Read bahnar Jo 24 Bible Online

Jo 24 - bahnar bible

Jo 24

¹Balaam 'bôh Kră Yang hơdah dêh lăp đon sơkat pŭn hiôk ăn kơ adrĕch Isơrael sư ưh pă đei năm thoi adrol ki wă chă Kră Yang Sư tơwih muh măt Sư tơklă char glă,

²Balaam tơmang 'bôh adrĕch Isơrael pơm bơsŭn kiơ̆ kơ adrĕch păng Yang Bơhngol 'Bok Kei-Dei đei oei hơdai sư,

³na sư pơma khan lê̆ adrol hăm nơ̆r hơri thoi âu: Nơ̆r hơri khan lê̆ adrol Balaam, kon drŏ-nglo Bêôr khan, Nơ̆r hơri sư thoi đei măt lar 'bôh hơdah,

⁴nơ̆r hơri đơ̆ng bơngai mă sư kơtơ̆ng nơ̆r Kră Yang 'Bok Kei-Dei boih, Bơngai mă 'bôh tơdrong tơ'bôh đơ̆ng Kră Yang mơsêh mơyang sư bon drap kơkuh păng măt sư lar boih.

⁵Ơ Jakôp anih kơđông ih 'lơ̆ng pă băt dang yơ! Ơ Isơrael bơsŭn ih 'lơ̆ng tơpă!

⁶Thoi thŭng đe tơraih rai să, thoi pơgar 'nhot cheng đak glung, thoi 'long 'bâu phu mă đêl Kră Yang pơtăm 'long hơngo chăt cheng đak glung.

⁷Đak gô ro đơ̆ng thŭng blai lah lai truh tơ 'nguaih, găr adrĕch lu sư gô oei tơ lăm anih đei đak, Pơtao sư jing tih hloh kơ Agak. Dêh char sư rai să rai tih,

⁸Kră Yang 'Bok Kei-Dei chông tơlĕch sư đơ̆ng dêh Êyiptơ, jơhngơ̆m lu sư pran kơtang thoi rơmo bri. Luăn sa lu dêh char nai, wă khan lu ayăt kơ sư. Gơ̆ pơchah lê̆ kơting lu sư, 'bet lu sư hăm 'brơ̆m hră,

⁹lu sư drap, drum thoi dăm-brang tơno, kư̆m thoi dăm-brang akăn: Bu pơ̆n râu tơiung lu sư? Pŭn hiôk dêh kơ bơngai bu hơpơi ăn pŭn hiôk kơ ih, Hiap bĕ lu bơngai bu hiap ih.

¹⁰Balak hil areh kơ Balaam, tap ti păng khan kơ Balaam: Inh krao ih wă kơ ih hiap lu bơngai ayăt kơ inh; na ih rai sơkat pŭn hiôk ăn kơ lu sư đei pêng wơ̆t boih.

¹¹Yua kơ thoi noh, dang ei kơdâu wih bĕ tơ tơring ih kơdih! Inh khan boih, inh gô pôk apah kơ ih tơpă, mă-lei dang ei Kră Yang găn ih ưh kơ wă ih đei iŏk.

¹²Balaam khan kơ Balak, “Inh ưh kơ đei khan kơ lu bơngai mă ih wơh năm krao inh hă?

¹³Mă khan Balak ăn kơ inh hnam sư 'bĕnh kơ hu 'maih, inh kư̆m ưh kơ lê̆ ôh nơ̆r đơ̆ng Kră Yang tơtă athei, wă pơm tơdrong trŏ 'lơ̆ng dah kơnê̆ mơ̆ng kơ inh kơdih wă; inh athei pơma dôm tơdrong kiơ mă Kră Yang đei khan!

¹⁴'Nâu, dang ei adrol kơ inh wih brŏk tơ kon pơlei inh kơdih. Năm tơ âu bĕ, inh gô roi ăn kơ ih băt lu kon pơlei âu gô pơm kiơ kơ lu kon pơlei ih ning-mônh.

¹⁵Balaam hơri khan lê̆ adrol thoi âu: Nơ̆r hơri khan lê̆ adrol Balaam, kon drŏ-nglo Bêôr, Nơ̆r hơri khan lê̆ adrol đơ̆ng bơngai mă măt đei 'bôh hơdah boih.

¹⁶Nơ̆r hơri khan lê̆ adrol đơ̆ng bơngai mă kơtơ̆ng nơ̆r Kră Yang 'Bok Kei-Dei pơma, Băt hlôh tơdrong gơh hơgei Kră Yang Tih Hloh, Lăng 'bôh tơdrong tơ'bôh đơ̆ng Kră Yang Mơsêh Mơyang. Drap bon tơ teh na măt sư lar 'bôh hơdah boih.

¹⁷Inh 'bôh sư, mă-lei ưh kơ sĭ dang ei ôh; inh lăng tơ sư, mă-lei ưh kơ 'bôh jê̆ ôh; Đei minh pôm sơnglŏng lĕch đơ̆ng Jakôp. Đei minh pôm 'long jra pơtao lĕch dơ̆ng Isơrael; Gô teh pơchah kơ̆l Môap păng pơlôch đĭ kon bơngai mă ngăl iung blah sư.

¹⁸Gô blah iŏk char Eđôm păng kư̆m gô blah iŏk char Seir, mă ayăt kơ Sư; Isơrael gô tơ'bôh tơdrong pran kơtang sư.

¹⁹Đei minh 'nu yŏng pơgơ̆r gô lĕch đơ̆ng Jakôp, gô pơlôch pơrăm đĭ lu bơngai oei klaih đơ̆ng lăm pơlei tih.

²⁰Balaam kư̆m 'bôh Amalek, na roi tơbăt adrol khan: Amalek jing kơ̆l kơ đĭ-đăng teh đak; mă-lei tuch-luch sư, kư̆m gô lôch.

²¹Balaam 'bôh bơngai Kênit na khan tơbăt lê̆ adrol hăm nơ̆r hơri: Anih ih oei noh kơjăp thoi. Tơpu oei lăm tơmo.

²²Mă-lei Kain hiong răm. Dĭng truh tơ Asur rôp ba ih pơm bơnă?

²³Balaam pơma khan lê̆ adrol: Ô! Tơdah Kră Yang 'Bok Kei-Dei pơm tơdrong âu, bu gơh oei arih?

²⁴Mă-lei gô đei lơ duk đơ̆ng dêh Kitim truh rôp pơmat lu bơngai Asur păng lu bơngai Eber; Păng lu sư đe kư̆m gô pơrăm đĭ mơ̆n.

²⁵Balaam wih brŏk tơ tơring sư kơdih. Balak kư̆m wih brŏk mơ̆n.