Read bahnar Jo 30 Bible Online

Jo 30 - bahnar bible

Jo 30

¹Môis kư̆m khan kơ lu yŏng pơgơ̆r bơngai Isơrael thoi âu: 'Nâu mă nơ̆r Kră Yang đei khan:

²Tơdah đei minh 'nu bơngai drŏ-nglo wă pơkă pơkăm hăm Kră Yang tơdrong kiơ sư athei pơm mă keh nơ̆r đêl pơkăm noh.

³Dah đei minh 'nu drŏ-kăn, kơplah sư oei 'lơ̆p oei lăm hnam 'bă sư, đei pơma pơkă pơkăm hăm Kră Yang tơdrong kiơ.

⁴Tơdah 'bă sư băt boih tơdrong nơ̆r sư pơkă pơkăm păng sư chu pŭ iŏk, lei na sư athei pơm mă 'blep đêl nơ̆r sư pơkă pơkăm noh.

⁵Tơdah 'bă sư kơtơ̆ng na khă hloi kon sư 'bơ̆t sư băt lei na nơ̆r kon sư pơkă pơkăm noh kon sư huay pă pŭ boih. Kră Yang gô mơnat kơ sư yua kơ 'bă sư khă găn.

⁶Tơdah bơngai drŏ-kăn noh đei klo boih, kơplah sư đei nơ̆r pơkă dah đơ̆ng 'bơ̆r sư pơma pơkăm, minh tơdrong kiơ,

⁷tơdah klo sư kơtơ̆ng tơdrong noh, mă-lei ưh kơ đei pơma kiơ hăm sư lăm năr sư kơtơ̆ng, lei nơ̆r pơkăm noh oei đei păng wei jơhngơ̆m sư đei pơkă boih kơdih akâu sư pŭ iŏk gô oei đei.

⁸Mă-lei dah klo sư băt tơdrong noh, na khă sư, thoi noh nơ̆r sư pơkă noh ưh pă sĭt, gô hiong tôch mă nơ̆r ayơ sư pơma 'bơm ưh kơ đei tơchĕng đơ̆ng 'bơ̆r sư, yua kơ noh na sư chu pŭ, na Kră Yang gô mơnat ăn kơ sư.

⁹Nơ̆r pơkă pơkăm lu bơngai drŏ-kăn adro klo lôch păng lu drŏ-kăn adro pơ̆ng, dôm tơdrong kiơ mă sư pơkăm gô oei đei.

¹⁰Tơdah minh 'nu bơngai drŏ-kăn đei pơkă boih lăm hnam klo sư, dah đei pơma pơkăm hăm jơhngơ̆m tơdrong kiơ,

¹¹păng dah klo sư băt boih tơdrong 'nei, mă-lei huay kơ pơma kơ sư, huay kơ khă sư, lei bơngai drŏ-kăn noh athei pơm kiơ̆ kơ tơdrong mă đêl sư pơkă păng tơdrong mă sư đei pơkăm oei sĭt.

¹²Tơdah klo sư băt boih, lei dôm tơdrong đêl sư pơkă păng tơdrong đêl sư pơkăm noh kư̆m huay pă đei jô̆ boih; lei na dôm tơdrong đêl sư pơkă pơkăm Kră Yang kư̆m mơnat ăn huay pă jô̆ yo kơ tơdrong noh.

¹³Klo sư jô̆ yoch dah huay dôm tơdrong sư đei pơkă pơkăm hăm dih kâu sư.

¹⁴Dah klo sư oei huay kơ jô̆ yoch đunh truh dơning, klo sư wei kơjăp mă sư băt boih tơdrong noh.

¹⁵Tơdah klo sư băt mă-lei gô đunh boih na khan, lei klo sư gô pŭ iŏk tơdrong yoch akăn sư.

¹⁶Noh boih dôm tơdrong juăt mă Kră Yang đei khan ăn kơ Môis gah klo kăn, dah 'bă hăm kon drŏ-kăn sư, kơplah oei 'lơ̆p oei lăm hnam 'bă sư.