Read bahnar Jo 28 Bible Online

Jo 28 - bahnar bible

Jo 28

¹Kră Yang khan kơ Môis:

²Tơtă bĕ tơdrong 'nâu hăm lu kon pơlei Isơrael păng khan: Ăn lu iĕm kơchăng jah pơyơ̆r kơ Inh tơmam sa kiơ̆ trŏ kơ đêl nơ̆r Inh tơtă, pơyơ̆r kơ Inh noh tơmam soi 'buh na 'bâu phu truh tơ Inh.

³Roi bĕ kơ lu kon pơlei Isơrael thoi âu: 'Nâu tơmam pơyơ̆r soh hăm ŭnh na lu iĕm gô pơyơ̆r kơ Kră Yang: Rim năr 'bar tŏ triu kon iĕ tơno đei minh sơnăm ưh kơ đei jĭ kiơ, jing tơmam pơyơ̆r ling-lang.

⁴Ih athei pơyơ̆r minh pôm kon triu kiơ̆ pơgê, minh pôm kiơ̆ kơsơ̆ măng;

⁵Hơdai hăm tơmam pơyơ̆r phe 'ba, ih athei pơyơ̆r minh lăm mơjĭt êphaa tơpŭng jrâu bơlŭ hăm minh lăm puăn hinb đak rơmă ôliwơ.

⁶Noh tơmam soi 'buh ling-lang inh đei tơtă kơ iĕm tơ kông Sinai, noh jơ̆ minh tơmam soi pơyơ̆r 'bâu phu ăn kơ Kră Yang.

⁷Tơmam soi huch noh minh lăm puăn hin tơdrô tơ rim minh pôm kon triu. Ih athei pơyơ̆r tơmam huch păng tơdrô ăn kơ Kră Yang lăm anih rơgoh.

⁸Ih athei pơyơ̆r kon triu mă 'bar noh kơplah kơsơ̆ măng păng pơm tơmam soi phe 'ba păng tơmam huch thoi til pơgê hei, noh boih tơmam soi soh păng ŭnh pơyơ̆r 'bâu phu ăn kơ Kră Yang.

⁹Năr Sa'bat ih athei pơyơ̆r 'bar tŏ kon triu tơno 'nao minh sơnăm, ưh kơ jĭ kiơ păng 'bar lăm mơjĭt êpha tơpŭng jrâu bơlŭ đak rơmă pơm tơmam soi pơyơ̆r ưh kơ đei pham hơdai hăm tơmam huch hai.

¹⁰Noh tơdrong tơmam pơyơ̆r 'buh lăm rim năr giĕng Sa'bat, sư 'nguaih kơ tơmam soi 'buh pơyơ̆r ling-lang păng tơmam soi huch hai.

¹¹Năr blŭng-a lăm rim khei, lu iĕm athei pơyơ̆r ăn kơ Kră Yang 'bar tŏ rơmo dăm, minh pôm triu tơno păng tơpơh triu kon tơno 'nao minh sơnăm, ưh kơ đei jĭ kiơ, pơm tơmam soi 'buh.

¹²Pêng lăm mơjĭt êpha tơpŭng jrâu bơlŭ đak rơmă ôliwơ yua pơm tơmam soi 'buh hơdai kơ rim rơmo dăm; 'bar lăm mơjĭt êpha tơpŭng jrâu bơlŭ đak rơmă ôliwơ pơm tơmam soi phe 'ba ưh kơ đei pham kơ minh pôm triu tơno;

¹³minh lăm mơjĭt êpha tơpŭng jrâu bơlŭ hăm đak rơmă ôliwơ yua pơm tơmam soi phe 'ba. Noh boih jing tơmam soi 'buh đei 'bâu phu, pơyơ̆r ăn kơ Kră Yang.

¹⁴Tơmam soi huch iŏk lăm minh puăt hin sik hơmu kơ rim minh pôm rơmo tơno păng minh lăm pêng hin kơ kon triu tơno. Minh puăn hin kơ rim triu kon tơno. Noh boih tơmam soi 'buh kơ lăm rim năr blŭng-a kơ khei lăm sơnăm.

¹⁵'Nguaih kơ tơmam soi 'buh mă juăt kơ pơyơ̆r păng tơmam soi huch hai, kư̆m athei pơyơ̆r ăn kơ Kră Yang minh pôm kon bơbe tơno pơm tơmam soi pơklaih yoch.

¹⁶Năr mơjĭt-puăn khei mônh, athei pơm giĕng năm brih kơ Kră Yang.

¹⁷Truh năr mơjĭt-pơđăm lăm khei noh jing năr giĕng; sa 'bĕng ưh kơ đei 'buih pông lăm tơpơh năr.

¹⁸Lăm năr mă mônh gô đei akŭm 'lơ̆ng rơgoh, lu iĕm ưh kơ gơh kơ jang dah pơm minh tơdrong kiơ gah sĕch akar ôh.

¹⁹Lu iĕm athei pơyơ̆r kơ Kră Yang 'bar tŏ rơmo dăm păng tơpơh tŏ triu tơno, lăp minh sơnăm, ưh kơ đei rơka, pơm tơmam soi 'buh.

²⁰Tơmam soi phe 'ba gô iŏk tơpŭng jrâu bơlŭ hăm đak rơmă ôliwơ; lu iĕm iŏk pêng lăm mơjĭt êpha kơ minh pôm rơmo tơno, iŏk 'bar lăm mơjĭt êpha kơ kon triu tơno,

²¹păng iŏk minh lăm mơjĭt êpha kơ rim kon triu,

²²hăm minh pôm bơbe tơno pơm tơmam soi pơklaih yoch, wă huai iŏk yoch đơ̆ng lu iĕm.

²³Lu iĕm athei pơyơ̆r lu tơmam soi 'nâu, 'nguaih kơ tơmam soi 'buh kiơ̆ pơgê, noh tơmam soi 'buh đei hơnơ̆ng.

²⁴Athei pơyơ̆r rim năr lăm tơpơh năr, lu iĕm athei pơyơ̆r tơmam soi 'buh lăm ŭnh, đei 'bâu phu ăn kơ Kră Yang. Ăn kơ lu iĕm pơyơ̆r tơmam soi noh 'nguaih kơ tơmam soi 'buh đei hơnơ̆ng păng pơyơ̆r hơdai hăm tơmam huch hai.

²⁵Năr mă tơpơh iĕm athei akŭm rơgoh 'lơ̆ng lu iĕm ưh kơ gơh jang kiơ gah sĕch akar ôh.

²⁶Lăm năr giĕng phĕ yuă blŭng-a, lăp iĕm đei plei blŭng-a kĕch yuă đei 'ba hle lăm bơyan, kơplah iĕm pơyơ̆r ăn kơ Kră Yang tơmam soi phe 'ba hle, iĕm athei akŭm 'lơ̆ng rơgoh; lăm năr noh lu iĕm ưh kơ gơh jang minh tơdrong kiơ gah sĕch akar.

²⁷Lu iĕm gô rôp 'bar tŏ rơmo dăm, minh pôm triu tơno păng tơpơh tŏ triu kon tơno lăp minh sơnăm, wă pơm tơmam soi 'buh đei 'bâu phu ăn kơ Kră Yang;

²⁸tơmam soi phe 'ba peh iŏk tơpŭng jrâu bơlŭ hăm đak rơmă ôliwơ, pêng lăm mơjĭt êpha kơ minh pôm rơmo dăm, 'bar lăm mơjĭt êpha kơ minh pôm triu tơno,

²⁹minh lăm mơjĭt êpha kơ rim kon triu;

³⁰kư̆m athei pơyơ̆r minh pôm bơbe tơno, wă pơm tơmam soi huai đơ̆ng yoch kơ bơ̆n kơdih.

³¹'Nguaih kơ tơmam soi juăt kơ đei pơyơ̆r hơnơ̆ng păng hăm tơmam soi phe 'ba kư̆m đei lu tơmam soi huch hai. Lu iĕm athei pơyơ̆r lu kon sem tơmam soi noh, ưh kơ đei jĭ kiơ.