Read bahnar Jo 23 Bible Online

Jo 23 - bahnar bible

Jo 23

¹Balaam khan kơ Balak: Pơm pơdơ̆ng bĕ tơpơh tŏ chơnang soi tơ âu kơ inh păng kư̆m chă ăn kơ inh tơpơh tŏ rơmo tơno păng chă tơpơh tŏ triu tơno.

²Balak pơm kiơ̆ thoi Balaam khan; bre sư pơyơ̆r minh pôm rơmo tơno păng minh pôm triu tơno tơ rim kơ chơnang soi.

³Na Balaam pơma hăm Balak khan: Ih athei dơ̆ng jê̆ tơmam ih soi 'buh noh, na inh wă năm, rŏ lăng Kră Yang gô năm tơ'bơ̆p inh, inh gô roi ăn kơ ih dôm tơdrong kiơ Kră Yang tơ'bôh kơ ih. Sư tŏk hloi tơ kơpal kơ̆l kông kơjung 'nguaih glă.

⁴Kră Yang 'Bok Kei-Dei tơ'bơ̆p Balaam păng Balaam pơma hăm Sư khan: Inh đei pơdơ̆ng tơpơh tŏ chơnang soi păng tơ rim chơnang soi noh inh pơyơ̆r dan minh pôm rơmo tơno păng minh pôm triu tơno.

⁵Kră Yang tơtă nơ̆r lăm 'bơ̆r Balaam păng khan. “Wih brŏk bĕ tơ Balak păng khan thoi âu:”

⁶Balaam wih brŏk tơ Balak; na 'bôh Balak oei dơ̆ng jê̆ tơmam soi 'buh pơyơ̆r sư hơdai hăm lu kră pơgơ̆r char Môap.

⁷Balaam roi pơdah hăm nơ̆r hơri sư khan: Balak, pơtao Môap, krao inh đơ̆ng dêh Aram, đơ̆ng kông gah hơlĕch păng khan: Năm hiap lu adrĕch Jakôp bĕ! Năm hiap hil kơ lu adrĕch Isơrael bĕ.

⁸Liơ inh gơh hiap? Liơ inh gơh hil lu bơngai Kră Yang 'Bok Kei-Dei ưh kơ hiap ưh kơ hil mĭl?

⁹Đơ̆ng kơpal kơ̆l kông, inh 'bôh lu sư đơ̆ng kông groi kơjung, inh lăng lu sư: To, minh khŭl kon pơlei oei hơdrô̆ phara ưh kơ jô̆ lu sư hơdai thoi kon bơngai lăm teh đak ôh.

¹⁰Bu kĕ jô̆ 'bruih chuơh Jakôp? Bu kĕ jô̆ minh lăm puăn lu adrĕch Isơrael? Lu bơngai tơpăt lôch thoi yơ ăn kơ inh lôch thoi lu sư? Năr tôch kơ lu bơngai tơpăt thoi yơ inh hơpơi năr tôch kơ inh thoi noh!

¹¹Balak khan kơ Balaam: Ih đei pơm kiơ kơ inh bơih? Inh apinh ih năm tơ âu wă kơ ih hiap lu bơngai ayăt kơ inh na mă rai hơpơi ăn kơ lu sư pŭn hiôk dơ̆ng!

¹²Balaam tơl: Inh athei pơma dôm nơ̆r mă Kră Yang đei ăn boih nơ̆r pơma lăm 'bơ̆r inh?

¹³Balak khan kơ sư: “Hiăng bĕ năm kiơ̆ inh tơ anih nai, đơ̆ng noh ih gô 'bôh lu sư, 'bôh lu sư jê̆ 'biơ̆, mă-lei ih ưh kơ đei 'bôh đĭ lu sư ôh, ih 'bôh minh puăt đĕch, na ih gô hiap lu sư đơ̆ng noh.”

¹⁴Thoi noh Balak chông ba Balaam truh tơ mir Sôphim, kơpal kơ̆l kông Pisga, pơdơ̆ng tơpơh tŏ chơnang soi păng tơ rim chơnang soi pơyơ̆r minh pôm rơmo dăm păng minh pôm triu tơno.

¹⁵Balaam khan kơ Balak: “Ih athei dơ̆ng 'bơ̆t cheng tơmam soi, inh gô năm tơ'bơ̆p Kră Yang tơ noh.”

¹⁶Kră Yang jur tơ'bơ̆p Balaam, dan nơ̆r pơma lăm 'bơ̆r sư, khan: Wih tơ Balak bĕ păng khan thoi âu:

¹⁷Balaam wih dơ̆ng tơ Balak; sư oei dơ̆ng 'bơ̆t cheng tơmam soi hơdai hăm lu kră pơgơ̆r dêh Môap. Balak apinh: Kră Yang khan kiơ?

¹⁸Balaam drơ̆ng sư hăm nơ̆r hơri thoi âu: Ơ Balak, iung mơ̆ng bĕ! Ơ kon drŏ-nglo Sipôr, pơgling đon mơ̆ng bĕ!

¹⁹Kră Yang ưh kơ trŏ thoi minh 'nu kon bơngai gơh pơma hơlĕnh, Kŭm ưh kơ trŏ thoi kon bơngai mă gơh tơplih tơdrong tơchĕng ôh. Tơdrong mă sư khan boih, mă sư jor kơ pơm hă? Tơdrong mă sư pơkă, sư ưh kơ pơm keh hă?

²⁰Na 'nâu, inh đei iŏk boih nơ̆r tơtă hơpơi ăn pŭn hiôk Kră Yang ăn boih pŭn hiôk, Inh ưh kơ pơjah ôh.

²¹Sư ưh kơ đei 'bôh ôh tơdrong yoch kơnê̆ lăm Jakôp, Păng ưh kơ đei tơdrong răm lăm Isơrael, Kră Yang 'Bok Kei-Dei lu sư, oei hơdai lu sư, Lăm adrĕch Isơrael đei nơ̆r pơtao jreo chơt hiôk lăm lu sư.

²²Kră Yang 'Bok Kei-Dei chông tơlĕch lu sư đơ̆ng dêh char Êyiptơ. Lu sư đei jơhngơ̆m pran thoi rơmo bri.

²³Ưh kơ đei bơngai pơjâu lăm Jakôp. Lăm Isơrael kư̆m ưh kơ đei bơngai tơwir hơlĕnh yua kơ dang ei trŏ boih đe gô pơma khan gah Jakôp păng Isơrael thoi âu: Lăng đei tơdrong Kră Yang pơm hlĭch tơpă! Pă băt dang yơ.

²⁴To, đei minh khŭl kon pơlei iung thoi dăm-brang akăn, Păng iung dang dơ̆ng thoi dăm-brang tơno; Dĭng truh tơ đei rôp sa kon sem na mă drum, Păng huch sa pham lu kon sem mă đêl lu sư rôp sa.

²⁵Na Balak khan kơ Balaam 'nĕ kơ hiap lu sư, kư̆m 'nĕ kơ hơpơi ăn pŭn hiôk.

²⁶Balaam tơl Balak khan: Inh ưh tam mă khan kơ ih hă: Inh athei pơm kiơ̆ dôm tơdrong Kră Yang gô khan athei.

²⁷Balak khan kơ Balaam dơ̆ng: Thoi ei, hiăng năm, inh gô năm ba ih tơ anih nai; rŏ lăng Kră Yang 'Bok Kei-Dei gô ăn kơ ih hiap lu kon pơlei noh tơ noh.

²⁸Balak chông ba Balaam truh tơ kơpal kông Pêôr, tơklă thŭng tơmăn glă.

²⁹Balaam khan kơ Balak: Athei pơdơ̆ng ăn kơ inh tơ âu tơpơh tŏ chơnang soi păng chă lê̆ tơpơh tŏ rơmo dăm păng tơpơh tŏ triu tơno.

³⁰Na, Balak pơm kiơ̆ kơ nơ̆r Balaam athei; tơ rim chơnang soi, sư pơyơ̆r minh pôm rơmo dăm păng minh pôm triu tơno.