Read bahnar Jo 22 Bible Online

Jo 22 - bahnar bible

Jo 22

¹Lu bơngai Isơrael yak năm lăm thŭng glă char Môap, oei pơdơh paih to đak Krong Jôrđăn, tơklă pơlei Jêrikô.

²Balak kon drŏ-nglo Sipôr 'bôh đĭ boih tơdrong lu bơngai Isơrael pơm kơ kon pơlei Amôrit.

³Lu bơngai Môap hli dêh kơ lu bơngai Isơrael yua kơ kon pơlei Isơrael lơ tơpă.

⁴Lu bơngai Môap khan kơ lu kră pơgơ̆r char Madian; Dang ei lu kon pơlei lơ noh gô sa pơđĭ dôm tơmam sa tăp dăr kơ bơ̆n thoi rơmo sa 'nhĕt lăm mir. Kơplah noh, Balak kon drŏ-nglo Sipôr pơm pơtao char Môap.

⁵Sư wơh minh 'nu bơngai năm tơ Balaam, kon drŏ-nglo Bêôr tơ pơlei Pêthôr jê̆ đak krong lăm char adrĕch adrung 'bok sư, wă krao sư păng khan: Lăng deh đei minh khŭl kon pơlei 'nao lĕch đơ̆ng dêh char Êyiptơ lơ 'bĕnh jơ̆p-jang kơ teh oei jê̆ tơklă anăp inh.

⁶Thoi noh, inh apinh ih năm hiap lu sư dang ei hloi, yua kơ lu sư pran hloh kơ inh. Wă kơ inh kĕ blah pơrăm păng puh lu sư weh đơ̆ng char, yua kơ inh băt tơdah ih hơpơi kơ đe pŭn hiôk đei pŭn hiôk, tơdah ih hiap bu bơngai noh gô răm gô pŭ hơngiap.

⁷Thoi noh, lu kră pơgơ̆r char Môap păng lu kră pơgơ̆r char Madian, năm chĕp ba tơmam apah lu pơjâu, lu sư năm truh tơ Balaam roi dôm nơ̆r Balak đei tơtă.

⁸Balaam tơl lu sư: 'Bĭch bĕ tơ âu măng 'nâu, inh gô roi ăn kơ lu iĕm kiơ̆ kơ Kră Yang đei khan kơ inh. Lu kră pơgơ̆r char Môap 'bĭch tơ hnam Balaam.

⁹Kră Yang 'Bok Kei-Dei năm tơ Balaam păng khan thoi âu: Lu đe bu lăm hnam ih?

¹⁰Balaam tơl Kră Yang 'Bok Kei-Dei, “Balak kon drŏ-nglo Sipôr pơtao char Môap wơh lu sư năm tơ inh, khan,

¹¹Lăng deh, đei minh khŭl kon pơlei 'nao lĕch đơ̆ng char Êyiptơ lơ 'bĕnh jơ̆p-jang kơ teh; apinh ih năm hiap lu sư hrei âu hloi; wă kơ inh blah pơrăm păng puh tơweh lu sư.”

¹²Kră Yang 'Bok Kei-Dei khan kơ Balaam thoi âu: “Ih 'nĕ kơ năm hơdai lu sư, 'nĕ kơ hiap khŭl kon pơlei 'nâu yua kơ adrĕch kon pơlei 'nâu lu sư đei tơdrong pŭn hiôk.”

¹³Balaam iung đơ̆ng hrôih, năm khan kơ lu kră pơgơ̆r char đơ̆ng Balak wơh noh. Wih bĕ tơ char iĕm, yua kơ Kră Yang ưh kơ ăn kơ inh yak hơdai iĕm.

¹⁴Thoi noh lu Kră pơgơ̆r char Môap iung, wih brŏk tơ Balak păng khan: Balaam sư ưh kơ năm hăm nhôn.

¹⁵Balak wơh lu kră pơgơ̆r nai rai lơ hloh dơ̆ng păng lu mă đe pơyom hloh kơ lu kră pơgơ̆r adrol noh,

¹⁶truh tơ Balaam păng khan: Balak kon drŏ-nglo Sipôr, đei khan thoi âu: 'Nĕ ăn đei tơdrong kiơ khă găn ih năm tơ inh,

¹⁷yua kơ inh gô apah ih tih tơpă păng gô pơm kiơ̆ ih athei inh pơm. Apinh ih năm hiap pơrăm adrĕch 'nâu.

¹⁸Balaam tơl nơ̆r lu kră pơgơ̆r đơ̆ng Balak wơh thoi âu: Mă khan Balak ăn kơ inh hnam sư 'bĕnh kơ hu maih, inh kư̆m ưh kơ gơh pơhloh kơ nơ̆r Kră Yang 'Bok Kei-Dei inh tơtă, na pơm minh tơdrong mă tih mă iĕ.

¹⁹Mă-lei kư̆m apinh iĕm 'bĭch tơ âu hăm inh măng 'nâu, wă kơ băt Kră Yang gô pơma khan kơ inh tơdrong kiơ dơ̆ng.

²⁰Kơplah kơmăng Kră Yang 'Bok Kei-Dei jur tơ Balaam păng khan: Tơdah lu đe noh năm truh krao ih, iung năm kiơ̆ lu sư bĕ; mă-lei ih athei pơm kiơ̆ kơ nơ̆r đơ̆ng Inh gô khan,

²¹Thoi noh, Balaam iung đơ̆ng hrôih, drôih iŏk an aseh iĕ sư hao năm kiơ̆ lu kră pơgơ̆r char Môap.

²²Mă-lei đei tơdrong Kră Yang 'Bok Kei-Dei hil, yua kơ sư năm; Linh jang Kră Yang dơ̆ng 'bơ̆t trong găn sư, Balaam hao aseh iĕ sư năm, kư̆m đei 'bar 'nu đam năm hơdai sư.

²³Aseh sư 'bôh Linh jang Kră Yang dơ̆ng găn trong ti Linh jang chĕp đao gưm ưh kơ đei hơnglop, aseh weh trong lăm chŭn; Balaam teh aseh wă kơ sư rok trong.

²⁴Mă-lei đei Linh jang Kră Yang năm găn lăm trong iĕ lăm pơgar hơmu đei dur war 'bar pah.

²⁵Aseh iĕ 'bôh Linh jang Kră Yang sư năm gơning rok dur na jơ̆ng Balaam kep kơ dur; Balaam teh aseh sư dơ̆ng.

²⁶Linh jang Kră Yang năm găn 'bơ̆t trong iĕ hrăt-hrot kơ-cher-ep ưh pă gơh weh gah 'ma dah gah 'ngiĕo.

²⁷Aseh 'bôh Linh jang Kră Yang na sư drap drum ala Balaam. Na Balaam blĕk hil, teh aseh sư hăm 'long jra.

²⁸Kơplah noh, Kră Yang pơih 'bơ̆r aseh iĕ gơh pơma, aseh khan kơ Balaam: Inh đei pơm kiơ kơ ih, mă ih teh inh pêng wơ̆t?

²⁹Balaam tơl aseh sư khan: Noh yua kơ e ưh kơ chu kơ inh. Tơdah inh đei đao gưm inh pơlôch e boih!

³⁰Aseh tơl Balaam khan: Inh hăm trŏ kơ aseh ih mă ih juăt kơ yua hao rim năr dĭng truh năr 'nâu? Inh hăm ngăl lah kơ pơm thoi âu? Balaam tơl: Ưh.

³¹Kră Yang pơih măt Balaam, na Balaam 'bôh Linh jang Kră Yang dơ̆ng tŏk-bŏk trong ti sư chĕp minh hlak đao gưm. Balaam kŭp kơ̆l drap tơ teh.

³²Linh jang Kră Yang khan: Liơ ih teh aseh ih pêng wơ̆t? 'Nâu inh năm tơ âu wă găn ih, yua kơ inh 'bôh ih wă năm kiơ̆ trong năm tơ tơdrong hiong răm.

³³Thoi noh, aseh sư 'bôh inh na weh đơ̆ng anăp inh pêng wơ̆t kơ 'nâu, tơdah sư ưh kơ weh trong nai đơ̆ng anăp inh lei inh pơlôch ih boih, na lê̆ sư arih.

³⁴Balaam tơl Linh jang Kră Yang khan: Inh pơm glăi boih, ưh kơ băt kơ ih dơ̆ng 'bơ̆t trong găn inh, na dang ei, tơdah ih ưh kơ wă kơ inh năm, inh wih brŏk.

³⁵Linh jang Kră Yang khan kơ Balaam thoi âu: Yak năm hơdai bĕ lu đe noh, mă-lei ih wă pơma kiơ ih athei mơ̆ng kơ inh athei pơma. Balaam sư yak năm hơdai lu kră pơgơ̆r đơ̆ng pơtao Balak wơh.

³⁶Wă Balak kơtơ̆ng khan Balaam truh boih, na sư năm tơ'bơ̆p tơ pơlei, pơlei noh jê̆ đak Krong Arnôn, wă khan ter jih kơ teh đak Môap.

³⁷Balak pơma hăm Balaam khan: Hăm trŏ inh đei wơh boih bơngai năm krao ih? Liơ ih ưh kơ năm? Inh ưh kơ gơh wă apah ih hă?

³⁸Balaam tơl Balak khan: 'Nâu inh năm truh tơ ih boih, dang ei inh ưh kơ gơh chă pơma minh 'bar nơ̆r Inh gô pơma kiơ̆ mă Kră Yang 'Bok Kei-Dei ăn nơ̆r lăm 'bơ̆r inh.

³⁹Balaam yak năm hăm Balak, truh tơ Kiriat Husôt.

⁴⁰Balak 'bet rơmo, triu pơyơ̆r pơm yang păng athei đe năm ba ăn kơ Balaam hăm lu kră pơgơ̆r kiơ̆ sư.

⁴¹Truh tơ pơgê năr đơ̆ng rŏng Balak năm ba Balaam tơ Bamôt Baal, đơ̆ng anih noh sư gơh tơmang 'bôh tơ anih lu bơngai Isơrael oei pơdơh.