Read bahnar Jo 3 Bible Online

Jo 3 - bahnar bible

Jo 3

¹'Nâu adrĕch adrung Arôn păng Môis, lăm năr Kră Yang khan kơ Môis tơ kông Sinai.

²'Nâu anăn lu kon drŏ-nglo Arôn: Kơdră sư Nađap, Abihu, Êlêasar păng Ithamar.

³'Nâu lu kon drŏ-nglo Arôn lu 'bok soi mă đe đei tuh đak rơmă tơ kơ̆l wă jing 'bok soi.

⁴Nađap păng Abihu lôch boih 'bơ̆t anăp Kră Yang kơplah bre sư oei soh pơyơ̆r ŭnh ưh kơ rơgoh ôh 'bơ̆t anăp Kră Yang lăm Thŭng glă Sinai păng bre sư ưh kơ đei kon ôh. Bre Êlêasar păng Ithamar pơm 'bok soi kơplah 'bă lu sư Arôn oei arih.

⁵Kră Yang khan kơ Môis thoi âu:

⁶Ăn bĕ kơ kon drŏ-nglo Lêwi năm jê̆, 'bơ̆t anăp Arôn 'bok soi tơm, wă kơ lu adrĕch Lêwi awih awăn tơgŭm sư.

⁷Lu bơngai Lêwi gô awih awăn kơ sư păng awih awăn bơ̆jang kơ lu kon pơlei akŭm hơdai lăm Bơsŭn Anih Akŭm, anih kơkuh kơ Kră Yang.

⁸Kŭm wă wei-lăng đĭ-đăng dôm tơmam lăm Bơsŭn Anih Akŭm păng đĭ tơmam kiơ mă đơ̆ng adrĕch bơngai Isơrael jao wă yua lăm Bơsŭn Anih Akŭm Kră Yang.

⁹Thoi noh ih athei jao dôm lu bơngai Lêwi kơ Arôn păng lu kon drŏ-nglo sư; đĭ-đăng lu sư mă đei rơih iŏk đơ̆ng lăm adrĕch bơngai Isơrael Inh jao boih kơ Arôn.

¹⁰Thoi noh, ih gô pôk Arôn păng lu kon drŏ-nglo sư, wă pơm 'bok soi; lu bơngai tơmoi nai năm jê̆ đe gô pơlôch.

¹¹Kră Yang khan kơ Môis thoi âu:

¹²'Nâu, lăm adrĕch bơngai Isơrael Inh, rơih iŏk boih bơngai Lêwi tơplih ăn kơ đĭ-đăng lu kon kơdră bơngai Isơrael. Thoi noh, bơngai Lêwi noh lu sư gah Inh,

¹³yua kơ đĭ-đăng lu kon kơdră noh gah Inh ngăl. Sơ̆ kơplah Inh pơlôch pơrăm lu kon kơdră lăm char Êyiptơ, Inh rơih 'măn lê̆ kơ Inh lu kon kơdră lăm Isơrael, mă khan noh kon bơngai dah kon sem dơrong, lu sư gah Inh đĭ-đăng; Inh boih Kră Yang.

¹⁴Kră Yang khan dơ̆ng kơ Môis lăm Thŭng Glă Sinai thoi âu:

¹⁵Chih jô̆ bĕ kon sâu Lêwi, kiơ̆ adrĕch kơtum gah 'bă lu sư; jô̆ đĭ-đăng kon drŏ-nglo iŏk đơ̆ng minh khei tơ kơpal.

¹⁶Thoi noh Môis chih jô̆ đĭ-đăng lu adrĕch bơngai Lêwi kiơ̆ thoi nơ̆r Kră Yang đei tơtă khan hăm sư noh.

¹⁷'Nâu anăn lu kon drŏ-nglo Lêwi; Gersôn, Kôhat, Mêrari.

¹⁸'Nâu lu kon drŏ-nglo Gersôn: Lipni, Simei.

¹⁹'Nâu kon drŏ-nglo Kôhat: Amram, Ishar, Hêbrôn păng Usiên.

²⁰Kon drŏ-nglo Marari noh: Mahil, Musi. 'Nâu adrĕch Lêwi kiơ̆ kơ hnam dơnŏ 'bă lu sư.

²¹Đơ̆ng Gersôn đei adrĕch Lipni păng adrĕch Simei; 'nâu boih adrĕch adrung Gersôn.

²²Jô̆ đĭ-đăng kon drŏ-nglo iŏk đơ̆ng 'nao minh khei tơ kơpal, đei tơpơh-rơbâu pơđăm-hrĕng 'nu.

²³Lu adrĕch Gersôn oei tơ gah bơmơ̆t, gah rŏng kơ Bơsŭn Anih Akŭm.

²⁴Yŏng kơdră lu adrĕch Gersôn noh Êliasap kon drŏ-nglo Lael.

²⁵Tơdrong jang lu kon drŏ-nglo Gersôn lăm bơsŭn wei-lăng đĭ-đăng tơmam kiơ kiơ lăm Bơsŭn Anih Akŭm noh wă khan che klơ̆p bơbŭng Bơsŭn păng che pĕng 'măng Bơsŭn Anih Akŭm,

²⁶lu che pĕng kơdeng păng che pĕng 'măng gah kơdeng tăp dăr kơ bơsŭn păng chơnang soi, lu tơlei giĕn chô̆ bơsŭn noh păng đĭ-đăng tơmam yua lăm noh.

²⁷Adrĕch Amram, adrĕch Ishar adrĕch Hêbrôn păng adrĕch Usiêl, lu đe âu jing kon sâu adrĕch Kôhat.

²⁸Jô̆ đĭ-đăng kon drŏ-nglo iŏk đơ̆ng 'nao minh khei tơ kơpal, đei tơhngam-rơbâu tơdrâu-hrĕng 'nu. Tơdrong jang lu sư wei-lăng anih rơgoh.

²⁹Lu adrĕch kon sâu Kôhat pơm anih oei lu sư gah cheng Bơsŭn Anih Akŭm gah gơal.

³⁰Yŏng kơdră adrĕch Kôhat noh Êlisaphan, kon drŏ-nglo Usiên.

³¹Tơdrong jang lu kon sư noh wei-lăng Hom Tơdrong Pơgơ̆p, gơ'bang, jơ̆ng ŭnh kơđeng, chơnang soi păng lu tơmam yua lăm anih rơgoh wă yua lăm tơdrong akŭm kơkuh hăm che pĕng gom păng dôm tơdrong 'bơm lăm tơdrong jang 'noh.

³²Yŏng pơgơ̆r tih hloh lu adrĕch bơngai Lêwi noh Êlêasar, kon drŏ-nglo Arôn 'bok soi tơm; sư jao ăn kơ Êlêasar wei-lăng păng pơgơ̆r lu bơngai bơ̆jang lăm anih rơgoh.

³³Đơ̆ng adrĕch Mêrari đei adrĕch Mahil păng adrĕch Musi; 'nâu boih adrĕch adrung Mêrari.

³⁴Jô̆ đĭ-đăng kon drŏ-nglo iŏk đơ̆ng 'nao minh khei tơ kơpal đei tơdrâu-rơbâu 'bar-hrĕng 'nu.

³⁵Yŏng kơdră adrĕch Mêrari noh Suriêl, kon drŏ-nglo Abihai; bơsŭn lu sư oei gah yă-nơ̆m cheng Bơsŭn Anih Akŭm.

³⁶Tơdrong jang lu sư wei-lăng lu tơ̆r, 'long pơjô̆, jrăng, jrăng trôm, đĭ dôm lu tơmam yua pơm Bơsŭn Anih Akŭm.

³⁷Lu jrăng tăp dăr kơdeng păng jrăng đei bơlôh, lu gơwŏk păng tơlei giĕn chô̆ jrăng.

³⁸Môis, Arôn păng lu kon drŏ-nglo sư, đei pơdơ̆ng anih bơsŭn lu sư oei, tơ anăp gah hơlĕch kơ Bơsŭn Anih Akŭm, lu sư bơ̆jang lăm anih rơgoh tơplih kơ kon pơlei Isơrael. Lu bơngai nai năm jê̆ anih 'nâu đe gô pơlôch.

³⁹Đĭ-đăng adrĕch Lêwi mă Môis păng Arôn đei chih jô̆ kiơ̆ adrĕch adrung lu sư, jô̆ đĭ-đăng bơngai drŏ-nglo iŏk đơ̆ng 'nao minh khei tơ kơpal, đei 'bar-jĭt 'bar-rơbâu 'nu.

⁴⁰Kră Yang khan kơ Môis: Ih jô̆ bĕ đĭ-đăng lu kon kơdră adrĕch bơngai Isơrael, iŏk đơ̆ng 'nao minh khei tơ kơpal, chih tơmơ̆t bĕ lăm sơ̆p hla bơar anăn lu sư.

⁴¹Inh boih Kră Yang. Ih athei chă rơih ăn kơ Inh kon kơdră drŏ-nglo đơ̆ng adrĕch bơngai Lêwi wă tơplih kơ kon drŏ-nglo kơdră lăm adrĕch bơngai Isơrael; kư̆m athei rôp sem dơrong tuh blŭng-a đơ̆ng bơngai Lêwi wă tơplih kơ dôm kon sem dơrong tuh blŭng-a kơ bơngai Isơrael.

⁴²Thoi ei, Môis chih jô̆ pơđĭ lu kon kơdră bơngai Isơrael, kiơ̆ thoi Kră Yang mă đei pơkă khan kơ sư.

⁴³Đĭ-đăng lu kon kơdră chih jô̆ rim anăn lu sư iŏk đơ̆ng 'nao minh khei tơ kơpal, kiơ̆ adrĕch adrung lu sư kơdih, đei 'bar-jĭt 'bar-rơbâu 'bar-hrĕng tơpơh-jĭt pêng 'nu.

⁴⁴Kră Yang khan kơ Môis:

⁴⁵Iŏk bĕ đĭ-đăng kon kơdră bơngai Lêwi tơplih kơ lu kon kơdră bơngai Isơrael păng lu sem dơrong bơngai Lêwi tuh blŭng-a noh tơplih kơ sem dơrong bơngai Isơrael mă tuh blŭng-a; thoi noh, lu bơngai Lêwi lu sư gah Inh. Inh boih Kră Yang.

⁴⁶Bĕ gah wă huai iŏk kon kơdră bơngai Isơrael, jô̆ kon kơdră bơngai Isơrael hloh kơ kon kơdră bơngai Lêwi noh 'bar-hrĕng tơpơh-jĭt pêng 'nu,

⁴⁷na ih athei ra pơđăm seikơl hlak jên hu, kiơ̆ kơ seikơl jên hu lăm Anih Rơgoh; minh seikơl jên hu noh dang 'bar-jĭt Gêraa

⁴⁸Ih athei pơjao ăn jên hu noh kơ Arôn păng lu kon drŏ-nglo sư, noh jên mă huai iŏk lu kon kơdră bơngai Isơrael hloh kơ kon kơdră bơngai Lêwi.

⁴⁹Thoi noh, Môis iŏk jên wă huai iŏk lu kon kơdră bơngai Isơrael hloh kơ kon kơdră bơngai Lêwi mă huai iŏk boih.

⁵⁰Sư iŏk jên hu đơ̆ng lu kon kơdră bơngai Isơrael, minh-rơbâu pêng-hrĕng tơdrâu-jĭt pơđăm seikơl jên hu, kiơ̆ kơ seikơl jên hu lăm anih rơgoh.b

⁵¹Môis chu nơ̆r tơtă Kră Yang, jao ăn jên noh kơ Arôn păng lu kon drŏ-nglo sư, kiơ̆ thoi Kră Yang đei khan pơkă ăn boih kơ sư.