anih mă ưh kơ gơh rei 'ba păng ưh kơ đei 'long plei hơra, dah hơmu, plei gărnăt păng ưh kơ đei đak nhă?

⁶Môis păng Arôn kơdŭn weh đơ̆ng anăp lu bơngai tơpôl akŭm ei, năm 'bơ̆t anăp 'măng Bơsŭn Anih Akŭm na kŭp kơ̆l drap bon tơ teh; păng đei tơdrong rang hơdah đơ̆ng Kră Yang pơchrang tơ măr sư.

⁷Kră Yang khan kơ Môis thoi âu:

⁸Iŏk bĕ 'long jra ih, hăm Arôn 'nhŏng ih, năm akŭm bĕ kon pơlei, na măr iĕm athei khan kơ tơmo 'bơ̆t anăp kon pơlei, na tơmo noh đei đak lĕch; ih gô pơm kơ tơmo noh đei đak lĕch ăn kơ kon pơlei hăm lu sem dơrong nhă.

⁹Môis iŏk 'long jra đơ̆ng anăp Kră Yang kiơ̆ thoi Kră Yang đei athei sư.

¹⁰Môis păng Arôn krao akŭm kon pơlei năm dơ̆ng 'bơ̆t anăp tơmo noh păng khan: Ơ kon pơlei arăng kơ̆l! Mơ̆ng bĕ! Nhi hăm gơh pơm ăn kơ tơmo 'nâu đei đak lĕch ăn kơ iĕm hă?

¹¹Môis yơ̆r ti sư teh tơmo 'bar wơ̆t hăm 'long jra sư. Đak lĕch ro hloi lơ tơpă, kon pơlei nhă păng lu sem dơrong sư kư̆m nhă.

¹²Kră Yang khan dơ̆ng kơ Môis păng Arôn thoi âu: Yua kơ măr iĕm ưh kơ lui kơ Inh ưh kơ wă pôk pơyom Inh 'lơ̆ng rơgoh, 'bơ̆t anăp kon pơlei Isơrael lei na măr iĕm ưh kơ gơh chông kon pơlei âu năm truh tơ char mă Inh đei pơkă wă ăn kơ lu iĕm.

¹³'Nâu jing đak Mêriba, a wă khan anih mă kon pơlei Isơrael hil plơ̆ kơ Kră Yang; Kră Yang pơdah akâu sư kơdih 'lơ̆ng rơgoh 'bơ̆t anăp kon pơlei.

¹⁴Đơ̆ng pơlei Kades, Môis wơh bơngai năm roi tơbăt ăn kơ pơtao Eđôm thoi âu: Isơrael noh oh ih, đei khan thoi âu: Ơ pơtao ih băt boih đei tơdrong pơmat-tat truh kơ lu nhôn,

¹⁵tơdrong 'bok yă lu nhôn năm boih tơ dêh Êyiptơ, lu nhôn oei tơ noh kư̆m đunh, mă-lei kon pơlei lăm dêh char noh pơm kơnê̆ kơ nhôn păng 'bok yă lu nhôn.

¹⁶Lu nhôn đei krao apinh Kră Yang; sư kơtơ̆ng boih nơ̆r lu nhôn krao khan, na ăn hloi đei minh 'nu linh jang chông tơlĕch nhôn đơ̆ng dêh char Êyiptơ. 'Nâu, dang ei lu nhôn oei lăm pơlei Kades, noh jĭ minh pôm pơlei oei jih sơlam char iĕm.

¹⁷Apinh ih asong ăn kơ lu nhôn rok trong kiơ̆ lăm jih char ih ơ pơtao! Lu nhôn ưh kơ đei yak rok mir chŭn, dah pơgar hơmu, lu nhôn kư̆m ưh kơ đei chă chhŏ nhă đak sơlŭng iĕm; lu nhôn gô yak rok trong tih ih, lu nhôn ưh kơ weh-woh 'ma, 'ngiĕo ôh dĭng yak hlôi đĭ kơ dêh char ih.

¹⁸Mă-lei pơtao Eđôm khan kơ sư: Ih ưh kơ gơh yak rok trong sơlam noh, tơdah ưh kơ chu inh gô iŏk đao gưm năm găn tơblah hăm ih.

¹⁹Kon pơlei Isơrael tơl khan: Lu nhôn gô yak rok trong tih; tơdah lu nhôn dah lu sem dơrong nhôn chă nhă đak iĕm, lu nhôn ăn jên. Apinh ăn kơ lu nhôn hơya yak jơ̆ng hoh rok noh, ưh kơ đei kiơ.

²⁰Mă-lei sư tơl khan: Ih ưh kơ gơh yak rok noh ôh! Sư chông ba linh pơlei lơ tơpă, ti lu sư chĕp đao kơtuang ngăl, lĕch năm găn kon pơlei Isơrael.

²¹Thoi noh pơtao Eđôm oei sơngah ưh kơ ăn Isơrael yak rok sơlam dêh sư; Isơrael weh đơ̆ng sư.

²²Đĭ-đăng lu khŭl tơpôl kon pơlei Isơrael yak năm đơ̆ng pơlei Kades truh tơ kông Hôr.

²³Kră Yang khan kơ Môis păng Arôn 'bơ̆t kơpal kông Hôr, tơ hơdral dêh Eđôm, thoi âu:

²⁴Arôn gô lôch brŏk tơ anih yă 'bok sư, yua kơ sư ưh kơ gơh kơ mơ̆t ôh tơ dêh char mă inh wă ăn kơ bơngai Isơrael yua kơ sư sơngah pơjah kơ nơ̆r Inh tơtă tơ anih đak Mêriba.

²⁵Chông bĕ Arôn păng Êlêasar kon drŏ-nglo sư, athei tŏk tơ kông Hôr;

²⁶plôh bĕ ao tai Arôn na pơhrŭk ăn kơ Êlêasar, kon drŏ-nglo sư, Arôn gô lôch tơ anih noh,

²⁷Thoi noh, Môis pơm rok thoi Kră Yang athei sư; pêng 'nu sư tŏk tơ kơpal kông Hôr, đĭ-đăng khŭl akŭm 'bôh,

²⁸Môis plôh lê̆ ao tai đơ̆ng Arôn, pơhrŭk ăn kơ Êlêasar, kon drŏ-nglo sư. Arôn lôch tơ noh, đe 'bŭ sư tơ kơ̆l kông; đơ̆ng noh Môis păng Êlêasar jur.

²⁹Đĭ-đăng kon pơlei Isơrael akŭm 'bôh Arôn kơtĕch jơhngơ̆m boih, na nhơ̆m hmoi grong pơdong sư lăm pêng-jĭt năr.