Read bahnar Jo 21 Bible Online

Jo 21 - bahnar bible

Jo 21

¹Kơplah pơtao Arat, bơngai Kanaan, oei tơ gah gơal, kơtơ̆ng khan bơngai Isơrael yak năm rok trong Atharim, lei sư năm găn blah bơngai Isơrael, sư kư̆m đei rôp lu mơ'nah pơm bơnă.

²Lu bơngai Isơrael pơma pơkă hăm Kră Yang khan: Tơdah Ih jao ăn kon pơlei âu lăm ti Inh, nhôn gô pơrăm đĭ lu pơlei tih sư.

³Kră Yang iŏk nơ̆r apinh đơ̆ng kon pơlei Isơrael na jao ăn kon pơlei Kanaan. Đe pơlôch đĭ kon pơlei păng pơrăm đĭ lu pơlei tih sư, anăn anih 'nâu Hormaa

⁴Đơ̆ng kông Hôr kon pơlei Isơrael yak năm trong đak Dơsĭ 'Brê wă wer dăr kơ char Eđôm. Tơ rok trong lu kon pơlei ơh klai đĭ pă kĕ.

⁵Lei na, lu kon pơlei pơma hil plơ̆ kơ Kră Yang 'Bok Kei-Dei păng Môis khan: Liơ ih chông tơlĕch nhôn đơ̆ng dêh Êyiptơ wă pơlôch nhôn lăm char glă hă? Yua kơ tơ âu por sŏng 'bĕng sa sap ưh kơ đei, đak kư̆m ưh kơ đei păng lu nhôn đĭ bơ̆l boih kơ sa tơmam sa tơdrong kơ đei lâu.

⁶Kră Yang ăn 'bih tang truh choh kon pơlei Isơrael đei lơ bơngai lôch kơ 'bih choh,

⁷kon pơlei kơdâu tơkan tơ Môis păng khan: Lu nhôn pơm glăi yoch boih pơma hil plơ̆ kơ Kră Yang păng ih. Krao khan apinh Kră Yang bĕ, wă kơ sư pơm kơ 'bih 'nâu weh tơ nai ataih đơ̆ng lu nhôn. Môis krao khan apinh ăn kơ kon pơlei.

⁸Kră Yang khan kơ Môis thoi âu: Ih athei pơm minh dăng rup 'bih tang, na ih tơ'băk sư tơ tơ̆r 'long gơgiĕr. Tơdah bơngai bu 'bih choh sư athei lăng tơ 'bih noh, sư gô arih.

⁹Thoi ei, Môis pơm minh dăng rup 'bih tang hling hăm kong, na tơ'băk tơ tơ̆r 'long gơgiĕr; bơngai bu mă 'bih choh sư boih, sư lăng tơ 'bih kong noh lei sư arih.

¹⁰Đơ̆ng noh, kon pơlei yak năm păng oei pơdơh tơ Ôbôt.

¹¹Đơ̆ng Ôbôt lu sư yak năm oei pơdơh tơ Iyê Abarim, tơ char glă, tơklă char Môap gah măt 'năr lĕch.

¹²Lu sư yak đơ̆ng noh năm oei pơdơh tơ lăm thŭng Sêret.

¹³Đơ̆ng noh lu sư yak năm oei pơdơh tơ pah to đak krong Arnôn, oei tơ lăm char glă, să truh tơ char Amôrit; yua kơ đak Krong Arnôn hơdral hăm char Môap păng kon pơlei Amôrit.

¹⁴Yua kơ noh đe đei chih boih sơ̆p hla bơar anăn Tơdrong Kră Yang Tơblah khan thoi âu: Wahep oei lăm Supha păng lăm thŭng đak Krong Arnôn,

¹⁵Păng thŭng glă truh tơ Ar păng tơ'bưh 'bơm hơdral char Môap.

¹⁶Đơ̆ng anih noh lu kon pơlei Isơrael yak năm dơ̆ng truh tơ Ber, b noh boih hơlŭng đak mă Kră Yang pơma hăm Môis khan thoi âu: Pơpôi akŭm bĕ lu kon pơlei, Inh gô ăn kơ lu sư đak nhă.

¹⁷Kơplah noh lu bơngai Isơrael hat hơri tơdrong âu: Ơ sơlŭng đak, bluh đak bĕ! Hat hơri kơ sư bĕ!

¹⁸Hơlŭng đak mă lu yŏng kơdră sir boih, lu kon pơtao kư̆m sir boih sơlŭng đak. Hăm 'long jra pơtao păng hăm 'long jra lu sư. Đơ̆ng noh lu sư lĕch đơ̆ng char glă na năm tơ Mathana.

¹⁹Đơ̆ng char glă hơloh năm tơ Matana; đơ̆ng Matana năm truh tơ Nahalien; đơ̆ng Nahalien năm truh tơ Bamôt;

²⁰đơ̆ng Bamôt truh tơ thŭng hơdral char Môap, tơ kơpal kông Pisga, tơ anih đe lăng tơmang 'bôh đĭ char glă.

²¹Bơngai Isơrael wơh bơngai năm tơbăt ăn kơ Sihôn, pơtao bơngai Amôrit khan:

²²Ăn kơ lu nhôn yak rok char ih, lu nhôn ưh kơ mơ̆t ôh tơ chŭn mir dah lăm pơgar hơmu păng lu nhôn kư̆m ưh kơ đei wă chă nhă đak sơlŭng iĕm, lu nhôn kư̆ kơ yak rok trong tih yak tơpăt dĭng hloh hlôi kơ char ih.

²³Mă-lei Sihôn ưh kơ ăn kơ lu bơngai Isơrael yak rok kiơ̆ trong lăm char sư, akŭm đĭ lu kon pơlei năm găn lu bơngai Isơrael gah lăm char glă; tơ Jahas na tơblah hăm lu bơngai Isơrael.

²⁴Isơrael iŏk đao gưm tơblah pơrăm na iŏk hloi char noh đơ̆ng đak Krong Arnôn truh tơ Krong Jabôk, truh tơ hơdral char kon pơlei Ammôn; yua kơ dur hơdral char lu kon pơlei Ammôn kơjăp.

²⁵Bơngai Isơrael blah iŏk đĭ lu pơlei tih păng oei hloi tơ lăm pơlei tih bơngai Amôrit oei tơ lăm lu pơlei tih Hesbôn păng kư̆m oei jơ̆p lăm lu pơlei iĕ hai.

²⁶Yua kơ Hesbôn pơlei tih Sihôn, pơtao bơngai Amôrit, bơngai mă đei tơblah hăm char Môap adrol sơ̆, blah iŏk đĭ jơ̆p tơring truh tơ Krong Arnôn.

²⁷Yua kơ noh boih, lu bơngai hơgei hơri pôk khan: Năm bĕ tơ pơlei tih Hesbôn! Pơlei tih Sihôn đe gô man pơdơ̆ng kơjăp!

²⁸Yua kơ đei ŭnh lĕch đơ̆ng pơlei Hesbôn. Pla ŭnh lĕch đơ̆ng pơlei Sihôn. Ŭnh noh sa pơlei Ar lăm char Môap. Đĭ-đăng anih kơjung lu yŏng pơgơ̆r oei tơ đak Krong Arnôn.

²⁹Ơ Môap! Răm-'băm tơpă kơ ih! Ơ kon pơlei Kêmôs, ih lôch răm đĭ boih! Lu kon drŏ-nglo gô kơdâu ôn păng tơklah tơklang, lu kon drŏ-kăn ih gô jing bơnă, kơ Sihôn, pơtao đe Amôrit.

³⁰Thoi noh bơ̆n blah blơ̆ kon sâu sư lôch đĭ iŏk đơ̆ng pơlei Hesbôn truh tơ Đibôn, Lu nhôn pơrăm đĭ truh tơ pơlei Napha, dĭng truh tơ pơlei Mêdêba,

³¹Thoi noh, lu bơngai Isơrael oei tơ lăm char bơngai Amôrit.

³²Môis wơh bơngai năm chop lăng pơlei Jaser; lu sư blah iŏk đĭ lu pơlei iĕ iĕ, na pơpuh tơweh lê̆ lu kon pơlei Amôrit đơ̆ng noh.

³³Lu sư wih yak năm trong tơ Basan, Ôk pơtao đe Basan păng đĭ kon pơlei sư năm găn blah 'bơ̆t pơlei Êdrei.

³⁴Mă-lei Kră Yang khan kơ Môis, 'nĕ hli kơ sư ôh, yua kơ Inh jao tơring sư hăm kon pơlei sư tơ lăm ti ih boih; pơm bĕ kơ lu sư thoi ih pơm kơ Sihôn pơtao Amôrit, bơngai mă lăm pơlei Hesbôn.

³⁵Thoi noh, bơngai Isơrael blah rôp pơlôch Ôk, lu kon drŏ-nglo sư păng đĭ-đăng lu kon pơlei sư, ưh pă đei minh 'nu oei arih; lu bơngai Isơrael iŏk đĭ char lu sư.