Read bahnar Jo 25 Bible Online

Jo 25 - bahnar bible

Jo 25

¹Kơplah lu bơngai Isơrael oei 'bơ̆t Sitim lu kon pơlei pơtơm ngôi kư̆ kă hăm lu drŏ-kăn Môap.

²Lu kon drŏ-kăn 'nâu pơtơm kon pơlei Isơrael et sa pơm yang hơdai lu sư; kon pơlei Isơrael et sa păng drap kơkuh kơ yang lu sư.

³Isơrael pơm yang kơkuh kơ yang Baal Pêôr, đei Kră Yang hil mĭl kơ lu bơngai Isơrael,

⁴Kră Yang khan kơ Môis thoi âu: Rôp đĭ-đăng lu yŏng pơgơ̆r kon pơlei păng hrek atol lu sư 'bơ̆t tŏ, anăp Kră Yang wă kơ tơdrong Kră Yang hil mĭl weh đơ̆ng Isơrael.

⁵Thoi noh Môis khan kơ lu 'bok sek tơlang: Rim 'nu lu iĕm athei pơlôch lu bơngai mă kơkuh kơ yang Baal, Pêôr.

⁶Âu, đei minh 'nu bơngai drŏ-nglo Isơrael chông ba minh 'nu drŏ-kăn bơngai Madian kơ lu 'nhŏng oh sư, 'bơ̆t anăp Môis păng 'bơ̆t anăp đĭ-đăng kon pơlei Isơrael oei akŭm, kơplah lu sư oei nhơ̆m 'bơ̆t 'măng Bơsŭn Anih Akŭm.

⁷Phinêhas, kon drŏ-nglo Êlêasar, sâu Arôn 'bok soi tơm, 'bôh tơdrong 'nâu, sư iung ti sư chĕp tơju, na weh đơ̆ng anăp lu bơngai tơpôl oei akŭm,

⁸kiơ̆ bơngai Isơrael mơ̆t lăm bơsŭn, 'bet hloi bơngai drŏ-nglo Isơrael noh klĕch hloi tơ klak bơngai drŏ-kăn; đơ̆ng noh tơdrong truh kơ bơngai Isơrael pơdơh hloi.

⁹Na, wă đei 'bar-jĭt puăn-rơbâu 'nu bơngai lôch yua kơ tơdrong pơrăm truh âu.

¹⁰Kră Yang khan kơ Môis thoi âu:

¹¹Phinêhas, kon drŏ-nglo Êlêasar, sâu Arôn, 'bok soi, đei tơjur lê̆ 'biơ̆ tơdrong Inh hil kơ bơngai Isơrael, yua kơ sư kư̆m gar lu sư thoi Inh; thoi ei, na Inh huay pă pơlôch pơrăm bơngai Isơrael lăm tơdrong inh hil gar dơ̆ng;

¹²yua kơ thoi noh, khan bĕ: Inh ăn kơ sư tơdrong pơgơ̆p hiôk-hian Inh;

¹³Tơdrong noh 'măn kơ sư, hăm lu kon sâu sư, tơdrong bơ̆jang 'bok soi ling-lang, yua kơ sư đei jơhngơ̆m đon tơnăp băt hli yom kơ Kră Yang 'Bok Kei-Dei sư, pơm rơgoh tơdrong yoch đơ̆ng kon pơlei Isơrael.

¹⁴Anăn bơngai drŏ-nglo Isơrael mă đe 'bet lôch hơdai bơngai drŏ-kăn Madian noh, Simri kon drŏ-nglo Salu, yŏng kơdră kơ adrĕch bơngai Simêôn.

¹⁵Bơngai drŏ-kăn Madian đe 'bet lôch hơdai noh, anăn Kôsbi kon drŏ-kăn Sur, yŏng kơdră kơ minh adrĕch bơngai Madian.

¹⁶Kră Yang khan dơ̆ng kơ Môis thoi âu:

¹⁷Lăng bĕ lu bơngai Madian thoi lu ayăt păng blah pơlôch bĕ lu sư.

¹⁸Yua kơ lu sư pơrŭng pơm kơ iĕm, pơhlŭ lu iĕm kơkuh kơ yang Pêôr păng lăm tơdrong Kôsbi, kon drŏ-kăn yŏng kơdră adrĕch Madian, mŏ lu sư đe pơlôch lăm năr đei tơdrong jĭ truh lôch rŭng, yua kơ kơkuh kơ yang Pêôr.