Read bahnar Jo 29 Bible Online

Jo 29 - bahnar bible

Jo 29

¹Lăm năr mônh khei tơpơh, lu iĕm gô đei akŭm hơdai 'lơ̆ng rơgoh; ưh kơ gơh kơ jang minh tơdrong kiơ gah sĕch akar lu iĕm, năr noh năr giĕng hlôm keng.

²Lu iĕm athei rôp minh pôm kon rơmo dăm; minh pôm triu tơno păng tơpơh tŏ kon triu tơno 'nao minh sơnăm ưh kơ đei jĭ kiơ pơm tơmam soi 'buh, soh pơyơ̆r đei 'nhui 'bâu phu ăn kơ Kră Yang.

³Hơdai hăm tơmam pơyơ̆r phe 'ba iŏk tơpŭng jrâu bơlŭ hăm đak rơmă ôliwơ, pêng lăm mơjĭt êpha kơ rơmo dăm, 'bar lăm mơjĭt êpha kơ triu tơno,

⁴iŏk minh lăm mơjĭt êpha kơ rim lăm tơpơh tŏ kon triu tơno.

⁵Rôp minh pôm bơbe tơno wă pơyơ̆r pơm tơmam soi, wă huai iŏk đơ̆ng tơdrong yoch lu iĕm.

⁶Lu iĕm athei pơyơ̆r lu tơmam soi 'nâu 'nguaih kơ tơmam soi 'buh mă juăt rim năr lăm khei hơdai hăm pơyơ̆r tơpŭng phe 'ba, hăm tơmam soi 'buh juăt kơ đei ling-lang păng tơmam pơyơ̆r tơpŭng hơdai hăm tơmam huch, kiơ̆ thoi đei pơkă lê̆ boih kơ rim tơmam soi noh, na yua ŭnh soh đei 'nhui 'bâu phu ăn kơ Kră Yang.

⁷Năr mơjĭt lăm khei tơpơh 'nâu, lu iĕm akŭm hơdai 'lơ̆ng rơgoh tih, lu iĕm athei pơjuăt pơmat akâu iĕm kơdih, a lu iĕm ưh kơ gơh jang minh tơdrong kiơ gah sĕch akar ôh.

⁸Lu iĕm athei pơyơ̆r minh pôm rơmo dăm, minh pôm triu tơno păng tơpơh tŏ kon triu tơno 'nao lăp minh sơnăm, ưh kơ đei jĭ kiơ, pơm tơmam soi 'buh pơyơ̆r 'bâu phu ăn kơ Kră Yang.

⁹Tơmam soi phe 'ba iŏk tơpŭng jrâu hăm đak rơmă ôliwơ, tuh pêng lăm mơjĭt êpha kơ rơmo dăm, 'bar lăm mơjĭt êpha kơ triu tơno.

¹⁰Minh lăm mơjĭt êpha kơ rim kon triu tơno.

¹¹Lu iĕm athei rôp minh pôm bơbe tơno wă pơm tơmam soi huai yoch; 'nguaih kơ tơmam soi huai tơdrong yoch tơmam soi 'buh mă juăt rim năr păng tơmam soi pơyơ̆r phe 'ba, hăm tơmam soi huch.

¹²Lăm năr mơjĭt-pơđăm khei tơpơh lu iĕm athei akŭm tih 'lơ̆ng rơgoh, 'nĕ kơ jang minh tơdrong jang kiơ gah sĕch akar, iĕm athei pơm giĕng bơsŭn kơ Kră Yang lăm tơpơh năr.

¹³Lu iĕm athei rôp mơjĭt-pêng tŏ rơmo dăm, 'bar tŏ triu tơno păng mơjĭt-puăn tŏ kon triu tơno 'nao minh sơnăm, huay kơ jĭ kiơ, pơm tơmam soi 'buh, soh hăm ŭnh đei 'nhui 'bâu phu ăn kơ Kră Yang.

¹⁴Tơmam pơyơ̆r phe 'ba, b iŏk tơpŭng jrâu bơlŭ hăm đak rơmă ôliwơ, pêng lăm mơjĭt êpha kơ rim rơmo dăm, 'bar lăm mơjĭt kơ rim triu tơno,

¹⁵păng minh lăm mơjĭt kơ rim kon triu tơno.

¹⁶Lu iĕm kư̆m athei rôp minh pôm bơbe tơno pơm tơmam soi wă huai đơ̆ng yoch, 'nguaih kơ tơmam soi pơyơ̆r mă juăt ling-lang păng tơmam pơyơ̆r phe 'ba păng tơmam soi huch hai.

¹⁷Lăm năr mă 'bar, lu iĕm athei pơyơ̆r mơjĭt-'bar tŏ rơmo dăm, 'bar tŏ triu tơno, mơjĭt-puăn tŏ kon triu tơno 'nao minh sơnăm, huay kơ jĭ kiơ,

¹⁸hăm tơmam pơyơ̆r phe 'ba pơm tơmam soi huch kơ rơmo dăm, triu tơno păng kon triu tơno, kiơ̆ thoi juăt kơ soi pơyơ̆r lu tơmam soi noh.

¹⁹Lu iĕm kư̆m athei rôp minh pôm bơbe tơno wă pơm tơmam soi huai đơ̆ng yoch 'nguaih kơ tơmam soi 'buh păng tơmam soi phe 'ba păng tơmam soi huch hai juăt pơyơ̆r ling-lang.

²⁰Năr mă pêng lu iĕm athei pơyơ̆r mơjĭt-mônh tŏ rơmo dăm, 'bar tŏ triu tơno, mơjĭt-puăn tŏ triu tơno 'nao minh sơnăm, ưh kơ đei jĭ kiơ.

²¹Hơdai hăm tơmam soi pơyơ̆r phe 'ba păng tơmam soi huch kơ rim rơmo dăm, kơ rim triu tơno păng rim kon triu, tơno kiơ̆ kơ thoi juăt kơ soi pơyơ̆r.

²²Lu iĕm kư̆m athei rôp minh pôm bơbe tơno wă pơm tơmam soi huai tơdrong yoch, 'nguaih kơ tơmam soi 'buh hơdai lu tơmam soi pơyơ̆r phe 'ba păng tơmam soi huch hai mă juăt kơ pơyơ̆r ling-lang.

²³Năr mă puăn lu iĕm athei pơyơ̆r mơjĭt tŏ rơmo dăm, 'bar tŏ triu tơno, mơjĭt-puăn tŏ kon triu tơno 'nao minh sơnăm, huay kơ jĭ kiơ,

²⁴hăm tơmam soi pơyơ̆r phe 'ba păng tơmam soi huch hai, kơ rim rơmo dăm, kơ rim triu tơno păng kơ rim kon triu tơno, kiơ̆ kơ thoi đei juăt kơ soi pơyơ̆r boih.

²⁵Lu iĕm kư̆m athei rôp minh pôm bơbe tơno pơm tơmam soi huai đơ̆ng yoch, 'nguaih kơ tơmam soi 'buh hơdai lu tơmam soi pơyơ̆r phe 'ba păng tơmam soi huch hai mă juăt kơ pơyơ̆r ling-lang.

²⁶Năr mă pơđăm, lu iĕm athei pơyơ̆r tơsĭn tŏ rơmo dăm, 'bar tŏ triu tơno, mơjĭt-puăn tŏ kon triu tơno 'nao minh sơnăm, huay kơ jĭ kiơ.

²⁷Hăm tơmam soi pơyơ̆r phe 'ba păng tơmam soi huch hai kơ rim rơmo dăm, kơ rim triu tơno păng rim kon triu tơno, kiơ̆ thoi juăt kơ soi pơyơ̆r boih.

²⁸Lu iĕm athei rôp minh pôm bơbe tơno pơm tơmam soi huai đơ̆ng yoch, 'nguaih kơ tơmam soi 'buh hăm tơmam soi pơyơ̆r phe 'ba păng tơmam soi huch hai mă juăt kơ pơyơ̆r ling-lang.

²⁹Năr mă tơdrâu lu iĕm athei pơyơ̆r tơhngam tŏ rơmo dăm, 'bar tŏ triu tơno, mơjĭt-puăn tŏ kon triu tơno 'nao minh sơnăm, huay kơ jĭ kiơ,

³⁰Hăm tơmam soi pơyơ̆r phe 'ba păng tơmam soi huch hai, kơ rim rơmo dăm, rim kơ triu tơno păng kon triu, kiơ̆ thoi juăt soi pơyơ̆r boih.

³¹Lu iĕm athei rôp minh pôm bơbe tơno pơm tơmam soi huai đơ̆ng yoch, 'nguaih kơ tơmam soi pơyơ̆r phe 'ba păng tơmam soi huch hai kơ rim rơmo dăm, kơ rim triu tơno păng kơ rim kon triu tơno, kiơ̆ kơ thoi juăt kơ soi pơyơ̆r boih.

³²Năr mă tơpơh, lu iĕm athei pơyơ̆r tơpơh tŏ rơmo dăm, 'bar tŏ triu tơno, mơjĭt-puăn tŏ kon triu tơno 'nao minh sơnăm, ưh kơ đei jĭ kiơ,

³³hăm tơmam soi pơyơ̆r phe 'ba păng tơmam soi huch hai kơ rim rơmo dăm, kơ rim triu tơno, kơ rim kon triu tơno kiơ̆ thoi mă juăt kơ soi pơyơ̆r boih.

³⁴Lu iĕm kư̆m athei rôp minh pôm bơbe tơno, pơm tơmam soi huai đơ̆ng yoch, 'nguaih kơ tơmam soi 'buh hăm tơmam soi pơyơ̆r phe 'ba păng hăm tơmam soi huch hai mă juăt kơ pơyơ̆r ling-lang.

³⁵Năr mă tơhngam, lu iĕm athei akŭm tih; ưh kơ gơh jang minh tơdrong jang kiơ kơ sĕch akar;

³⁶athei rôp minh pôm rơmo dăm, minh pôm triu tơno păng tơpơh tŏ kon triu tơno 'nao minh sơnăm, huay kơ đei jĭ kiơ, pơyơ̆r pơm tơmam soi 'buh đei 'nhui 'bâu phu ăn kơ Kră Yang,

³⁷hăm tơmam soi pơyơ̆r phe 'ba păng tơmam soi huch kơ rim rơmo dăm, kơ rim triu tơno păng kơ rim kon triu tơno kiơ̆ thoi mă juăt kơ soi pơyơ̆r boih.

³⁸Lu iĕm kư̆m athei rôp minh pôm bơbe tơno wă pơm tơmam soi huai đơ̆ng yoch, 'nguaih kơ tơmam soi 'buh mă juăt kơ pơm ling-lang, hăm tơmam soi pơyơ̆r phe 'ba păng tơmam soi huch et hai.

³⁹Noh boih mă tơmam soi lu iĕm athei soi pơyơ̆r ăn kơ Kră Yang lăm năr iĕm soi sơmah tih, wă pơm tơmam soi 'buh, tơmam soi pơyơ̆r phe 'ba, tơmam soi huch păng tơmam soi pơyơ̆r 'blŏk bơnê hiôk-hian, 'nguaih kơ tơmam soi mă đêl pơkă păng lu tơmam soi pơyơ̆r hăm jơhngơ̆m hiôk lu iĕm.

⁴⁰Môis roi kơ lu bơngai Isơrael dôm tơdrong mă Kră Yang đei pơkă athei sư.