Read bahnar Jo 32 Bible Online

Jo 32 - bahnar bible

Jo 32

¹Kon sâu Rubên hăm kon sâu Gat đei lơ sem dơrong; 'bôh tơring char Jaser hăm char Gileat jing anih 'lơ̆ng trŏ kơ wei rong rơmo, triu.

²Na năm khan kơ Môis, Êlêasar 'bok soi păng bơngai pơgơ̆r Isơrael thoi âu:

³Pơlei Atarôt, Đibôn, Jaser, Nimra, Hesbôn, Êlêaleh, Sêbam, Nêbô păng pơlei Bêôn.

⁴Pơlei tơring mă Kră Yang ăn tơblah jei 'bơ̆t anăp lu tơpôl akŭm adrĕch Isơrael, noh jơ̆ minh tơring 'lơ̆ng trŏ kơ wei rong sem dơrong păng lu đĭch đam ih đei sem dơrong lơ.

⁵Pơma khan dơ̆ng: Tơdah lu nhôn gơh mơnat 'bơ̆t anăp ih, rŏ ăn kơ nhôn đĭch đam ih oei tơring âu jang sa, apinh 'nĕ ăn kơ lu nhôn ngĕ kơ mah tŏk hlôi pah to đak Krong Jôrđăn.

⁶Mă-lei Môis tơl nơ̆r lu kon sâu Rubên păng Gat thoi âu: 'Nhŏng oh lu iĕm gô năm tơblah, na iĕm gô oei tơ âu hă?

⁷Liơ lu iĕm pơklai adrĕch Isơrael tơplih jơhngơ̆m, kuă kơ 'maih năm tơ dêh char mă Kră Yang đei ăn boih?

⁸Noh, yă 'bok lu iĕm kư̆m pơm thoi noh sơ̆ kơplah lu sư oei 'bơ̆t Kades Barnêa, inh wơh lu sư năm chop lăng dêh char.

⁹Lu yă 'bok iĕm tŏk năm truh tơ thŭng kuĕl Êskôl, lăng 'bôh tơring char, na pơhlŭ pơm ăn kơ adrĕch Isơrael tơplih jơhngơ̆m kuă kơ năm mơ̆t tơ lăm dêh char mă Kră Yang ăn.

¹⁰Lăm noh hloi, Kră Yang hil mĭl păng sư pơkă khan:

¹¹Lu bơngai mă lĕch đơ̆ng dêh char Êyiptơ, iŏk đơ̆ng 'bar-jĭt sơnăm tơ kơpơ̆ng, gô ưh kơ 'bôh ôh dêh char mă Inh đei pơkă pơ'ngam wă ăn kơ Abraham, Isăk, Jakôp, yua kơ lu bơngai noh ưh kơ kiơ̆ Inh tơnăp,

¹²lăp Kalep kon drŏ-nglo Jêphunê bơngai Kênisit păng Jôsuê kon drŏ-nglo Nun, yua kơ bre sư kiơ̆ Kră Yang tơnăp đĭ jơhngơ̆m.

¹³Thoi noh, tơdrong Kră Yang hil mĭl dêh kơ lu adrĕch bơngai Isơrael, na sư ăn kơ lu đe noh yak thông huang lăm char glă noh puăn-jĭt sơnăm, dĭng mă đĭ-đăng jơhnơr lu bơngai pơm kơnê̆ 'bơ̆t anăp Kră Yang lôch đĭ.

¹⁴'Nâu lu iĕm iung tơplih kơ 'bă lu iĕm, adrĕch bơngai kơnê̆ yoch, wă kơ rai pơthim tơdrong Kră Yang hil mĭl kơ lu adrĕch Isơrael dơ̆ng.

¹⁵Tơdah lu iĕm achăng lê̆ Sư, na Sư lê̆ lu adrĕch 'nâu oei hơnơ̆ng lăm char glă păng lu iĕm pơm ăn kơ adrĕch âu lôch đĭ.

¹⁶Mă-lei lu đe noh năm tơ jê̆ Môis khan: Lu nhôn gô pơm hơdrong kơ lu sem dơrong păng pơlei tih ăn kơ lu kon hơ'lơ̆p nhôn;

¹⁷mă-lei lu nhôn gô chĕp tơmam tơblah yak năm 'bơ̆t anăp kon pơlei Isơrael dĭng lu nhôn ba lu sư truh tơ anih mă đei klah asong ăn kơ lu sư. Gah kon akăn lu nhôn lu sư gô oei lăm pơlei tih kơjăp yua hli kơ kon pơlei lăm dêh char âu.

¹⁸Lu nhôn ưh tam mă brŏk tơ hnam lu nhôn adrol kơ lu kon pơlei Isơrael tam mă iŏk teh jang sa.

¹⁹Lu nhôn ưh kơ đei kiơ lăm kon pơlei Isơrael oei pah to đak Krong Jôrđăn dah oei ataih đơ̆ng noh yua kơ lu nhôn đei teh jang sa tơ pah âu kơ đak Krong Jôrđăn, tơ gah hơlĕch.

²⁰Môis tơl lu sư khan: Tơdah lu iĕm pơm thoi noh, tơdah chĕp đao kơtuang wă năm tơblah 'bơ̆t anăp Kră Yang,

²¹tơdah lu iĕm chĕp đao kơtuang găn tŏk đak Krong Jôrđăn 'bơ̆t anăp Kră Yang, dĭng truh tơ layơ puh lê̆ đĭ lu ayăt đơ̆ng anăp Sư,

²²păng tơdah dơning dơmônh char 'nâu blah iŏk 'bơ̆t anăp Kră Yang boih, iĕm wih brŏk 'bơ̆t anăp Kră Yang hăm kon pơlei Isơrael, lu iĕm ưh pă đei pơma kiơ păng teh âu gô jing teh iĕm jang sa 'bơ̆t anăp Kră Yang.

²³Tơdah iĕm ưh kơ pơm kiơ̆ thoi noh, lu iĕm gô pơm yoch 'bơ̆t anăp Kră Yang, iĕm athei băt tơdrong yoch noh gô tuh tơ kơpal kơ̆l lu iĕm.

²⁴Pơm pơjing lu pơlei tih ăn kơ lu kon hơ'lơ̆p iĕm păng kư̆m pơm hơdrong kơ lu sem dơrong iĕm păng pơm thoi iĕm đei pơkă.

²⁵Kon sâu Gat păng kon sâu Rubên khan dơ̆ng kơ Môis: Lu đĭch đam ih gô pơm kiơ̆ kơ yŏng nhôn pơkă athei.

²⁶Kon hơ'lơ̆p, lu akăn nhôn, khŭl triu păng đĭ-đăng lu sem dơrong lu nhôn gô oei tơ lăm pơlei tih tơ tơring char Gileat âu;

²⁷mă-lei đĭ-đăng lu đĭch đam ih gô chĕp đao hơlă, tŏk tơ pah to, răp găn păng năm tơblah 'bơ̆t anăp Kră Yang, kiơ̆ thoi yŏng nhôn đei tơtă.

²⁸Thoi noh, gah tơdrong 'nâu Môis đei tơtă ăn kơ Êlêasar, 'bok soi, tơtă ăn kơ Jôsuê kon drŏ-nglo Nun păng tơtă ăn kơ lu yŏng kơdră rim adrĕch bơngai Isơrael,

²⁹na khan: Tơdah kon sâu Gat păng kon sâu Rubên chĕp đao hơlă tŏk găn đak Krong Jôrđăn hăm lu iĕm wă năm tơblah 'bơ̆t anăp Kră Yang păng tơdah dêh char noh jei lu iĕm, lei lu iĕm athei ăn kơ lu sư teh tơring Gileat jing teh lu sư jang sa.

³⁰Mă-lei tơdah lu sư ưh kơ đei tŏk găn đak Krong chĕp đao hơlă hơdai iĕm, lei asong lu sư teh jang sa lăm dêh char Kanaan đĕch.

³¹Sâu Gat păng sâu Rubên tơl khan: Lu nhôn pơm kiơ̆ tơdrong kiơ mă Kră Yang đei tơtă khan hăm đĭch đam ih.

³²Lu nhôn gô chĕp đao hơlă tơmam tơblah tŏk yak rok anăp Kră Yang mơ̆t lăm dêh char Kanaan; mă-lei lu nhôn gô iŏk teh jang sa tơ pah âu đak Krong Jôrđăn.

³³Thoi noh, na Môis ăn kơ kon sâu Gat, kon sâu Rubên păng ăn minh puăt kơ kon sâu Manase, kon drŏ-nglo Jôsep, dêh char Sihôn, pơtao Amôrit păng dêh char Ôk pơtao char Basan, wă khan dêh char hăm pơlei tih sư păng lu pơlei iĕ lăm tơring oei tăp dăr.

³⁴Kon sâu Gat tơiung ming pơlei Dihôn, Atarôt păng pơlei Arôe,

³⁵pơlei Atrôt Sôgan, pơlei Jaser, pơlei Jôbêha,

³⁶pơlei Bêt Nimra păng pơlei Bêt Haran, pơlei tih đei dur war kơjăp păng đei hơdrong sem dơrong hai.

³⁷Kon sâu Rubên tơiung ming pơlei Hesbôn, Êlêaleh, Kiriathim,

³⁸pơlei Nêbô, pơlei Baal Mêôn, anăn kơ rim pơlei sư đei tơplih păng Sipma; păng krao anăn plơ̆ng pơlei ayơ mă lu sư đei pơdơ̆ng,

³⁹kon sâu Maki, kon drŏ-nglo Manase, năm blah iŏk tơring char Gileat păng puh tơweh lê̆ lu bơngai Amôrit lĕch.

⁴⁰Thoi noh, Môis ăn tơring char Gileat kơ kon sâu Maki, kon drŏ-nglo Manase, lu sư oei tơ noh.

⁴¹Jair, kon sâu Manase, năm blah iŏk lu pơlei iĕ đơ̆ng kon pơlei adrĕch Amôrit, krao hloi anăn pơlei Hawôt Jar.

⁴²Nôba năm blah iŏk pơlei tih Kênat hăm lu pơlei iĕ sư na krao hloi anăn pơlei Nôba kiơ̆ kơ anăn sư kơdih.