Read bahnar Jo 26 Bible Online

Jo 26 - bahnar bible

Jo 26

¹Đơ̆ng rŏng kơ tơdrong lôch hơbuh, Kră Yang khan kơ Môis păng Êlêasar kon drŏ-nglo Arôn 'bok soi tơm;

²Athei iŏk hla bơar chih jô̆ bĕ đĭ adrĕch Isơrael, iŏk đơ̆ng 'bar-jĭt sơnăm tơ kơpal, kiơ̆ kơ adrĕch gah 'bok lu sư, wă khan đĭ-đăng adrĕch bơngai Isơrael mă gơh năm tơblah.

³Thoi noh Môis păng Êlêasar 'bok soi, khan kơ lu sư lăm char glă Môap jê̆ đak Krong Jôrđăn, tơklă pơlei Jêrikô.

⁴Pơm hla bơar chih jô̆ bĕ kon bơngai Isơrael, iŏk đơ̆ng 'bar-jĭt sơnăm tơ kơpal, thoi Kră Yang đei athei Môis păng kon pơlei Isơrael, mă lĕch boih đơ̆ng dêh char Êyiptơ.

⁵Rubên 'nhŏng kơdră lu bơngai Isơrael, kon drŏ-nglo Rubên noh Hanok; đơ̆ng Hanok pơjing adrĕch adrung Hanok; đơ̆ng Palu pơjing kơ adrĕch adrung Palu;

⁶đơ̆ng Hêsrôn pơjing kơ adrĕch adrung Hêsrôn, đơ̆ng Karmi pơjing kơ adrĕch adrung Karmi.

⁷'Nâu boih jing adrĕch adrung Rubên, chih jô̆ đĭ lu sư đei puăn-jĭt pêng-rơbâu tơpơh-hrĕng pêng-jĭt 'nu.

⁸Kon drŏ-nglo Palu noh Êliap.

⁹Lu kon drŏ-nglo Êliap: Nêmuel, Đathan păng Abiram. Đathan păng Abiram 'nâu boih, mă pơm yŏng pơgơ̆r khŭl tơpôl iung blah pơjah hăm Môis păng Arôn, kiơ̆ kơ khŭl Kôrê kơplah lu sư iung blah hăm Kră Yang.

¹⁰Kơplah noh, teh ha 'bơ̆r luăn 'bar 'nu bre sư păng Kôrê hơdai, lu bơngai kiơ̆ khŭl sư lôch hloi kơ ŭnh sa đĭ 'bar-hrĕng pơđăm-jĭt 'nu drŏ-nglo; noh boih tơ'bôh wă kơ kơchăng.

¹¹Mă-lei lu kon sâu Kôrê huay kơ lôch.

¹²Lu kon drŏ-nglo Simêôn, kiơ̆ kơ adrĕch adrung sư: Đơ̆ng Nêmuel pơjing kơ adrĕch adrung Nêmuel; đơ̆ng Jamin pơjing kơ adrĕch adrung Jamin; đơ̆ng Jakin pơjing kơ adrĕch adrung Jakin;

¹³đơ̆ng Sêra pơjing kơ adrĕch adrung Sêra; đơ̆ng Sal pơjing kơ adrĕch adrung Sal.

¹⁴'Nâu boih adrĕch adrung Sêmêôn, đei 'bar-jĭt 'bar-rơbâu 'bar-hrĕng 'nu.

¹⁵Lu kon drŏ-nglo Gat kiơ̆ kơ adrĕch adrung sư, đơ̆ng Sêphôn pơjing kơ adrĕch adrung Sêphôn; đơ̆ng Hagi pơjing kơ adrĕch adrung Hagi; đơ̆ng Suni pơjing kơ adrĕch adrung Suni;

¹⁶đơ̆ng Ôsni pơjing kơ adrĕch adrung Ôsni; đơ̆ng Eri pơjing kơ adrĕch adrung Eri;

¹⁷đơ̆ng Arôt pơjing đei adrĕch adrung Arôt; đơ̆ng Arêli pơjing đei adrĕch adrung Arêli.

¹⁸'Nâu boih adrĕch adrung lu kon drŏ-nglo Gat kiơ̆ kơ đei jô̆ lu sư, đei puăn-jĭt rơbâu pơđăm-hrĕng 'nu.

¹⁹Lu kon drŏ-nglo Juđa: Er păng Ônan; mă-lei Er păng Ônan lôch boih tơ lăm dêh char Kanaan.

²⁰Lu kon drŏ-nglo Juđa, kiơ̆ kơ adrĕch adrung sư: Đơ̆ng Sêla đei pơjing kơ adrĕch adrung Sêla; đơ̆ng Pêres đei pơjing kơ adrĕch adrung Pêres; đơ̆ng Sêra đei pơjing kơ adrĕch adrung Sêra.

²¹Lu kon drŏ-nglo Pêres: Đơ̆ng Hêsrôn đei pơjing adrĕch adrung Hêsrôn; đơ̆ng Hamul đei pơjing kơ adrĕch adrung Hamul.

²²'Nâu boih lu adrĕch adrung Juđa kiơ̆ kơ đei chih jô̆ lu sư, đei tơpơh-jĭt tơdrâu-rơbâu pơđăm-hrĕng 'nu.

²³Lu kon drŏ-nglo Isakar, kiơ̆ kơ adrĕch adrung sư kơdih: Đơ̆ng Tôla pơjing đei adrĕch adrung Tôla; đơ̆ng Puwa pơjing đei adrĕch adrung Puwa;

²⁴đơ̆ng Jasup; pơjing kơ adrĕch adrung Jasup; đơ̆ng Simrôn pơjing đei adrĕch adrung Simrôn.

²⁵'Nâu boih adrĕch adrung Isakar chih jô̆ lu sư đei tơdrâu-jĭt puăn-rơbâu pêng-hrĕng 'nu.

²⁶Lu kon drŏ-nglo Sabulôn kiơ̆ adrĕch adrung lu sư: Đơ̆ng Sêret pơjing đei adrĕch adrung Sêret; đơ̆ng Êlon pơjing đei adrĕch adrung Êlon; đơ̆ng Jahlel pơjing đei adrĕch adrung Jahlel.

²⁷'Nâu boih adrĕch adrung Sabulôn đei chih jô̆ lu sư, tơdrâu-jĭt rơbâu pơđăm-hrĕng 'nu.

²⁸Lu kon drŏ-nglo Jôsep kiơ̆ kơ adrĕch adrung lu sư: Manase păng Êphraim.

²⁹Lu kon drŏ-nglo Manase, đơ̆ng Makir pơjing đei adrĕch adrung Makir, Makir jing 'bă kơ Gileat; đơ̆ng Gileat pơjing đei adrĕch adrung Gileat.

³⁰'Nâu lu kon drŏ-nglo Gileat: Đơ̆ng Lêser pơjing đei adrĕch adrung Lêser; đơ̆ng Hêlek pơjing đei adrĕch adrung Hêlek;

³¹đơ̆ng Asriel pơjing đei adrĕch adrung Asriel; đơ̆ng Sichem pơjing đei adrĕch adrung Sichem;

³²đơ̆ng Sêmida pơjing đei adrĕch adrung Sêmida; đơ̆ng Hêpher pơjing đei adrĕch adrung Hêpher.

³³Sêlôpêhat kon drŏ-nglo Hêpher ưh kơ đei kon drŏ-nglo ôh, đei kon drŏ-kăn đĕch. Anăn lu kon drŏ-kăn Sêlôpêhat, Mahla, Nôa, Hogla, Mika păng Tirsa.

³⁴'Nâu boih adrĕch adrung Manase, chih jô̆ lu sư đei pơđăm-jĭt 'bar-rơbâu tơpơh-hrĕng 'nu.

³⁵'Nâu lu kon drŏ-nglo Êphraim kiơ̆ kơ adrĕch adrung lu sư: Đơ̆ng Suthêla đei pơjing kơ adrĕch adrung Suthêla; đơ̆ng Bêker pơjing đei adrĕch adrung Bêker; đơ̆ng Tahan pơjing đei adrĕch adrung Tahan.

³⁶'Nâu lu kon drŏ-nglo Suthêla: Đơ̆ng Êran pơjing đei adrĕch adrung Êran.

³⁷'Nâu adrĕch adrung lu kon drŏ-nglo Êphraim chih jô̆ lu sư, đei pêng-jĭt 'bar-rơbâu pơđăm-hrĕng 'nu. 'Nâu lu kon drŏ-nglo Jôsep kiơ̆ adrĕch adrung lu sư.

³⁸Lu kon drŏ-nglo Bênjamin kiơ̆ adrĕch adrung lu sư: Đơ̆ng Bêla pơjing đei adrĕch adrung Bêla; đơ̆ng Asbel pơjing đei adrĕch adrung Asbel; đơ̆ng Ahiram pơjing đei adrĕch adrung Ahiram;

³⁹đơ̆ng Supham pơjing kơ adrĕch adrung Supham; đơ̆ng Hupham pơjing đei adrĕch adrung Hupham.

⁴⁰Lu kon drŏ-nglo Bêla: Ardơ păng Haman. Đơ̆ng Ardơ pơjing đei adrĕch adrung Ardơ; đơ̆ng Naman pơjing đei adrĕch adrung Naman.

⁴¹'Nâu boih lu kon drŏ-nglo Bênjamin kiơ̆ kơ adrĕch adrung lu sư. Chih jô̆ lu sư đei puăn-jĭt pơđăm-rơbâu tơdrâu-hrĕng 'nu.

⁴²'Nâu lu kon drŏ-nglo Đan kiơ̆ kơ adrĕch adrung lu sư: Đơ̆ng Suham pơjing đei adrĕch adrung Suham. 'Nâu adrĕch adrung Đan kiơ̆ kơ adrĕch adrung lu sư.

⁴³Đĭ-đăng lu adrĕch adrung Suham chih jô̆ lu sư đei tơdrâu-jĭt puăn-rơbâu puăn-hrĕng 'nu.

⁴⁴Lu kon drŏ-nglo Aser kiơ̆ adrĕch adrung lu sư: Đơ̆ng Imna pơjing đei adrĕch adrung Imna; đơ̆ng Iswi pơjing đei adrĕch adrung Iswi; đơ̆ng Bêria pơjing đei adrĕch adrung Bêria.

⁴⁵Lu kon drŏ-nglo Bêria: Đơ̆ng Heber pơjing đei adrĕch adrung Hêber; đơ̆ng Malkiên pơjing đei adrĕch adrung Malkiên.

⁴⁶Anăn kon drŏ-kăn Aser noh Sêra.

⁴⁷'Nâu boih adrĕch adrung lu kon drŏ-nglo Aser chih jô̆ lu sư, đei pơđăm-jĭt pêng-rơbâu puăn-hrĕng 'nu.

⁴⁸Lu kon drŏ-nglo Neptali kiơ̆ adrĕch adrung lu sư: Đơ̆ng Jaseel pơjing đei adrĕch adrung Jaseel; đơ̆ng Guni pơjing đei adrĕch adrung Guni;

⁴⁹đơ̆ng Jeser pơjing đei adrĕch adrung Jeser; đơ̆ng Silem pơjing đei adrĕch adrung Silem.

⁵⁰'Nâu boih adrĕch adrung Neptali kiơ̆ kơ adrĕch adrung lu sư; chih jô̆ lu sư đei puăn-jĭt pơđăm-rơbâu puăn-hrĕng 'nu.

⁵¹'Nâu đei chih jô̆ lu kon pơlei adrĕch adrung bơngai Isơrael, tơdrâu-hrĕng minh-rơbâu, tơpơh-hrĕng pêng-jĭt 'nu.

⁵²Kră Yang khan kơ Môis.

⁵³Ih athei asong ăn kơ lu đe âu teh wă jang sa kiơ̆ kơ kơ̆l bơngai mă đei jô̆;

⁵⁴adrĕch adrung ayơ kon pơlei sư lơ ih asong sư să 'biơ̆, adrĕch adrung ayơ kon pơlei sư tŏ sĕt ih asong teh jang sa lu sư iĕ 'biơ̆. Ih athei asong teh jang sa kơ rim adrĕch adrung kiơ̆ kơ đei chih jô̆ boih.

⁵⁵Ih athei hlang lăng mưh ih wă asong teh, lu sư gô đei teh jang sa kiơ̆ kơ adrĕch 'bă lu sư;

⁵⁶Ih athei asong teh jang sa kiơ̆ kơ đei hlang lăng boih, mơ'nah trŏ kơ teh jang sa să, mơ'nah trŏ kơ teh jang sa iĕ 'biơ̆.

⁵⁷'Nâu adrĕch adrung Lêwi, kiơ̆ kơ đe đei jô̆ boih lu sư: Đơ̆ng Gersôn pơjing adrĕch adrung Gersôn; đơ̆ng Kôhat pơjing đei adrĕch adrung Kôhat; đơ̆ng Mêrari pơjing đei adrĕch adrung Mêrari;

⁵⁸'Nâu adrĕch adrung Lêwi; adrĕch adrung Lipni; adrĕch adrung Hêbrôn; adrĕch adrung Mahli, adrĕch adrung Musi, adrĕch adrung Kôra, Kôhat jing 'bă kơ Amram.

⁵⁹Akăn Amram anăn Jôkêbêt kon drŏ-kăn Lêwi tơpŭ tơ lăm dêh char Êyiptơ; sư tơpŭ ăn kơ Aram, Arôn, Môis păng mŏ kơ bre sư anăn Miriam.

⁶⁰Arôn pơjing Nađap, Abihu, Êlêasar, Ithamar.

⁶¹Mă-lei bre Nađap păng Abihu lôch kơplah bre sư pơyơ̆r ŭnh pha 'bơ̆t anăp Kră Yang.

⁶²Jô̆ đĭ-đăng lu kon drŏ-nglo iŏk đơ̆ng minh khei tơ kơpal, đei 'bar-jĭt pêng-rơbâu; adrĕch bơngai Lêwi đe ưh kơ đei jô̆ hơdai hăm adrĕch adrung Isơrael, yua kơ ưh kơ đei asong ôh teh jang sa hơdai lu kon pơlei Isơrael.

⁶³'Nâu Môis păng Êlêasar 'bok soi chih jô̆ lu adrĕch adrung Isơrael lăm char glă Môap jê̆ đak Krong Jôrđăn tơklă pơlei Jêrikô.

⁶⁴Lăm lu bơngai âu, ưh kơ đei bu mă Môis păng Arôn, 'bok soi tơm, đei jô̆ kơplah bre sư chih jô̆ kon pơlei Isơrael lăm char glă Sinai.

⁶⁵Yua kơ Kră Yang đei khan boih gah lu bơngai noh thoi âu: Lu sư gô lôch lăm char glă ưh kơ đei bu oei arih, lăp bre Kalep kon drŏ-nglo Jêphunê păng Jôsuê kon drŏ-nglo Nun đĕch oei arih.